Четверг, марта 28, 2024
Важное



ЮТАЗЬ ПЕЦЯСТО РЕСПУБЛИКАНЬ КУЛЬТУРАНЬ КУДОСО ВЕТЯВСЬ КЕНЯРКСЧИНЬ ПРОМКС, КОНАСЬ АЛТАЗЕЛЬ МОРДОВИЯНЬ АВТОНОМИЯНЬ 90 ИЕТНЕНЕНЬ.

РДК-нь ФОЙЕСЭНТЬ АНОКСТАЗЕЛЬТЬ ЗЯРЫЯ ВЫСТАВКАТ: ПУРНАЗЕЛЬТЬ ЛАМО ФОТОГРАФИЯТ ДЫ ДОКУМЕНТТ, КОНАТ ЁВТНЕСТЬ МОРДОВИЯНТЬ ТЕЕВЕМАНЬ ИСТОРИЯДОНТЬ, НЕЕНЬ ШКАНЬ ЭРЯМОДОНТЬ ДЫ ИЗНЯВКСТНЭДЕ, ИСТЯ ЖО АНОКСТАЗЕЛЬ РАСЬКЕНЬ ПРОМЫСЛАНЬ СЮПАВ ВЫСТАВКА. МИНЕК РЕГИОНОНТЬ УЦЯСКАДОНЗО ЁВТНЕСЬ «МОРДОВИЯНТЕНЬ – 90!» КИНОФИЛЬМАСЬ, КОНА НЕВТЕЗЕЛЬ КЕНЯРКСЧИНЬ ПРОМКСОНТЕНЬ ПУРНАВОЗТНЕНЕНЬ.

Васенцекс сценанть лангсто покш чинть кувалма поздоровт ёвтась Мордовиянь Прявтось Владимир Волков. Сон тешкстызе, 90 иеде икеле эрзятнень-мокшотнень ды минек республиканть эрямосо лиссь покш тев. 1930 иень якшамковонь 10-це чистэ ВЦИК-нь Президиумось кемекстась постановления Мордовиянь автономной областенть теемадо. Республикань Прявтось ёвтызе, ламот иетнень перть эрзятнень ды мокшотнень уцяскаст кеместэ сюлмавозь минек масторонть эрямонзо марто.

– Минь свал кирдтяно мельсэнек содавикс ломантнень лемест, кить ламо тейсть тиринь республиканть ды масторонть лезэс, – мерсь Мордовиянь Прявтось. – Неть: иневанькс праведной воинэсь Фёдор Ушаков, ине скульпторось Степан Эрьзя, артыцясь Федот Сычков, учёноесь Макар Евсевьев, масторлангонь келес содавикс врачось-офтальмологось Владимир Филатов, морыцясь Лидия Русланова ды ламот-ламот лият. Никон Патриархонть ундоксонзо – минек ёнкссто.
Владимир Волков ледстинзе сеть ломантнень лемест, кить аштесть Мордовиянть теевемань ушодкссо, сетнень, кить ламо тейсть региононь промышленностенть виевгавтоманзо туртов, се шкань велень хозяйствань прявттнэнь, сынст ютксо: Александр Куняев, Александр Климбовский ды лият.
Сюкпрянь башка валт ёвтазельть Ине Отечественной войнань ветерантнэнь, сыре ломантнень, войнань эйкакштнень лемс. Владимир Волков тешкстызе, тедеде тешкставить Ине Изнямонь 75 иетне. Войнась кармась алкуксонь цидярдомакс масторонть ды Мордовиянь од республиканть туртов. Минек ёнкссо 100 тёжадо ламо чачозтне казезь орденсэ ды медальсэ, 109-тне – Советской Союзонь Геройть, комсьветее ломантне кармасть Славань орденэнь полной кавалерэкс.
– Течи Мордовиясь – те эрязасто виевгадыця регионтнэстэ вейкесь. Касыть экономикань, промышленностень, велень хозяйствань невтевкстнэ. Топавтозь сядодо ламо покш проектт, панжозь од заводт, теезь малав кемень тёжат важодемань таркат, – мерсь республикань Прявтось.
Саранскойсэ важоди оптической волокнань нолдамонь коряс Россиянь келес вейкине заводось. Лезэвстэ важоди Технопаркось. Улить изнявкст фармацевтикасо. Эсенек ды омбо масторонь рынкатнесэ кемекстыть эсест таркаст вагононь теиця, светотехникань, стройматериалонь предприятиятне. Меельце вете иетнень перть малав ветексть кассь экспортось, минек предприятиятнень продукциясь пачтяви 66 мастортнэс. Мордовиясь саи Россиянь келес васенце тарка вейке ломаненть лангс ловсонь ды алонь нолдамонть коряс, икеле молиця сывелень нолдамонть коряс.
– Минь покш мель явтано эрзянь ды мокшонь кельтнень, раськень культуранть ды койтнень ванстомантень ды сюпалгавтомантень, – мерсь Владимир Волков. – Эрзянь-мокшонь раськень регионъютконь организациянь инекужонтень, конась ютавтовсь Саранскойсэ ютазь иень ожоковсто, сакшность 33 региононь эрицят. Течияк те залсонть – регионтнэстэ эрзянь ды мокшонь диаспорань представительтне. Сюкпря, минек марто вейсэ тынь мелявттадо республиканть уцясканзо кис.
Мордовиянь Прявтось ёвтась покш сюкпря республикань весе эрицятнень пельде Россиянь Президентэнтень Владимир Путиннэнь свалшкань явовиця лезксэнть кисэ.
– Течи мон аволь стяко ледстинь ламо лемть. Мордовиясь – те ломанть, минек ютксто эрьвась. Тынк тетянк ды покштянк, тынк эйкакшонк ды нуцьканк. Сынст уцяскасост, изнявкссост ды стакачисэст неяви республиканть историязо. Ломантнень, важодеме вечкеманть, кемевиксчинть, вечкеме ды мелявтомо маштоманть лангс свал нежедсь ды седе тов карми нежедеме Мордовиясь! – мерсь Владимир Волков. – Миненек ули кинь лангсто саемс пример. Миненек ули мезес бажамс ванды! Покш чи марто, вечкевикс ялгат! Чачома чи марто, минек Мордовия!
Кенярксчинь промкссонть Мордовиянь Прявтось явшесь государственной покш казнеть. Истя, Россиянь Президентэнть Указонзо коряс здравоохранениясо изнявкстнэнь ды ламо иень перть вадря важодеманть кисэ «Заслуженный врач Российской Федерации» почетонь лемесь максозь Пинямаскин Анатолий Николаевичнень – Республиканской 5№ клинической больницянь прявт врачонтень.
СМИ-нь виевгавтомасо покш изнявкстнэнь ды ламо иень перть лезэв тевтееманть кисэ Россиянь Президентэнь Благодарностть яволявтозь Ишуткин Николай Ивановичнень – «Чилисема» журналонь прявт редакторонтень ды Лушкин Иван Степановичнень – «Мокшень правда» газетань прявт редакторонтень.
Республикань агропромышленной комплексэнть виевгавтомасо покш путовксонть кисэ Славань I степенень орденсэ казезь Живаев Александр Михайлович – «Тепличное» АО-нь генеральной директорось. Сон кармась МР-нь Славань орденэнь полной кавалерэкс.
Равчирень федеральной округсо Россиянь Президентэнь полномочной представителенть Игорь Комаровонь пельде поздоровонь валтнэнь ловнынзе сонзэ полавтыцясь Игорь Буренков. Пачтямосонть кортави: Мордовиясо эрить важодеме вечкиця, эсь тевест вадрясто топавтыця, инжень вастомо маштыця, чевте седей ды панжадо ойме ломанть.
Покш чинть кувалма поздоровонь валт кучсть Федеральной Собраниянь Федерациянь Советэнь Председателесь В.И.Матвиенко, РФ-нь Президентэнь Администрациянь руководителень васенце полавтыцясь С.В.Кириенко, РФ-нь региононь прявттнэ, ошонь мэртнэ, федеральной структурань ды ведомствань ветицятне.

Татьяна ИКОННИКОВА
Фототне: Э.Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».