Декабрянь 6-це чистэ Республикань Кудосо ютавтовсь Равчирень федеральной округонь субъекттнэнь госвластень законодательной органтнэнь Ассоциациянь 74-це промксось.
Тосо ульнесть ПФО-со Россиянь Президентэнь полномочной представителесь Игорь Комаров, Мордовиянь Прявтось Артём Здунов, РФ-нь Федеральной Собраниянь Федерациянь Советэнь сенаторось Пётр Тултаев, МР-ва Прявт федеральной инспекторось Анатолий Гулин, регионтнэнь парламенттнэнь руководительтне. Вастовоманть ветясь ПФО-нь субъекттнэнь государственной властень законодательной органтнэнь Ассоциациянь координаторось, Нижегородской областень Законодательной Собраниянь председателесь Евгений Люлин. Пурнавозтне кортасть регионтнэсэ демографиянь мелявкстнэде, эйкакштнень чачомаст ламолгавтомань коряс тевтнеде, истя жо пробациянь ёнкссо субъекттнэнь важодемадост.
ПФО-со Россиянь Президентэнь полномочной представителесь тешкстызе округсонть демографиянь тевтнень вадрялгавтомань эрявиксчинть. Масторонь государственной политикась целанек аравтозь эрицятнень ванстомантень, эрямонть кувалгавтомантень, чачтоматнень ламолгавтомантень, ломантнень шумбрачист ванстомантень ды кемекстамонтень. Ломантнень эрямост вадрялгавтомась жо – Россиянь виевгавтомань национальной тевтнень ютксто васенцесь, сынст кемекстынзе масторонь Президентэсь маласо кемень иетнес.
«Тедеде прядови 2025 иес тешкстазь РФ-нь демографиянь политикань концепциянь мероприятиятнень топавтомась. Кемекстави од стратегия 2036 иенть самс. Ютазь недлястонть Россиянь Президентэсь кемекстынзе региононь прявттнэнь важодемантень питнень максомань од аравтоматнень. Сынст ютксо – чачтоматнень вейсэнь коэффициентэсь. Те аволь ансяк губернатортнэнь, истя жо региононь властень весе системанть важодемань невтевкс, – тешкстызе Игорь Комаров. – Сы иестэ нолдавить од нацпроектт – «Семья», «Молодежь и дети», «Продолжительная активная жизнь», «Новые технологии сбережения здоровья». Весе неть проекттнэс совавтовить чачтоматнень ламолгавтомань ды эйкакш марто семиятнень эрямост вадрялгавтомань коряс мероприятиятне».
Полпредэсь мерсь, вадря цётавкстнэнь туртов эряви лангс ливтемс тувталтнэнь, конатне путыть тешкс демографиянь тевтнень лангс, ламолгавтомс лезэнь кандыця практикатнень ды совавтомс эрямос од ёнкстнэнь.
Промксонтень пурнавозтненень пшкадемстэ, Артём Здунов тешкстызе, Ассоциациянь площадкатнесэ кортавить прявт кевкстематне. Сон домкасто ёвтнесь пробациянь коряс закононь топавтомань Мордовиянь опыттэнть. «Мелят минь тешкстынек вейсэнь важодемадо вейсладямо Чумондоматнень топавтомань федеральной службанть марто. Ведьгемень вейсладямот нолдазь тевс пробациянь субъекттнэнь, бизнесэнть, НКО-нть, общественной вейсэндявкстнэнь марто вейсэнь тевтееманть коряс. Улить ресоциализациянь, адаптациянь ды реабилитациянь башка программат, – мерсь Мордовиянь Прявтось. – Сехте прявтось – важодемань цётавксось: чумондозтне стить эрямонь виде кинть лангс, важодить, пурныть семият. Те иестэнть республикасонть максозь важодема тарка эрьва колмоце олякстомозентень. Программась важоди, сонзэ эряви ванномс-тонавтнемс, штобу саемс опытэнть. Эштё вейке прявт невтевксэсь – 16 проценттс зыянов тевтнень киртямось, конатнень топавтызь икеле судязь ломантне».
Ледстясынек, пробациясь – те сеть тевтне, конат аравтозь чумондозтнень социальной адаптациянтень. Ней сонзэ нолдыть тевс сетнень коряс, кить аштить олячинь саемань эли чумондомань топавтомань таркатнесэ, конат апак сюлмаво обществанть эйстэ изоляциянть марто. 2025 иень январень 1-це чистэ сон токасынзе сеть эрицятнень, конат олякстомтовить уголовно-исполнительной системань учреждениятнестэ.
ПФО-нь регионтнэсэ «О пробации в Российской Федерации» федеральной закононь топавтоманть коряс кортась Мордовиянь Госсобраниянь Председателесь Владимир Чибиркин: «Эрьва ие минек федеральной округонь регионтнэсэ олячинь саемань таркатнестэ нолдавить кементь тёжат чумондозеть, уголовно-исполнительной инспекциятнень учётсо аштить 50 тёжадо седе ламо ломанть. Пробациянтень васняяк понгить экономически-активной иесэ ломантне, конатнень ули возможностест пурнамс семия, кармамс тетякс-авакс. Пробациясь сынст туртов лезды кармамс обществань «шумбра» членэкс ды кандомс лезэ эсь масторонтень».
ПФО-нь субъекттнэнь государственной властень законодательной органтнэнь Ассоциациянь координаторось тешкстызе те ёнкссонть Мордовиянь важодемань покш уровененть. Сехте вадря невтевкстнэнь ютксто вейкесь – «Ромодановосахар» ООО-сь. Предприятиянь руководителесь Александр Атласов ёвтнесь важодемадонть. 2022 иестэ заводось кармась саеме важодеме икеле пекстазетнень. Те шканть перть 196 ломанть ютасть «Ромодановосахаронть» юрсо исправительной центранть трокс. Ломантненень пандови вадря зарплата, сыненст лездыть витемс эрямо таркань стакачитнень ды лия кевкстематнень.
Демографиянь мелявкстнэ кортавсть промксонь повесткань омбоце кевкстеманть лувсо. Артём Здунов тешкстызе: республиканть туртов те тевесь пек эрявикс.
Евгений Люлин тешкстызе, Ассоциациянть ламо решениянзо, конатнень ПФО-нь регионтнэ анокт ёвтамс федеральной законодательствас полавтоматнень совавтоманть туртов, – те эрямо таркатнень коряс кевкстематнень витемась, семиянь МФЦ-тнень теемась, социальной обслуживаниянь учреждениятнень одкстомтомась, вузтнэсэ авань ды эйкакшонь нупальтнень теемась.
Промкссонть яволявтозель сы иентень Ассоциациянь важодемань аравтлувось. Сыця промкстнэ ютавтовить Ульяновскойсэ, Пензасо, Оренбургсо ды Казаньсэ.
Мордовиянь ды Башкортостанонь парламенттнэнь руководительтне тешкстасть вейсэнь важодемадо вейсладямо.