Четверг, марта 28, 2024
Важное

ДТ-74 ЛЕГЕНДАРНОЙ ТРАКТОРОНТЬ ИСТОРИЯЗО


Весе содасызь «Калина красная» советской фильманть, косо Василий Шукшин сокась мода «ДТ-54» тракторсонть. «ДТ-74» тракторось – те сонзэ вишка ялаксозо эли седе паролгавтозь поладовксозо. Неть трактортнэ советской шкасто ламо фильмасо снимсевсть, сынь ульнесть се шкань велень хозяйстватнесэ сехте «важодиця лишмекс», лиякс меремс, сынь полавтызьгак лишметнень, макссть тенст оймсемань уцяска.

«ДТ-54» тракторсонть Оренбургонь ёнксонь «Комсомольский» совхозсонть сокась пакся Леонид Харитонов актёрось «Иван Бровкин на целине» кинонть снимамсто. «Дело было в Пенькове» фильмасонть Матвей Морозов (актёрось Вячеслав Тихонов) ды Зефиров (актёрось Юрий Медведев) кавто «ДТ-54» тракторсо ютавтсть канатонь ускомань пелькстамо, косо ванызь, кинь жо тракторозо седе виев. Ды истят фильматнеде, косо неть трактортнэ ульнесть прявт героекс, лововить зярыя. А стяко Россиянть келес «ДТ-54» тракторонтень ды советской шкань лия техникантень путозь малав ведьгеменьшка памятникть, кода сынст нолдыця заводтнэсэ, истя жо велень хозяйстватнесэ.
«МАПО и К» ТНВ-нь прявтось Николай Всеволодович Ютяев истямо памятник путсь Малые Березники веленть тракторонь парконтень совамсто «ГАЗ-52» автомобилентень. Васолдо неяви те «трудягась», кона усксь эсензэ кузовсо зярыя миллионт тоннат сюро ды ней оймси постамент лангсо, пенсиясо. Васолдо неяви Ромодановав килангованть ардомсто, икелень шофёртнэ сонзэ вакска ютамсто ледстнить эрьвась эсензэ историянзо, конась сюлмавозь те машинанть марто.

Истямо жо памятник арсекшни предприятиянь прявтось стявтомс «ДТ-74» легендарной тракторонтеньгак Пятина веленть МТП-нть ваксс. Ансяк «кшнинь лишменть» арасель мелезэ прядомс эрямонзо кеврунгокс ды ней сонзэ лия историязо, конадонть, арсетяно, мелявтовольть бу весе трактортнэ. «ДТ-74» тракторось, конантень уш ниленьгеменде ламо иеть, ней содавикс весе республиканть келес, сон сонсь ардтни выставкатнес, соки пакся республикань пелькстамотнесэ ды а максы пря неень шкань трактортнэнень. Истя, ютазь кизна невтизе прянзо ды виензэ Горяйновкань паксятнесэ 2019 иень Весероссиянь сокамонь чемпионатсонть, седе икеле ардтнесь Паксянь читнес.
Аволь умок минек корреспонденттнэ якасть те хозяйствантень инжекс ды содавтызь «ДТ-74» тракторонть. Сонзэ кувака пингень историядонзо тенек ёвтнесь Юрий Александрович Кемкин, «МАПО и К» ТНВ-нь прявт инженерэсь, кона кемевтимизь, келя, тракторонть туртовгак вешневи ды анокстави паро тарка. Зярдо эряви, сон тосто карми ардтнеме прянзо невтнеме.

Валонзо коряс, те тракторонть велень хозяйствань предприятиясь рамизе сонзэ икелень азоронзо, механикенть Н.В.Камакинэнь кедьстэ. Тонась ламо иеть важодсь эйсэнзэ, мейле пенсияв лисемадо мейле «ялганзо» мельга пек эзь вано, ды тракторось аштесь тикше потсо кудо икеле. Ансяк миемс сонзэ кедезэ эзь кепедеве. Миезель сон азоронзо куломадо мейле колмошка иень ютазь.

Тракторонть савсь парсте витнемс: двигателенть, удалце мостонть, карданонть ладсизь-теизь од запчастьстэ, озамо тарканть вельтизь дермантинсэ. Тракторонть кадовсть эсензэ корпусозо, радиаторозо, гусеницанзо, купе ладсо панжовиця кенкшензэ, кода ней мерить, кондиционерэзэ. Те – кабинань крышасо панжовиця варине, косто тракторонть кабинас сови ванькс кошт. Од эрямо тензэ макссь сырнень кедь мастерэсь-механизаторось А.А.Потапов, кона тусь тетянзо-бульдозеристэнть киява. Тракторонть теемадо икеле Потапов эсензэ кедьсэ пурнызе «ДТ-74» тракторонть, конасонть мелявкстомо соки мода ды види сюро, секскак опытэзэ ульнесь покш. Ней А.А.Потапов ловови «ДТ-74» тракторонть кисэ ответственной ломанекс, кона аволь ансяк ваны мельганзо, истя жо ардтни эйсэнзэ весе покш мероприятиятнес. Тракторось кедензэ ало цитнезевсь. Рамазель тензэ Отяжелестэ ПЛП-4-35 алкуксонь сока, конасонть сон роботась 80-це иетнестэ, ансяк а саты сокицянтень кшнинь озамка. Максозель тракторонтень башка номергак: «3423 МЧ». Тракторонть кабинань «судонть» прясо парсте неяви «ХТЗ» сёрмадовксось, те корты седе, сон теезь Харьков ошсо.

Нама, те тракторось ней теевсь раритетэкс ды мельстуиця экспонатокс. Зярдо сон лиси ломань юткс, ванномонзо, токшемензэ, вакссонзо снимавтнеме сакшныть пек ламо ломанть. Эйкакштне мельспаросо кузнить ланганзо, ды сон, теке сыре бодя, састыне нувси ды, нать, неи онт од порадонзо ды певтеме паксятнеде, конатнень савсь сокамс кувака пингензэ перть.

Анокстызе Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».