Эйдесь чачи ды васенце валозо карми улеме «авай». Арась истямо ломань, кинь туртов те валось улевель асодавикс ды авечкевикс.

А стяко эрямонок перть – кенярксчистэяк, стакачистэяк – васняяк пшкалетяно чачтыцянок туртов. Содатано, шкинень аванок зярдояк а кадсамизь берянь шкасто ды весе седеест ды эрямост анокт максомс эсест эйдест туртов.

Ансяк вана сатышкасто-аволь пандтано аванок туртов весе сень кисэ, мезе сон тейсь минек трямсто-кастомсто, зяро апак удо веть печтясь, зяро стакачить цидярдсь, зяро мелявкст-апарот ютасть пряванзо? Ды эрьвась эйстэнек ойме потмакссонзо ялатеке муи ламо мезе, мезенть кис карми марямо прянзо чумокс аванзо икеле. Те, улема, секс: тиринь аванок парозо а пандови мейсэяк. Ды сон, паряк, паронь пандома а вешияк. Эрьва авась весемеде уцяскавокс прянзо марясы ансяк сестэ, зярдо шумбрат эйдензэ-какшонзо, зярдо сынь кассть паро ломанекс. Ды эрьва аванть туртов весемеде покш ды питней казнекс кармить улеме лембе ды чевте валтнэ, конатнень сон марясынзе эсензэ эйдензэ пельде.



Лембе валсо аванзо ледстни МР-нь раськень шкинемань кудосо важодицясь Н.П. Родионоваяк. Надежда Петровна а лоткси сюконямодо аванстэнь весе се паронть кисэ, кона сась тензэ аванзо пельде. А стяко шкинень аванзо портретэнть кирди кудосо сехте неявома таркасо. Вана кода ледстни сехте вечкема ломанденть – тиринь авадонзо:
«Монь авам – Шуляева Елизавета Леонтьевна – чачсь-кассь Сурвелесэ. Тейтерькс кандтнесь Трошина фамилиянть. Куш биологической фамилиязо Пивкина. Покштянзо аванть кавто эйде марто Перьмезьстэ ускизе Сурвелев Трошин Фёдор Никифорович омбоце козяйкакс ды максызе тенст эсензэ Трошин фамилиянть.

Елизавета Леонтьевна чачсь 1929 иень умарьковонь 13-це чистэ кудораськесэст котоце эйкакшокс. Касома шказо пек стакаль. Ёвтнеманзо коряс, пекень пешкедеманть кис ламо савсь важодемс ломань кедьгаяк: модамарень путомань шкасто чинь-чоп чупонемс роднянь-раськень, шабрань кедьга.

Авам кассь-кепететсь пек мазый тейтерькс. Кевейксэе иесэ лиссь мирденень эсензэ велень цёра экшс, конань марто эрямсто чачтсь-кастсь кото эйкакшт. Пенсияв лисемадо икеле важодсь Сурвелень содавикс пухонь-толгань фабрикасо. Авам ульнесь чевте седей, видечинь вечкиця. Стака ормась эрямонзо сезизе 59 иесэ».
Аванзо куломадо мейле ютасть уш ламо иеть. Тень лангс апак вано, Надя тейтерезэ, кона сонськак умок уш теевсь авакс ды сырькаекс, нейгак а стувтни тиринь аванзо, свал ледстни эйсэнзэ, кирди мельсэнзэ. Стака шкасто, зярдо седейс чии аёвтавияк кодамо апаро ды ойментень тюк сакшны, Надежда Петровна эсь прянь оймавтомо сакшны калмолангов аванзо марто кортнеме, потмовалонь чамдомо. Те корты вейкеде: зяро иеть тенек илязт топоде, тиринь аванок свал карми минек седейсэ. Тыньгак, вечкевикс ловныцят, илядо стувтне эсенк аванк!

Весе минь тонадынек аватненень алтазь покш чикс ловомс эйзюрковонь (мартонь) 8-це чинть. Ды, паряк, нейгак аволь весе содасызь: ули эштё вейке покш чи, кона сюлмавозь тиринь аванок марто. Лия таркава сонзэ тешкстамо кармасть зярыя пингеде теде икеле. Ламо омбо мастортнэсэ сонзэ вастыть панжиковсто. Минек масторсо те иланть кармасть тешкстамо 1998 иестэ саезь Россиянь се шкань Президентэнть Б.Н. Ельцинэнь Указонзо коряс (1998 иень январень 30-це чи) сундерьковонь меельце недлячистэ. Те чистэнть поздоровт ды седейстэ молиця лембе валт ёвтыть эйдень триця ды пешксесэ аватненень. Теевсь коекс Авань чиденть икеле таргостонть ютавтнемс «Авай, мон тонь вечктян!» акция. Од ломантне почтава кучнить открыткат эсест аваст туртов эли сакшныть кудов казне марто. Казнекс – налкшке – чевте коцтсто стазь овто левкске ды цецят, эрзякс тенст мерить озязонь вишпилят (сэнь цецинеть), рузокс – незабудкат. Кортыть, неть цецятнень эйсэ ине вий. Сынь «маштыть» одов панжомс сеть ломантнень седеест, кить стувтызь эсест шкинень аваст ды малавиксэст. Кой-кона оштнесэ истят налкшкеть ды цецят казнить волонтёртнэ вакскаст ютыця весе аватненень. Истямо ладсо арсить кадомс паро ледстнемат те покш чиденть.

Раиса Щанкина