Воскресенье, июля 21, 2024
Важное

Эрьва ломаненть масторлангсо ули малавикс, валдо ды мазый тарказо, косо сон марясы прянзо сехте уцяскавокс – те тиринь ёнксозо, конась сехте вечкевикс тарка эрьванть эрямосо. Ансяк ламот юткстонок капшить туеме тиринь таркатнестэ, бути эрить велесэ – эйсэст мани ошось, нама, эрси мекевлангткак, ломанесь а капши ковгак туемс чачома моданзо лангсто, кадови эрямо тоско.

Ды чиде-чис бажи аволь ансяк эсензэ туртов вадрялгавтомс эрямонть, теи истя, штобу перьканзо ломантнененьгак улевель паро. Истятнэнь ютксо Отяжелень райононь Сабанцеле велень прявтось Василий Петрович Сидоров. Минек газетась уш аволь васенцеде ёвтни ловныцятненень сонзэ эрямонь-важодемань тевдензэ. Содатано, те ломанесь пек дока ды тевензэ вадрясто содыця прявт, чевте седей цёра, паро мирде ды вечкевикс тетя.

Ледстясынек, Василий Петрович прявтонь тевтнень ушодсь топавтомо 2018 иестэ саезь. Козяйказо, Анастасия Гавриловна – «Атяшевский Дом народного творчества» МБУ-нь тонавтыця, викшнемань, кодамонь, стамонь кружоконь ветиця. Мирдть-нить трить-кастыть кавто мазыйка тейтерькат. Покшось тонавтни Сабанцелень школань 2-це классо, веженсесь яки эйдень кужов. Сидоровтнень семиясь бажи эсест лангсо невтемс, што улить истят од ломанть, конат кадовить эрямо тиринь велес, стявтыть кудо, чачтыть эйкакшт, муить чачома ёнкссо вадря важодема таркат ды эрить ошонь эрицятнеде а седе беряньстэ.

– Чачома велесэ важодемась моли седе шождасто. Ули истямо содавикс валмеревкс: «Тиринь кудосо стенатнеяк лездыть». Лисни, моньгак истя. Велень ломантне эрьва тевсэ анокт лездамс. Пек покш сюкпря «Сабанчеевское» ОАО-нь прявтонтень Дмитрий Николаевич Игушкиннэнь, кона путы покш вийть тиринь веленть виевгавтомга-мазылгавтомга. Мейсэ эряви сон свал лезды эсензэ хозяйствань ломантненень. Истя жо тешкстаса Николай Николаевич Фёдоровонь, сонгак васенце лездыцятнень ютксо. Содазь, тиринь велесэ минь весе аштетяно вейке-вейкенек кисэ!» – тешксты Василий Петрович.
Эряви меремс, Сабанцелень велень поселениянть юрс совить зярыя велеть: Таразбуе, Дюрькина, Пумбра, Манадышка, Паранеи ды Смирновка (неень шкасто тосо кадовсь вейке эриця) велетне. Василий Петровичень вановт ало аволь аламо ломанть. Эрьва велень эрицянть энялдоманзо лангс муи шка, свал лезды.

Тешкстасынек, масторонь Президентэнть Владимир Владимирович Путинэнь кармавтоманзо коряс Россиясо топавтовить 14 нацпроектт, сынст лувсо Мордовиясо тевс нолдавить федеральной 56 проектт.
– Василий Петрович, инескеть, ёвтнеде, меельце иетнестэ кодат проектт тынь топавтыде?

– Ютазь иестэ минь важодинек национальной ды федеральной проекттнэнь коряс. Таразбуе велесэ «Комплексное развитие сельских территорий» программанть вельде стявтынек эйкакшонь ды спортонь площадка, истя жо витнезель аллеясь. Тедеде те ёнкссонть важодемась поладови. Эряви меремс, районсонть ансяк минек Сабанцелентень макссть топавтомс од проект. «Комплексное развитие сельских территорий» программанть лувсо те велесэнть ушодынек тееме эйкакшонь площадка ды вакссонзо аллея. Апрельстэ раминек весе материалонть. Неень шкасто ушодовсть важодематне. Сюкпря Дмитрий Николаевич Игушкиннэнь, сон макссь техника, таркантень ускизь кевнетнень. Седе тов карматано пурнамо площадкань конструкциянть. Зярдо сон пурнави вейс, теде мейле масторксось вельтяви резинасто специальной вельтявкссо. Эйкакшонь комплексэнть перька озавттано чувтот ды куракшт: сиренть, жасминт, гортензият, чуросто вастневиця «глобозум» сортонь укшторт (вейкенть питнезэ 18 тёжат) ды кузт, конатнень сэрест 1,5 метрат. Сынь анок наразь, якамс мельгаст а эряви. Истя жо площадканть перька путтано эземть. Неень шкасто тосо уш улить зярыя фонарть, конатнень таркас арсетяно стявтомс одт. Тешкстаса, теке программанть лувсо Ине Отечественной войнасо чавовозтненень кеврунгонть перька озавтынек зярыя кузт. Важодемась моли виевстэ. Арсетяно седе курок кенярдовтомс велень эрицятнень ды, сехте пек, нама, эйкакштнень, конатнень туртов те весе тевесь топавтовияк, – ёвтни Василий Петрович.

Веленть ды тесэнь эрямонть вадрялгавтомга Сабанцелесэ теить весементь. Те велесэнть, кода лия ламо велеваяк, тевс нолдави самообложениясь. Велень эрицятнень пельде пурназь ярмактнеде башка эштё явозельть федеральной бюджетстэ. Неть ярмактнеде велень ульцятнева ветявить витнемань эрьва кодат тевть.

– Бути кортамс 2022 иеденть, сестэ самообложениянть вийсэ витнезель Пумбрань часовнясь. Теке иестэнть ды теке программанть лувсо Дюрькинасо одкстомтозель велень купелесь. А вана ютазь 2023 иестэ витнезель сонсь лисьмапрясь. Истя жо Сабанцелесэ, Пумбрасо, Дюрькинасо, Манадышисэ, Паранеисэ керсезельть весе умонь чувтотне. Самообложениянь коряс шабра Таразбуе велесэ пурназельть 817 тёжат целковойть. Неть ярмактнень лангс одкстомтозель велень часовнясь. Полавтынек латонть, вальматнень, ладязь сырнень купол. Истя жо витнезель Сабанцелень часовняськак. Дюрькина велесэ эрицятнень пурнавт ярмактнень лангс арсетяно керсемс умонь чувтотнень, мейле карматано витнеме «Неопалимая Купина» лемсэ лисьмапрянть. Эряви меремс, истямо тевсэ лездыть аволь ансяк тескень эрицятне, муевить ломанть, конатне умок тусть тиринь ёнкссто, ансяк седеест кадовсь тиринь Сабанцелес. Истя, «ВКонтакте» социальной сетьсэ ули 32 ломаньстэ «Сабанцелень цёрат» куро. Весе неть цёратне эрить масторонь келес. Ды зярдо лиси кодамояк апак учонь тев эли эряви кодамояк лезкс, свал сёрмадан тозонь. Ды сынь сеске венстить лезксэнь кедь. Саемга, эрявсь эсенек ярмакто ускомс веленть куншкас брусчатка, сёрмадынь цёратненень, ды сынь сеске кучсть ярмакт, – корты В. П. Сидоров.

Тешкстасынек, Сабанцелень ды сонзэ юрс совиця велетне пек бажить лездамс СВО-нтень. Кода ёвтнесь прявтось, велень лавкатнева аштить картононь покш паргот, конатне недлянь перть пешкедить эрьва кодамо ули-пародо (лембе оршамот, понань носкат, нардамот, ярсамо- ды лецямопельть).
– Дюрькинань Культурань кудосо велень аватне (сындест ёвтнетяно сыця номерстэ) вана уш омбоце ие кодыть кекшемань алтымат. Сындест уш кодасть малав 150. Алтымань кодамо Дюрькинав сакшныть лия велетнестэяк, аватнень мекев-васов ускси Николай Михайлович Акимов. Сабанцелень аватне ней стыть снайперэнь каска ланга вельтямот. Лездатано, мейсэ машттано, – ёвтни Василий Сидоров.

Меельцекс Василий Петрович кортась Сабанцелень школанть ды эйденть кужонть ланга. Прявтось тешкстась, тонавтницятнеде весемезэ 32 эйкакшт, эйдень кужов якить ансяк сисем. Тень лангс апак вано, велетне бажить эрямс ды эрявомс. А вана Василий Петровичень кондят ломантне чиде-чис кармить путомо весе виест ды седеест велетнень седе кувать эрямга.

Алена Артемьева

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».