«Саранск Арена» Универсальной залсонть мольсть «Кубок Первого канала по фигурному катанию на коньках» весероссиянь пелькстамотне, тей сакшность Россиянь виев фигуристтнэ.

Пелькстамотнень панжомо сакшнось Мордовиянь Прявтось Артём Здунов. Шумбракстнемань валсонзо сон мерсь: «Васенце каналонь Кубокось – масторлангонь уровнянь тев! Сюкпря турнирэнь инжетненень самонть кисэ – течи тесэ содавикс спортсмент ды тренерт. Башка сюкпря Россиянь Президентэнтень Владимир Владимирович Путиннэнь Мордовиянь эрицятнень пельде те пек вадря залонть кисэ, конантень кельгить 8 тежат ломанть, тесэ мереви ютавтнемс раськеютконь уровнянь куш кодат мероприятият. Покш мель марто васттано тынк Мордовиясо! Спортсментнэнень арсян весементь паронть, ды кадык изни виевесь!»

Кубокось ушодовсь мартонь 25-це чистэ кирнявтнемань турнирсэнть. Мартонь 26-це чистэ фигуристтнэ невтизь нурькине программатнень, недлячистэ – произвольнойтнень.

Пелькстамотнес сакшность раськеютконь пелькстамотнень изницятне, призертнэ, ютксост Пекинсэ Олимпийской XXIV налксематнень участниктне: Марк Кондратюк, Евгений Семененко, Андрей Мозалев, Виктория Синицина – Никита Кацалапов, Александра Степанова – Иван Букин, Диана Дэвис – Глеб Смолкин, Анастасия Мишина – Александр Галлямов, Александра Бойкова – Дмитрий Козловский, Евгения Тарасова – Владимир Морозов, Камила Валиева, Анна Щербакова, Елизавета Туктамышева, Михаил Коляда – весемезэ 94 участникть.
Сынст марто Саранскоев сакшность содавикс тренертнэ – Александр Свинин, Алексей Мишин, Ирина Жук, Тамара Москвина, Этери Тутберидзе, Александр Жулин, Евгений Плющенко.
Пелькстамотне мольсть мартонь 27-це чис. Сынь невтевсть Васенце каналонь виде эфирсэ.