Четверг, июня 13, 2024
Важное

Те иень тунда республикань ды масторонь келес содавикс Ардатовской светотехнической заводось тешкстызе 75 иень юбилеензэ. Самай сестэ те предприятиясонть улемстэ сельмезэнек каявсть сонзэ территориясо озавтозь мазый ды покш кузтнэ. Кизэнь опаня читнестэ сынст ало паро оймсемс, тельня сынь кенярдовтыть сельме мазый пиже тюссост. Кевкстеманок лангс, кие тезэнь озавтынзе неть мазыйкатнень, тенек пачтясть, минек заводонь сехте умонь ды пингень перть тесэ парсте важодицясь, технической наукань кандидатось Виктор Васильевич Бармин. Сонзэ марто содавиксэкс теевемс лездась «АСТЗ» ОАО-нь прявтось Григорий Аверьянов.



…Обедэнь юткошкадонть мейле заводонь территорияванть каршонок апак капша юты аволь пек сэрей, шержей черь цёра. Лангозонок пштистэ варштамодо мейле тердимизь эсензэ кабинетс кортнеме, конась аламодо моли вишка музей ёнов. Васенце документэсь, конань рединек сонзэ кабинетстэ, те ульнесь эчке, книгань кондямо покш папкась.
Кода мерсь Виктор Васильевич, сон тов кармась пурнамо аволь ансяк эсензэ ледстнеманзо (те предприятиясонть важоди кодгемень вете иеть), истя жо те заводонть сехте а стувтовиця событиятнень.

Эйкакшчинь ледстнематне

Виктор Бармин чачсь 1940 иестэ Ковылкинань райононь Самаевка велесэ, ламо эйкакшонь триця семиясо. Иень ютазь ушодовсь Ине Отечественной войнась, тетяст саизь фронтов. Зяро сельведть авазо валсь 1943 иестэ, кода сась мирдензэ ды тетяст маштовомадо кажов кулясь. Колмонест эйкакштнень (Виктор Васильевичень ульнесть эштё кавто сазоронзо) аваст кастынзе ськамонзо.

Эйкакш пингень ледстнематнестэ те шкас эзть стувтово, кода стакаль аваст туртов. Валскестэ саезь важодсь колхозсо, эштё муиль шка кирдемс кардазпотмо ракшат, анокстамс тенст тикше. Эдь скалтомо, ловсовтомо се шкане авольть кастово эйкакштне. Стакачитнень лангс апак вано, Виктор цёрынест прядсь сисем класст, теке марто свал лездась аванстэнь кудоютконь тевтнень топавтомсто.
Сисем класстнэнь прядомадо мейле сон сайсь мель поладомс тонавтнеманзо, авазо ды сазортнэ каршо эзть моле. Истя велень овсе од цёрынесь тусь Рязань ошов.
– Се шкане Рязанень электровакуумной техникумось икеле молицятнень ютксоль, – пачтясь Виктор Васильевич. – Тосо мик стипендияськак ульнесь ков седе покш минек республикасо тонавтнемань высшей заведениянть коряс. Монь туртов те кевкстемась аволь меельце таркасоль, эдь эрявсь лездамс семиянтень. Теке шкасто мелезэнь пек тукшнось кочказь специальностесь. Монськак эштё сестэ эзинь чарькоде, кода тень вечкевсь техника марто важодемась. Тонавтнемань ниле иетне ютасть пек куроксто.

Вана од специалистэсь дипломонзо марто сась совнархозов. Сонзэ лембестэ вастызь кадрань отделсэ. Апак учо кевкстизь: «Ули мелеть молемс важодеме Орданьбуе ошов? Вейксэ иеде икеле тосо панжсть од завод». Виде, сестэ сон те таркасонть вестькак арасель, истя жо эзь сода, кодат тевть сонзэ учить икелепелев. Нать, одсто минь весе вейкетяно, кувать апак арсе сыргатано тов, ков эйсэнек кучить. Вана истя весть кочказь тевесь кармась тензэ цела пингень важодемакс.

Арсемазо топавтовсь

Кевкстеманок, кода ушодовсь Виктор Барминэнь важодемань кизэ предприятиясонть, марявсь, сонзэ кармавтызе чопавтемс се умонь шкантень.
– Ледстневи, веньперть валсь пиземе, валскесь жо манеель, – ёвтни Виктор Васильевич. – Орданьбуев сыргинь рейсовой автобуссо. Тургеневась тень марявсь велекс, косо а покшке кудотнень перька ульнесть ламо садпиреть. Се таркасонть, косо ней ашти предприятиянок, сестэ истя жо ульнесть эмежпиреть. Ве ёно аштесь вете этажсо здания, маласонзо рединь ванстыця. Кевкстемам лангс, косто муемс заводонь прявттнэнь, сон невтсь тень аволь васоло ГАЗ-63 автомобиленть лангс, конань ванкшность кавто цёрат. Сыненст васняяк пшкадинь важодемань коряс, лангозон варштамодо мейле кавонест невтсть тень вете этажсо зданиянть лангс, келя, тосо ули кадрань отдел. Ансяк мейле карминь содамо, неть цёратне ульнесть заводонь прявтось, Социалистической Трудонь Героесь Иван Семёнович Коваленко ды се шкань главной инженерэсь Николай Владимирович Горин. Сестэ сынь ванкшность-тонавтнесть од техниканть, конась сась тенст заводов. Николай Владимирович истя жо шкань ютазь кармась те предприятиянть прявтокс.
Се шкане заводоуправлениянть башка тарказо арасель, Ратор леенть чиресэ аштесть вете этажсо ды маласонзо кавто этажсо зданиятне. Весе заводось стявтовсь ведьгевень корпусонть юрсо. Се шкане предприятиянть путомадо документэнть кемекстызе сонсь Иосиф Сталин, – каштансто пачтясь Виктор Васильевич.
Од специалистэнть васня саизь технологонь тевенть топавтомо, седе тов ладизь инженерэкс-конструкторокс, шкань ютазь – главной конструкторокс, главной инженерэнь полавтыцякс, главной инженерэкс ды истя кассь технической директорокс. Нурькинестэ, ютынзе служебной весе кузтематнень.

Предприятиясь теевсь сонзэ эрямонь пельксэкс

– Монень аволь весть мерекшнесть улемс предприятиянть прявтокс, – видькстась Виктор Бармин. – Каршост свал мерилинь, те аволь монь. Весе шкатнестэ седе малавикс тень ульнесь технической важодемась. Покш мельспаросо ледстнян 1959 иенть, зярдо тешкставсь заводонтень кемень иетнень топодемась. Арседе тынсь, се шкастонть велесэ предприятиясонть важодсть тёжадо ламо ломанть, иезэнзэ нолдавсть колмо миллионт светильникть. Торжественной промкссонть прявттнэнь ютксто кортыцятнеде ульнесть пек ламо. Монень, кода од специалистэнтень, истя жо макссть вал. Виде, неень шкане а ледстявить, мезде сестэ кортынь, а вана меельце валтнэ эзть стувтово. Сестэ ёвтыя мелем седе, минек поколениясь важодевель истя, штобу предприятиясь теевель содавиксэкс аволь ансяк Мордовиясо – масторонь келес. Покш каштанчисэ аштян мелень топавтоманть коряс. 2005 иестэ, кода лоткинь важодеме технической директорокс, алкукскак минек предприятиясь теевсь Россиянь светотехнической сехте покш предприятиякс. Ули мезень коряс аштемс каштанчисэ.
Виктор Бармин пингень перть тонавтни ды бажи содамс весе одонть, мезесь сюлмавозь сонзэ тевенть марто. Заводсонть арась вейкеяк продукция, конань коряс сон эзь тейне разработкат. Улить ламо чуросто вастневицят, сондензэ икеле вейкеяк предприятия сынст эзь нолда. Теде кортыть весе сеть патенттнэ, конат мазылгавтыть важодемань кабинетэнь стенатнень. Предприятиясонть сон васенцекс кармась наукань кандидатокс.
Эсь шкастонзо Виктор Васильевичень аволь ансяк предприятиянь прявтонь тевентень кармавтсть, советской шкатнестэ тердсть эйсэнзэ улемс прявт конструкторокс ламо ошка.
– Ансяк весе неть паро таркатнеде отказынь, – мерсь Виктор Васильевич. – Кода кортыть, нолдынь тесэ ундоксон ды лия таркадо тунь эзинь арсеяк.
Виктор Васильевичень валонзо коряс, сехте стакакс ульнесть вейксэньгеменце иетне. Масторсонок тевтнень одс ладявомань иетнестэ ломантненень кувать эзть пандо зарплата. Те предприятиясонть, кода масторонь ды республикань ламо заводтнэсэ, ярмаконь таркас макссть продукция. Кода мерсь Виктор Бармин, сынь сеть шкатненьгак цидярдызь. Эдь ламо предприятият сестэ аволь ансяк пекставсть, допрок лоткасть нолдамо сень, мезесь ульнесь пек эрявиксэкс. Светотехникась жо ванстовсь, сатотсть вийть, содамочить сонзэ ладямс лия лувсо ды нолдамс се продукциянть, конась кармась эрявиксэкс.
Эдь советской шкатнестэ эрьва предприятиянтень вешематне казямольть. Невтемакс, заводонтень меревсь теемс ансяк истят валдомтыця приборт, конат тевс нолдавсть промышленной предприятиятнесэ производственной помещениятнень валдомтомга. Кода содатано, сеть иетнестэ виевгавтовсь промышленностесь, стявтовсть ламо од заводт ды фабрикат. Тень ловозь, сынст продукциясь весенень эрявиксэль.

Орданьбуесь теевсь чачомань од таркакс

Виктор Барминнэнь Орданьбуесь теевсь пингень перть вечкевикс эрямо таркакс, тестэ сон вастызе нинзэ, тесэ чачсть-кассть кавто цёранзо. Кавонест поладызь тетяст тевенть. Эрямост сюлмизь светотехниканть марто. Теке шкасто сон зярдояк эзинзе стувтне раськензэ-малавиксэнзэ. Стака шкасто саизе эстензэ эрямо аванзо, калмизе жо тиринь велес, сазоронзо ваксс. Нейгак покш читнестэ эрси чачома таркасонзо.
Виктор Васильевич ламо иень перть вешнесь тетянзо, Ине Отечественной войнасо кулявтомо ёмазенть. Шкань ютазь муизе Белоруссиясто, сон тосо маштовсь ды калмазь братской калмазырьс.
Нать, сеть ломантненень, кить а стувтнить ундоксост, кить пингень перть бажить теемс ламо паро тевть, Пазось максы кувака ды уцяскав эрямо. Истятнэнь ютксо Виктор Бармингак.
Неень шкане, удалов варштазь, сон ашти покш мельспаросо заводонь ды масторонь ламо событиятнень, вечкевикс предприятиянтень лезэнь кандомань, отечественной светотехнической промышленностентень путовксонзо кувалма.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».