Пятница, марта 29, 2024
Важное

Даволковонь 27-це чистэ Мордовиянь Прявтонь тевтнень топавтыцянть Артём Здуновонь Ицялонь райононть марто содавтомазо ушодовсь Берегово-Сыресевской школанть ванномасто.

Спортзалсонть республикань руководителесь неизе, кода од спортсментнэ налксить волейболсо, чувтосто керсемань мастерскойсэнть неинзе кедьчелькев од ломантнень теевксэст. Вейке классонть эйкакштне тонавтнесть программированиянть, лиясонть – робототехниканть. «Пек вадрят!» – шнынзе эйкакштнень важодемаст Мордовиянь Прявтонь тевтнень топавтыцясь. Артём Здунов ваннызе школань столовоенть, весе эмежтне кастовить школань пиресэ, сынь сатыть цела иес! Школастонть лисемстэ мольсь хоккеень кортонть ваксс, тесэ эйкакштне кирякстнесть конькасо.

Велень пожарной пунктонть вакска ардомсто Артём Здунов сайсь мель кортамс толонь мадстицятнень марто, те толонь мадстицянь добровольной команда. Региононь прявтось ваннызе улиця техниканть.

Оброчноень средней школасонть Мордовиянь Прявтонь тевтнень топавтыцясь истя жо теевсь содавиксэкс дополнительной тонавтомань кужинетнень важодемаст марто. Оброчноень школась – велень школатнесэ физкультуранть ды спортонть туртов условиятнень теемань коряс федеральной программань участник, тесэ теезь искусственной вельтявкс марто спортивной площадка (футболонь пакся, баскетболонь ды волейболонь площадкат). Истя жо проектэнть лувсо тесэ путозь ушонь тренажёрт ды эйкакшонь налксемань ошке, витнезь спортзалось.

Ицялонь ёнкссо важодемань коряс улемстэ Артём Здунов якась Московонь ды весе Русень Иневанькс Патриархонть Кириллэнь семиянзо кудонтень. Василий Гундяев священникенть, Патриархонть покштянзо, кудонть 1970-це иетнеде мейле азоронзо ульнесть лият. Ансяк Саранскоень ды Мордовиянь митрополитэнть Зиновиень бажамонзо вельде кудонть мейле рамизе ды витнизе-петнизе Саранскоень епархиясь. Ванстовозь фотографиятнень вельде кудопотмось теезь истямокс, кодамо сон ульнесь, зярдо Василий Гундяев священникентень каникулас сакшныль нуцьказо – сы шкань Патриархось Кирилл.

Седе тов Артём Здунов якась агропромышленной комплексэнь зярыя предприятиятнес. Рождествено велень «Агро-мир» обществань прявтось Николай Пантюшин ёвтнесь региононь руководителентень эсензэ хозяйствадонть, невтизе ракшань кирдемань комплексэнть ды ловсонь производстванть. Меельце кото иетнень перть ракшатне ламолгавтовсть малав ветексть. Те шкань перть путозь инвестициятнень покшолмаст кармасть 1 млрд. целковойде ламо.

Оброчнойсэ Артём Здунов ульнесь «Агропромсервисэнь» площадкасонть – предприятиясонть, конась теезь икелень государственной конезаводонть юрсо. Ракшань кирдемадо, сюронь ды ламбамо якстерькаенть кастомадо башка, тесэ улить алашат. Ней конезаводсонть сядодо ламо мазый ракшатнеде, сынст ютксо тяжеловозт – «Сырнень сёксь» масторонь агропромышленной выставкань изницят.

Алашань фермань прявтонть Владимир Нужнов марто кортамсто, Артём Здунов тешкстызе туристтнэнь тердемаст коряс конезаводонть покш потенциалонзо ды мерсь, неть возможносттне ней нолдавить. Региононь руководителесь кармавтсь спортонь, од ломанень политикань ды туризмань министрань полавтыцянтень анокстамс аравтлув районов туристтнэнь тердемаст коряс. «Оймсемань те видэнть коряс кулясь улезэ республикань эрьва гостиницасонть. Те туристэнь анок продукта, конантень ансяк эряви максомс форма. Эряви теемс указательть. Явомс ды тонавтомс экскурсовод. Анокстамс экскурсиянь программа, ков совавтови алаша лангсо ардтнемась ды лия услугатне. Весе тень эряви арсемс», – мерсь Артём Здунов.

Мейле Дубровское велесэ Коршуновтнень семиянь фермасонть региононь прявтонтень ёвтнесть, мезе теезь важодемань кемень иетнень перть.

Кергуды велесэнть Артём Здунов ваннызе «Дружба» обществань ракшань кирдемань ферманть. Мелят тесэ строязь од комплекс. Ней тесэ важодить малав 200 ломанть, средней зарплатась – 32 тёжадо ламо.

Мордовиянь Прявтонь тевтнень топавтыцясь истя жо ваннынзе Ицялонь райононь переработкань предприятиятнень: сырань теемань комбинатонть, «Протеин» компаниянть ды «Кемлянский» спиртэнь заводонть.

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».