Кода содатано, 2026 иенть Мордовия Республикань Прявтось Артем Здунов яволявтызе Шумбрачинь иекс. Масторлангсо шумбрачиденть питней мезеяк арась. Емавтомс шумбрачинть пек шожда, а вана кода сонзэ ванстомс ды кемекстамс, теде минь кортнинек «Саранский завод точных приборов» ООО-нь прявтонть, эрзянь церанть, шожда атлетикань ды спортонь якамонь коряс Россиянь ветексть чемпиононть Михаил Петрович Коротин марто.
Михаил Петрович васняяк тешкстынзе зярыя енкстнэнь, конатнень эряви кирдемс кеме шумбрачинть ванстомга. Сон кемекстась, ломаненть шумбрачизэ ламосо ашти эрямо лувонть, ярсамопеленть, лецямонь вешематнень топавтоманть эйстэ. Аволь видестэ ярсамось вети давлениянть кепетемантень, верьсэ глюкозань ламолгадомантень, эчкелгадомантень ды истя седе тов. Шумбрачинть ванстомга эряви ярсамс седе ламо фруктадо, эмежде, тикшеде, истя жо сывельде, ловсодо, топодо, калдо, кашадо, саразонь ды куркань сывельде. Седе сеедьстэ ярсамс калийсэ ды магнийсэ сюпав ярсамопельде (модамарть, помидорт, банант, апельсинт, кивить, пештеть, пинеме). А эряви пек салтомс ярсамопеленть. Сонзэ таньшкавтоманть туртов пидемстэ эрявить каямс тикшеть, специят, лимононь сок, пейнечурька. Истя жо эряви явомс мель спортонтень, а таргамс, а симемс иредстиця симемапельде. Видестэ ярсамсто ломанесь а эчкелгады, кемекстасы иммунитетэнть, вадрялгавтсы метаболизманть, пищеварительной ды лия систематнень важодеманть. Истя жо лезды ванстомс одксчинть, ды лиясто мик велявтомс шумбрачинть.
Эряви меремс, Михаил Петрович эсь шумбрачинзэ мельга ваны пштистэ, секскак вере евтазь весе правилатнень кирди мельсэнзэ. Покш тарка эрямосонзо саи спортось. Кода уш тешкстынек, сон – Россиянь чемпион. Михаил Петровичень эрьва валскезэ ушодови вейкетьстэ – зарядкасто ды кельме ведьсэ валномасто.
– Эрьва чинь зарядкась ды кельме ведьсэ валномась монь туртов – те адреналин, ежонь витема, шумбрачинь кемекстамонь енкс. Нинть марто эрятано частной кудосо, секскак тельня зарядканть теян банякудыкеле, кизна жо – ушосо. Зарядкадонть мейле эсень ланга валан кельме ведь ведра. Теде мейле ежось истямо вадря, валсояк а евтави! – тешксты церась.
Физкультурантень ды спортонтень Михаил Петрович покш мель кармась явомо эйкакш пингестэ. Минек героенть ундоксонзо Орданьбуень райононь Каласева велестэ. Историянь максоматнень коряс, те велесь явови кавтов. Вейке пельксэсь – Каласева, омбоцесь – Канаклейка. Михаил Петрович чачсь-кассь Канаклейкасо. Тетязо-авазо – эрзянь ломанть. Свал лакасть велень тевсэ, важодсть колхозсо. Михаил Петровичень вечкадедазо, Иван Суюшов – Ине Отечественной войнань участник.
Вишка пингестэ саезь Михаил содылизе важодеманть алкуксонь танстензэ. Чарькодеви, велесэ эрязь, модалангсо важодезь, сон кассь-кепететсь роботамо вечкицякс, тетянь-авань кунсолыцякс ды кудоютконь тевсэ лездыця эйкакшокс. Школасо тонавтнемась церантень максовсь шождасто. Сехте пек сонензэ вечкевсь физкультурась.
– Покш сюкпря евтан Анатолий Максимович Баюшкиннэнь. Минек школасо сон ветясь физкультурань уроктнень. Самай те ломанесь тонавтымимгак вечкеме спортонть. Тетянь-авань кудось аштесь велень клубонть маласо, конань удало теезель спортонь площадка. Тов якилинек волейболсо ды футболсо налксеме. Анатолий Максимович ладякшнымим те площадканть лангсо прявтокс. Монь пшти вановтон ало ульнесь волейбольной сеткась ды оскась. Истя жо школасо тонавтнемстэ вечкилинь кирякстнеме сокссо, чийнеме ды тейнеме куш кодат физической упражненият, – ледстни минек героесь.
Школань прядомадо мейле од церась тусь тонавтнеме Н.П. Огарев лемсэ МГУ-нь электронной техникань факультетэв. Студентэнь шкасто Михаил покш мель явсь шожда атлетикантень. Шкань ютазь теевсь профессиональной спортсменэкс. Ардтнесь спортонь ламо пелькстамотнева, кемекстась эсь виевчинзэ. Университетэнть прядомадо мейле зярыя шка важодсь «Орбита» Саранскоень полупроводниковой изделиянь заводсо инженерэкс, седе тов – комсомолонь организациясо. Теде мейле ютась роботамо «Завод точных приборов» предприятиянтень. Важодеманзо ушодызе цехсэ, ульнесь технической бюронь прявтонь полавтыцякс, зярыя шка роботась коммерческой отделсэ. 1987 иень ноябрянь 10-це чистэ Михаил Коротин аравтозель заводонь прявтокс. Те таркасонть важоди нейгак. Весе содатано, те заводонть покш ды сюпав историязо. Мордовиясо сон ловови виев ды кеме предприятиятнестэ вейкекс.
Заводсо важодемстэ Михаил Петрович лоткакшнось явомо мель спортонтень – эзь сатно шказо. Ды ансяк 2020 иестэ, ковидсэ сэредемадо мейле, церась тагояк велявтсь спортонтень.
– Шумбрачинь витемга кудораськенек якинек Пятигорскоев. Весе содатано, пандонь коштось – те сехте вадря лециця. Тесэ теевинь содавиксэкс вейке профессор марто. Аваломанесь уш умок пенсиясоль. Кортынек седе-тонадо, карминь содамо, сон пингензэ перть покш мель яви спортонтень. Эрьва чизэ, кода ламо иеде икелеяк, ушодовиль чийнемасто. Абунгадынь, зярдо ялгам евтынзе, зяро иензэ… Ансяк авась мерсь, весе тевесь спортсонть. Ды вана, тедеде топодить кото иеть, кода мон одс карминь явомо мель спортонтень. Чийнеме ушодынь 500 метрань дистанциясто, шкань ютазь вайгельбетне ламолгадсть. Эсень туртов панжинь од енкс – спортонь якамонть. Спортось казсь тень ламо од ялгат. Саемга, Петр Семенович Прокинэнь. Те ломанесь – алкуксонь спортсмен! Самай сонзэ марто ушодыньгак ардтнеме спортонь пелькстамотнес. Истя, аволь умок ульнинь спортонь якамонь пелькстамосо Санкт-Петербургсо, тосо саинь васенце тарка 5 вайгельбень дистанциясо, теде мейле ардтнинь Тулав, косо те енкссонть тагояк изнинь кавто омбоце таркат. Ульнинь Пятигорскойсэ, тосо изнинь васенце тарка 3,5 вайгельбень дистанциясо. Те иень апрельстэ те ошсонть тагояк ютавтовить шожда атлетикань ды спортонь якамонь коряс пелькстамот. Бажан понгомс. Кода а евтамс, мон – «TAVLA TRAIL» раськень енкс марто фестивалень эрьва иень участник. Сон ютавтови Кочкурбуень Вирь Тавласо. Ацирьгавты, Мордовиясо ютавтовить пек аламо спортонь коряс пелькстамот сыре ломантнень туртов. Арсян, республикасонок улить ламо ломанть, конатне эште бажить варчамс эсест виест спортсо, – корты спортсменэсь.
Михаил Коротинэнь покш кудораськезэ. Сонзэ колмо нуцьканзо: Ваня, Миша ды Вася церынькатне. Сынь уш нейке явить мель спортонтень. Якить покштяст марто чийнеме, ялго якамо. Михаил Петрович уш вишка порасто саезь бажи тонавтомс нуцькатнень ванстомс шумбрачинть ды вечкемс спортонть. Эдь шумбрачись ды спортось – кавто паро ялгат.
Алена Артемьева
Фототне саезь Михаил Коротинэнь архивстэ.