Полина Николаевна Удельнова (тейтерьксэнь фамилиязо Фадеева) чачсь Покш Березникень райононь Шугурова велесэ 1932 иень февралень 24-це чистэ ламо эйкакшонь триця семиясо.
Поля ульнесь нилеце эйкакшокс. Войнань ды войнадо мейлень стакачитнень лангс апак вано, эйкакштне весе прядсть школа, колмотне жо эйстэст прядсть университет.
Полина Николаевна тонавтнесь М.Е. Евсевьев лемсэ МГПИ-нь химиянь-биологиянь факультетсэ. Институтонть прядомадо мейле вейке ие важодсь Инсаронь райононь Шадымо-Рыскино велесэ. Мейле мирдензэ Иван Удельнов марто тусть Томской областев. Тосо 1957 иестэ чачсь васенце эйкакшост – Светлана. Ансяк седеесь эзь ойма ды свал тердсь эйсэст тиринь велев. Шугуровав велявтомадо мейле сынст чачсь Сергей цёраст. Ансяк од ломантнень вейсэнь эрямонь уцяскаст ульнесь аволь кувать. 1962 иестэ 28 иесэ кулы Полина Николаевнань мирдезэ ды сон кадовсь кавто вишка эйкакш марто ськамонзо.
Ков туят, нать, истямо сонзэ уцясказо. Стакачитнень лангс апак вано, сон эзинзе нолда кедензэ. Кавтонь кис савсь тензэ важодемс. Весе содатано, кодамо стака учителень канстось. Уроктнеде мейле кудосояк эрявсь ламо важодемс: тетрадть проверямс, сы уроктнес теемс плант. А теде башка, кудоютконь ламо тевть: эйкакштненень пидема-панема, мельгаст муськема, урокост проверямат. Кардазсо – ракшат, пиресэ – эмежть... Ды весе тень эрявсь кенеремс тееме. Превскак а саеви, кода сон цидярдсь? Ансяк мезеяк лангс апак вано, шкась ливтязь ливти. Вейке омбоце мельга эйкакштне сырнень медаль марто прядызь школаст, тусть ошов тонавтнеме. Кавонест прядсть медицинань факультет. Пингест перть важодить врачокс.
1976 иень сентябрянь 1-це чи. Минь, начальной школанть прядомадо мейле, сынек средней школав. Школась ульнесь од, колмо этажсо. Класстнэ покшт, валдот. Миненек марявсь, понгинек кодамо-бути ёвксос. Тесэ вастымизь ёлганя, раужо черь, чевте мизолкс марто мазый од ава. «Шумбрачи, эйкакшт! Теевтяно содавиксэкс. Мон тынк классной руководителенк. Лемем – Полина Николаевна», – пшкадсь тенек чевте вайгельсэ.
Полина Николаевна пек вадрясто содылинзе эсензэ предметтнэнь: химиянть ды биологиянть, конатнень тонавтсь аволь ансяк минек классонь, лия классонь тонавтницятнененьгак. Сон толковиль истя, буто пряпотмозот путозь путыль уроконь тематнень. А кода парсте химиянь уроксто невтниль тенек опыттнэнь… Мерят, теке фокусник. Кургонь автезь ванынек тень мельга.
Теде башка, сон ульнесь алкуксонь классной руководителекс, ды а маняван, бути мерян, классной авакс. Сон минек марто ютавтсь пек ламо шка. Уроктнеде башка якинек эрьва кодамо кружоков, секцияв. Участвовинек эрьва кодамо концертсэ, конкурссо-смотрасо. Сайнинек васенце таркат. Сон тонавтсь эйсэнек эрьва мезес: пидеме-панеме, эмежень озавтомо-кастомо, эмежпире мельга якамо. Миненек сатотсь покш класс, химиянь кабинет. Полина Николаевна мельга кемекстазель школань эмежпиресь, ды секс эрьва тунда минек классонь вальмалангтне пешксельть росада марто ящикте. Минь сынст валнылинек, кастылинек, мейле озавтылинек эмежпирес ды мельгаст якинек кизэнь каникулатнестэ.
Тундонь ды сёксень маней шкатнестэ свал сайнилимизь вирев экскурсияв. Пек ламо ёвтнесь вирьсэ, паксясо касовкстнэде. Мейле цёрынькатне кундсильть калт ды пидилинек штюрьба. Сон лисиль истямо тантеекс! Те шкас танстесь кадовсь кургопотмозонок!
Мельсэнь ашти, зярдо карминек седе покшокс (16-17 иеть), сон минек, тейтерькатнень марто ютавтсь пек ламо кортамот вечкемадо. Эдь те шкастонть пек ламо цёрынькатнень ды тейтерькатнень ютксо кирвазекшнить вечкемань сяткинеть. Неть кортнематнестэ пек ламо мезе саинек эсенек пряпотс. Сон тонавтымизь эрямо ояксчисэ, школань прядомадо мейлеяк а стувтнемс вейке-вейкенек.
Полина Николаевна корязонок свал аштесь каштанчисэ. Минь сонзэ кунсолынек, топавтынек весе кармавтоманзо. Вейкеденть башка – сон свал кармавтыль тенек: «Кулан, садо калмамон». Те кармавтоманть минь эзинек топавто. Теньсэ, нама, ламова чумось те апаро ормась, ковидэсь.
Полина Николаевна тусь эрямосто 2021 иень январень 17-це чистэ. Течи, февралень 25-це чистэ кармить ниленьгемень чить, кода сон арась мартонок.
Полина Николаевна, нолдыть чумонок! Тон минек седейтнес свал кадоват сехте вадря Тонавтыцякс, Тонавтыцякс покш буквасто! Сюкпря теть паро тонавтомат, миненек покш мелень явомат кис. Кадык Пазось аноксты теть паро тарка!
Шугуровань средней школань 1983 иень прядыцятне