Суббота, октября 24, 2020
Важное

Мордовия Республикань сыре ломанень «Клуб активного долголетия» Ассоциацияс совицятне вана уш кеменде ламо иеть сынсь, надобиявтомо кувалгавтыть эрямост, ветить эрямонь шумбра лувонть.

Виде, нурька шкас, зярс эзь мереве лиснемс ушов, яксемс спортонь комплекстнэс, сынь лоткакшность вейс пурнавомо. Тень лангс апак вано, ламот юткстост тень поладсть кудосо. Неть сёксень маней читнестэ сынь таго вельмевтизь занятияст, ансяк ушосо.
Ледстясынек, сынст программасонть улить: лексемань гимнастика, эзнень гимнастика, шумбралгавтомань чийнемат, бассейнасо укшномат, настольной ды покш тенниссэ налксемат ды истя седе тов.

Тешкстасынек, ютазь иестэ Елена ды Геннадий Тимченко лемсэ благотворительной фондонть лезксэнзэ вельде «ЗОЖ» Ассоциациясь лиссь изницякс «Активное поколение – 2019» пелькстамосонть. Кода мерсь тенек Ассоциациянь президентэсь Г.А. Мареськина, те проектэнть васень тевезэ – физической культуранть, спортонть, шумбра лувонть эрямос совавтомась, сыре ломантнень, сехте пек велесэ эрицятнень ютксо, шумбралгавтомась ды эрямост кувалгавтомась. Истя, Кочкуровань муниципальной райононь эрицятне сакшность Саранскоень спортивной залтнэс, ды мартост ютавтозельть занятият укшномань коряс, эзнень гимнастика. Сынь налксесть волейболсо, ульнесть райононь, ошонь ды республикань спортивно-массовой пелькстамотнесэ. Те проектэнть коряс истя жо ютавтовсь агитационно-пропагандистской важодемась, конань вельде седе ламо ломанть тердевить эрямонь шумбра лувонтень ды физической культурань занятиятненень.

«Клуб активного долголетия» МР-нь Ассоциациянть вельде сыре ломантне тонадыть пряст ветямо пенсияс лисемадо мейле, штобу кадовомс эрявиксэкс обществантень, а ёмавтомс умственной ды физической важодемань виенть, пурнамс эштё лия содамочить ды вастомс од ялгат, вейсэ лезэвстэ ютавтомс юткошканть.

– Кенярксонтень, те иестэ минь таго лисинек изницякс грантонь пелькстамосонть, – ёвтни «Клуб активного долголетия» Ассоциациянь вице-президентэсь Е.Г. Лезина. – Нама, кудосо кувать аштемадо мейле минек сыре ломантне покш кенярксчисэ вастызь те паро кулянть ды мельспаросо састь вейсэнь занятиятнес. РФ-нь Президентэнь грантонть лезксэнзэ вельде неть занятиятне ков седе пек ламолгавтовсть. Тов ней совавтынек йоганть, занятият скандинавиянь якамонть коряс, поладсынек бассейнасо укшноматнень, тенниссэ налксематнень.
Самоизоляциянь шкадонть мейле васенце занятиятне ютавтовсть Эко-парксо ды поладовсть эрьва недлянь пондельникстэ, середасто ды пецясто. Истя жо неть занятиятне 8 чассто саезь 9 часос ютавтовить Саранск ошонь округонь Пролетарской райононь одкстомтозь парксонть. Весенень, кинь ули мелезэ седе кувать апак сэреде эрямс, тердевить эрямо лувонть шумбралгавтомо ды паролгавтомо.

«Клуб активного долголетия» МР-нь Ассоциациясь лиснесь кавксть изницякс РФ-нь Президентэнь «Гражданской обществанть виевгавтомга» (2017, 2020 иетнестэ), IPRA GWA региононь партнёрствань ды коммуникациянь сферасо премиянь изницякс, «Новое направление «ЗОЖ» номинациясонть (2018 ие), Елена ды Геннадий Тимченко лемсэ благотворительной фондонть лезксэнзэ вельде «Активное поколение» пелькстамонь изницякс (2019 ие).


Валентина ЮДИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».