2026 иестэ саезь специальной военной операциянь ветерантнэнь туртов келейгавтозь лезксэнь максомань енкстнэ Россиянь Социальной фондонь реабилитационной центратнес реабилитацияс ды санаторно-курортной лечамонь туртов ардомань питненть пандомга. Ней Мордовиясто СВО-нь демобилизованной участниктненень мереви саемс региональной Соцфондонь отделениясто электронной талонт лецямонь таркантень ды мекев кудов питневтеме ардоманть кис.

Ардомань питненть кис истямо пандомась вейсэндяви неень шкансентень, зярдо СВО-нь ветеранось сонсь пандсы ардомань питненть эсензэ ярмакто, седе тов Соцфондось неть ярмактнень тензэ одов велявтсынзе. Од енксонть вельде жо а эряви ютавтомс эсеть ярмакот ды седе тов пшкалемс одс сынст велявтомга.

Эряви меремс, пандомань истямо енксось тевс нолдави ансяк 2026 иестэнть саезь.

Неень шкасто васенце группань инвалидность марто СВО-нь ветерантнэнень мереви ардомс фондонь реабилитационной центратнес ильтиця ломань марто. Неть ломантнень кис истя жо пандови ардома питнесь.

Ледстясынек, 2025 иестэнть саезь специальной военной операциянь ветерантнэнень питневтеме мереви ютамс медицинань реабилитация ды санаторно-курортной лечамо Россиянь Социальной фондонь 12 реабилитационной центратнестэ куш кодамосонть. Здравницатнесэ ули шумбрачинь витемга весе эрявикс неень шкань оборудования.

Мордовиява Социальной фондонь Отделениясь башка лезды СВО-нь эрьва участникентень – лечамонь туртов документэнь пурнамосто саезь кудов самозонзо.

СВО-нь ветерантнэнень реабилитациянь ютамга яволявтоманть мереви максомс госуслугань порталонть вельде эли фондонь региональной Отделениянь куш кодамо клиентской службасо.