Те иенть ушодовомсто Рузонь Православной Церьковань Саранскоень ды Мордовиянь епархиясь вейсэ Мордовия Республикань Журналистэнь вейсэндявксонть марто ютавтсть журналистэнь важодевксэнь коряс «От Пасхи до Троицы» регионъютконь конкурс. Икелепелев кемекстазельть 12 номинацият, сынст коряс важодевкст кучсть 110 журналистт. Те пелькстамосонть виест варчизь аволь ансяк минек республикань, истя жо Брянск ды Екатеринбург ошонь журналисттнэ.
Тешкстасынек, конкурсонь жюринть прявтсоль Саранский ды Мордовский Высокопреосвященнейшей митрополитэсь Зиновий. Конкурсонь комиссиянтень совасть: Мордовиянь Журналистэнь союзонь прявтось, «Рузаевские новости» медиахолдингень прявт редакторось Людмила Резяпкина, ВГТРК-нь ФГУП-нь ГТРК-нь филиалонь прявтось Наталья Грановская, Рузонь Православной Церьковань обществанть ды СМИ-тнень марто важодицясь Сергей Зеткин.
Июлень 20-це чистэ Саранскоень Иоанно-Богословской Макаровкань монастырьсэ теезельть итогтне ды ёвтазельть «От Пасхи до Троицы» журналистэнь конкурсонь изницятнень лемест, истя жо максозельть тенст казнеть.
Обед малав кезэрень монастырень паломнической центрань конференц-залонтень пурнавкшность Саранск ошонь ды республикань районтнэстэ сыця журналисттнэ.
Вастовоманть ушодовомадо икеле тов сыцятненень невтезельть сехте паро телесюжеттнэ, конатнень кочкизь жюрис совицятне. Седе тов озномань-баславамонь вельде ушодовсь мероприятиясь.
– Течи минек пурнымизь ояксчись, конась вейсэнди вейкетьстэ арсиця ломантнень. Минек вейсэнь тевенек – обществанть вивгавтомась ды паро эрямонтень бажамось. Тынк важодеманк – служамс христианской питнейчитнень ванстомантень. Важодевксэнк лангс тердтяно Пазонь баславамо. Минек вейсэ сатыть виенек топавтомс паро тевть, решамс ламо кевкстемат, – мерсь Саранский ды Мордовский митрополитэсь кенярксов вастовоманть ушодовомсто.
Конкурсонь изницятненень ды призёртнэнень ламо лембе валт ды превс путомат ёвтась Московонь инжесь, Церьковань обществанть ды СМИ-тнень марто важодемань Синодальной отделэнь прявтонь полавтыцясь Вахтанг Кипшидзе.
– Тынь тейтядо покш ды пек эрявикс тев, – пшкадсь сон журналисттнэнень. – Неень шкань медийной пространствась пешксе эрьва кодамо кулядо, сон васов аволь лезэв тынк важодемавтомадо, тынстеменк а изнявить информационной войнатне. Неень шкань обществасонть валонк пек покш виезэ. Минек паро валтнэ виевть манчематнеде, эдь сынст каршо аштить видечись ды Пазнэнь кемемась, – мерсь Вахтанг Владимирович.
Седе тов пурнавозтненень икельце вал марто пшкадекшнесь МР-нь Прявтонь Администрациянь ды МР-нь Правительствань руководителень полавтыцясь – МР-нь Прявтонь Пресс-службань руководителесь Елена Башкирцева. Сон тешкстызе те конкурсонтень журналисттнэнь ёндо мелень явоманть. Кода мерсь Елена Васильевна, эйсэнзэ виест варчизь минек СМИ-тнень малав весе представительтне: телевизионной колмонест каналтнэ, информагентстватне, республиканской ды районной газетатне, кода рузонь, истя жо тиринь кельсэ сёрмадыцятне.
Елена Башкирцевань вановтонзо коряс, пек паро, важодевкстнэнь анокстызь аволь ансяк умонь сёрмадыцятне, ютксост ламо од ломантькак. Сон тешкстась, весе топавтыть тевест седейшкава, лездыть изнямс зыянонь кандыця тевтнень.
Изницятненень истя жо поздоровт ёвтась МР-нь Журналистэнь союзонь прявтось Людмила Резяпкина. Сон седейшкава тешкстызе те конкурсонтень покш мелень явоманть аволь ансяк Мордовиянь творческой коллективтнень, истя жо Брянск ды Екатеринбург ошонь журналисттнэнь.
Людмила Николаевна лия пелькстамотнень ёвтынзе вейке-вейкень икельдямокс, те конкурсось жо, мекевлангт, вейсэндинзе ёроков сёрмадыцятнень минек масторонть ды духовно-нравственной питнейчитнень ванстомаст коряс.
Те чистэнть республикань колмонест телеканалтнэсэ важодицятненень явшезельть ламо казнеть эрьва кодамо номинациява.
Истя, «Телевизионная программа» номинациянть коряс изницякс лиссь «Мордовия» ВГТРК-нь корреспондентэсь Екатерина Евстигнеева «Духовный щит Отечества» ды «Фёдор Ушаков. Жизнь и подвиги святого праведного воина» фильматнень кисэ.
Васенце таркась максозь «10 канал» творческой коллективентень эрьва недлясто «В центре внимания» программанть нолдамонзо кисэ, косо ульнесть истят передачат, кода «Возрождение святыни», «В Пятине освятили новый храм», «Шесть веков у престола» ды лият.
Изницятнень юткс совась минек «Эрзянь правда» газетань общественно-политической отделэнь редакторось Валентина Юдина. Сонензэ максозь омбоце таркась «Материалы, посвящённые семейной тематике» номинациянть коряс.
Казнетнень максомадо мейле журналисттнэ вейсэ Зиновий Владыканть марто симсть чайде ды кортнесть неень шкань талновтыця кевкстематнеде.
Валентина КЕЧАЙКИНА