Пятница, марта 29, 2024
Важное

Сундерьковонь 19-це чистэ ПФО-со РФ-нь Президентэнь полномочной представителесь Игорь Комаров содавтынзе Мордовия Республикань Правительстванть, депутаттнэнь, исполнительной властень федеральной органонь территориальной органтнэнь руководительтнень, муниципальной образованиянь прявттнэнь, политической партиятнес ды общественной организациятнес совицятнень Мордовия Республикань Прявтонь тевтнень нурька шкас топавтыцянть Артём Здунов марто.

«Артём Алексеевичень государственной управлениянь покш опытэзэ, сон сюлмавозь Равчирень федеральной округонть марто, сон Россиянь сехте виев регионтнэстэ вейкестэнть – Татарстан Республикасто; улить эрзянь ундоксонзо, сон чарькоди ламо раськень регионтнэсэ важодемань башка ёнкстнэнь. Татарстан ды Дагестан республикатнесэ важодемстэ, невтизе прянзо кода покш уровенень профессионал, кона машты саеме редявикс изнявкст», – тешкстызе полпредэсь.

Мордовиянь Прявтось Владимир Волков видеосвязенть вельде ютавтсь промкс республикасонть коронавирусонь инфекциянть каршо бороцямонь кевкстематнень коряс. Промкссонть ульнесть: Мордовиянь Правительствань Председателесь Владимир Сушков, Мордовия Республикань Прявтонть Администрациянь руководителесь Андрей Богатов, МР-нь Правительствань Председателень полавтыцясь Галина Лотванова, МР-нь здравоохранениянь министрась Олег Маркин, МР-ва Роспотребнадзоронь прявтось Татьяна Харитонова. Промксонтень истя жо тердезельть МР-ва Здравоохранениянь ды социальной развитиянь коряс надзоронь Федеральной службань Управлениянь ды «Фармация» МР-нь ГУП-нь руководительтне.

Неень шкане эпидемиологиянь тевтне масторсонть ды Мордовиясо стакат, оперативной штабось важоди чинек-венек, весе кевкстематне, конат вешить од тевтнень кемекстамонть, аштить Мордовиянь Прявтонть свалшкань вановтонзо ало. Ламо кевкстемат сыть республикань Прявтонь «пси линиянтень», весе сынь ванновить.

Владимир Волков тешкстызе, меельце шкастонть региононь эрицятнень пельде сыть ламо пеняцямот сень коряс: аптекатнесэ арасть эрявикс лекарстват. Кортамось моли противовирусной препараттнэде ды антибиотиктнеде.

«Сехте стака кевкстематнестэ вейкесь ней – те лекарстватне, аволь ансяк ковидэнть, истя жо ОРВИ-нть каршо, – мерсь Мордовиянь Прявтось. – Аптекатнесэ арась гриппферон, ёмась арбидолось, лия препараттнэ. Чарькодян, рамицятнеде ламо, ансяк миненек тень эряви кирдемс мельсэ!»

Аптекатнесэ препараттнэ а сатыть зярыя тувталонь коряс. Васенцесь, ульнесть стакачить маркировкань коряс од вешематнень кувалма. Омбоце тувталось – коронавирусонь инфекциянть ламолгадоманзо кувалма покш вешеманть касомась, башка лекарстватне рамсевить сеске, аптекатне а кенерить усковтомс одт. Кода пачтясь «Фармация» МР-нь ГУП-нь генеральной прявтонь тевтнень топавтыцясь Алексей Ладошкин, неть препараттнэ государственной аптекатнесэ улить, ансяк аволь ламо. Секскак куроксто тешкставить договорт усксицятнень ды производительтнень марто. Кортамось моли истят препараттнэде, кода арбидол, цефтриаксон, азитромицин ды зярыя лият. Валонзо коряс, лекарстватнень коряс тевтне целанек ладявить маласо шкастонть.

Седе тов те стакачинть а нолдамга, республикань Прявтось кармавтсь «Фармация» МР-нь ГУП-нть тешкстамс договорт поставщиктнень марто.

Частной аптекатне, ризксэнтень, важодить пек беряньстэ.

«Минек частной аптекатнесэ кавто недлят арась арбидол – те кода лемдеви? – пшкадсь Владимир Волков. – Монень састь пеняцямот – ломанесь а звоняви частной аптекас. Бути сынст арасть лекарстваст – мезекс миненек истят аптекатне? Мезекс сыненст максомс лицензият?»

Мордовия Республикава Росздравнадзоронь Управлениянтень кармавтозь куроксто ютавтомс ванномат ды кемекстамс пшти мерат тевест беряньстэ топавтыця аптекатнень коряс. Течинь условиятнесэ, кода тешкстызе республикань Прявтось, аптекатненень эряви важодемс шканть икельдязь, теемс ОРВИ-нь, ковидэнь ды пневмониянь лецямонь туртов препараттнэнь а маштыця запаст. Эдь коронавирусонть марто сюлмавозь тевтне зярс стакат. Кода пачтясь Владимир Волковнень МР-нь Правительствань Председателень полавтыцясь Галина Лотванова, республикань инфекциянь госпитальтнесэ ковидэнь таркатне ламолгавтовить.

Тешкстазель, республикань Правительствась путы покш вийть лецямонь учреждениятнень свалшкань важодеманть туртов. Те тевтеемантень вейсэндявсть исполнительной властень весе органтнэ, весе министерстватне ды ведомстватне. Истя, республикань Минстроесь оперативной штабонть кармавтоманзо коряс топавты тевтнень ковидэнь госпитальтнес кислородонь ветямонть ды оборудованиянь путоманть коряс, те важодемась ветяви чинек-венек.

Республикань Минпромось ваны лецямонь учреждениятнес кислородонь пачтямонть мельга. Ледстясынек, Мордовиясо медицинань кислородонть нолды эсенек компаниясь. Владимир Волков тешкстызе, пштистэ эряви ваномс производствань процессэнть, кислород марто баллонтнэнь тевс нолдамсто сэтьмечинть топавтоманть мельга, истя жо теемс таштавкст, бути лецямонь учреждениятнес карми эрявомо седе ламо кислород. Весе кислородось, конась пачтяви лецямонь учреждениятнес, ваннови: республикасонть тень туртов ули эрявикс лаборатория.

Медицинасо важодицятненень лездамга явозь эштё транспорт, истя жо конась рамазь социальной обслуживаниянь учреждениятнень туртов «Демография» нацпроектэнть лувсо.

Республикань сыре ломантнень яволявтомаст коряс эрязасто важодить волонтёртнэ. Маласо шкастонть медицинань профилень доброволецтнэ кармить важодеме од ёнксонть коряс – сон сюлмавозь кудосо сэредицятненень лекарстватнень явомаст марто. Ледстясынек, масторонь Президентэнть Владимир Путинэнь кармавтоманзо коряс, сеть сэредицятненень, конат лецявить кудосо терапевттнэнь вановтост ало, эрявикс лекарстватне максовить питневтеме. Кода тешкстызе МР-нь Здравоохранениянь министрась Олег Маркин, коронавирусонь инфекциясо сэредицятненень питневтеме лекарстватнень явомань лувось кемекстазь республикань Минздравонь те иень сундерьковонь 9-це чинь приказсонть.

«Кудосо лецявицятненень лекарстватне кармить явовомо питневтеме «коронавирусная инфекция» диагнозонть путомадонзо мейле, – тешкстызе министрась. – Сэредицянтень ковгак а эряви якамс. Участковой терапевтэсь сы кудос, сермады рецепт ды кедьс макссынзе препараттнэнь, конат эрявить лецямонть туртов».

Промксонть лувсо истя жо кортавсть кевкстематне, конат сюлмавозь ограничениятнень марто. Владимир Волков тешкстызе, редявить коламот. Республикань Прявтось ледстизе «Сити-парк» микшнемань куншкакуросонть аволь умок лисезь тевенть, зярдо тосо ютавтозель покш мероприятия заведениянтень вете иетнень топодеманть кувалма.

«Сити-паркось» таго лиятнеде явовсь, кармасть тешкстамо кенярксчить пандемиянть шкасто, пурнасть тов ламо эйкакшт, покш ломанть. Те мезе, самай ней эряви ютавтомс истят кенярксчить?» – ацирьгадсь Владимир Волков.

Саранск ошонь округонь прявтось Пётр Тултаев пачтясь: «Сити-парксо» коламотнень коряс материалтнэ маласо шкастонть пачтявить судс.

Владимир Волков кармавтсь виевгавтомс ванноманть санитарно-эпидемической вешематнень топавтомаст мельга. Истя жо поладомс ванноматнень такситнень важодемаст коряс, сынст лангс сеедьстэ пеняцить республикань эрицятне. Мордовиянь Прявтось истя жо тешкстызе, аволь весе топавтыть офисэнь 30% важодицятнень удалёнкас ютавтомадо вешеманть, васняяк, те кандови Саранск ошонтень. Пётр Тултаевнень кармавтозь топавтомс республикань Прявтонть Указонь те пунктонть. Теде башка, виевгавтомс важодеманть подъездтнэнь, микшнемань ды ломанень пурнавомань таркатнень санитарной обработканть коряс.

Мордовиянь Прявтось мерсь, паряк, улить кемекстазь од ограниченият коронавирусонь инфекциянть кувалма, ды кармавтсь республикань эрицятнень чарькодемс те тевень эрявиксчинть. Тень эйстэ ашти ломантнень эрямост ды шумбрачист. Промксонтень весе пурнавозтне састь ве мельс: тедеде а эряви ютавтомс од иень мероприятият, истя жо корпоративть. Республикань Прявтось башка тешкстызе, тень мельга эряви пштистэ ваномс.

 

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».