«Мордовия Арена» стадионсо ютавтовсь «С заботой о защитниках и их семьях» специализированной покш семинар, конась аравтозь специальной военной операциянь ветерантнэнень социальной лезксэнь явомань вадрячинь кастомантень.
Мероприятиясь, конась пурназель «Знание» Россиянь вейсэндявксонь Знание.Государство проектэнть лувсо ПФО-со РФ-нь Президентэнь полномочной представителень Аппаратонть ды Мордовия Республикань Правительстванть лезксэст вельде, вейсэндинзе региононь профильной малав 120 специалисттнэнь. Панжомань церемониясонть ульнесть Мордовиянь Правительствань Председателень Васенце полавтыцясь Галина Лотванова ды МР-ва «Защитники Отечества» Государственной фондонь филиалонь руководителесь Алексей Герасименко.
Галина Лотванова тешкстызе те тевенть лия енов амолемачинзэ ды мерсь, истямо семинарось республикасонть ютавтови васенцеде: «Минек прявт тевенек – служамс СВО-нь боецтнэнень. Невтемакс минек туртов аштить Россиянь Президентэсь Владимир Путин ды минек республикань Прявтось Артем Здунов, конат явить покш мель геройтненень лездамонтень», – пшкадсь участниктненень МР-нь Правительствань вице-премьерэсь ды тешкстызе эрьва сотрудникенть, кона важоди ветерантнэнь ды геройтнень семиятнень марто, покш путовксонзо.
Мордовиясо неень шкасто учетсо аштить СВО-нь 750 ламо демобилизованной участникть, малав колмоце пельксэнть эйстэст ули инвалидностест. Семинаронть лувсо тешкстазь важодемань прявт енкстнэ, истят, кода медицинань вадря лезксэнь, санаторно-курортной лецямонь ды психологической лезксэнь явомась, инвалидность марто ветерантнэнь туртов кудотнень перька таркатнень теемасо муниципалитеттнэнь лезксэсь ды важодемань занятостесь. Течинь чинтень пачтямотнень коряс, 567 ванстыцятненень (75% вейсэнь числадонть) уш максозь важодема таркат.
Прявт кевкстемась – те геройтнень социализациясь: общественной мероприятиятнес сынст совавтомась ды эйкакшост туртов оймсемань ладямось. «Защитники Отечества» Госфондонь центральной аппаратонть марто вейсэ кортави од отделениятнень панжомадо: Краснослободскойсэ (маласо районтнэнь обслуживаниянть туртов) ды Саранскоень Октябрьской районсо (Лямбирской ды Кочкуровской районтнэнь туртов).
«Защитники Отечества» Госфондонь филиалонь руководителесь Алексей Герасименко ледстинзе РФ-нь Президентэнть валонзо: СВО-нь ветерантнэ – те масторонь од элита. «99 % кевкстематне, конатнень путсть минек боецтнэ, уш витезь. Минь бажатано сенень, штобу эрьва ветеранонтень весе услугатне максовольть «вейке вальмань» лувсо межведомственной вейсэнь важодеманть вельде. Тень туртов фондось нолдась тевс «Защитники Отечества» государственной информационной система, конась ней панжадо весе министерстватнень ды муниципалитеттнэнь туртов. Те лезды явомс адресной лезкс куроксто ды вадрясто», – тешкстась Алексей Герасименко.
Семинаронь просветительской программантень совасть лекцият ды «Знание» Россиянь вейсэндявксонь федеральной эксперттнэнь ды лектортнэнь пельде мастер-класст.