Пятница, марта 29, 2024
Важное

Тедеде В.И. Ромашкин лемсэ «Торама» фольклорной ансамблясь тешксты 30 иензэ. Юбилеень иентень арсезельть эрьва кодат тевть.

Пандемиясь ламо мезенть лоткавтызе. Ансамблясо морыця цёратнень те эзизе тандавто. Сынь поладыть важодеме, совавтомо эрямос од проектт ды нолдасть альбом. Весемеденть ёвтни «Торама» ансамблясо морыцясь Александр Учеваткин:

– Од альбомонть ды проекттнэнь коряс ушодынек арсеме мелят, «Торамань» юбилеентень. Кочкинек репертуар. Улить од морот ды В.И. Ромашкинэнь шкасто пурназь. Сёрмадынек сынст студиясо. Альбомонть лемезэ «Шеньжа». Тов совасть вейксэ эрзянь морот, сынст ютксто колмотне – валтомо музыка (наигрыш). Эрьвантень путынек лем, кодамо ёжо сась сонзэ кунсоломсто. Вейкесь – «Тундонь тердема», тосо теке нармунь чоледи. Омбоценть лемдинек «Урьвакстомакс», тосо ёжось пешксе кенярксто. Колмоцесь – «Раськень озкс». Альбомось путозь Интернетсэ музыкань площадкатнесэ. Тунда тейнинек Интернетсэ те альбомонть видеопрезентация.

– Александр, кода содатано, мелят тынк лиссь фильмаяк.

– Истя, мелят сниминек «Кода эри эрзянь морось» фильма. Якинек Отяжеле ёнксонь Сабанцелев. Кортынек велень эрицятнень марто, башка мель явинек «Комолькай» велень фольклорной ансамблянтень. Фильмасонть эрьва ёндо невтинек Сабанцелень мазый таркатнень ды кудотнень. Ней сонзэ бажатано ютавтомс финнэнь кельс ды невтемс омбо масторонь ломантненень.

– Интернетсэ ули эштё вейке лия ёнов а молиця тевенк – эрзянь кезэрень моротнень ванкшномась. Ёвтнек теде ды лия тевденк.
– Виде. Карминек тееме моротнень ванкшномат (разбор). Сайтяно моро ды ванкшносынек содавикс ломань марто. Мезе те моросонть пачтяви, кодамо тема кепедеви, мекс истя лиссь? Проектэсь лия ёнов а молиця. Те ломантнень пек токизе. Теинек ванкшномат «Вай, колмо кинеть», «Кенде веле» моротненень. Сехте покшось – «Исень саевть одирьва» – моли 32 минутат. Тосо кортыть П. Рябов, А. Шаронов. Видеотнень ванномадост мейле кармасть сёрмалеме корязонзо мельть-арсемат. Финляндиясто гайневтсь Ольга Ерина, эрзява, кона чачсь Отяжбуень Ботужелесэ, умок эри Финляндиясо. Сон ёвтынзе эсензэ мелензэ, несь моросонть лия ёнкс, лиякс маризе те моронть. Кортынек, ды чачсь мель теемс «Исень саевть одирьва» моронь ванкшномань коряс омбоце пелькс, тосо карми ава ёндо варштавкс моронтень.
Аволь умок ардтнинек Казанев. Тосо ульнесь онлайн-фестиваль. Минь тов якинек ды морынек концертсэ.

«Кор» фондонть марто теинек клип. Даниясо ули ломань, конань марто теевинек содавиксэкс, ды чачсь вейсэнь проект, теинек моро Андрей Бочканов марто. Моронть ютавтынек ивритэнь кельстэ.
Теде башка, курок лиси мультфильма. Даниянь кельстэ эрзякс ютавтызе Джак Рютер. Сон моли 10 минутат. Тагояк сюлмавсть Даниянь, Финляндиянь ды Мордовиянь ломантне. Тосо моли рэп, конань моры Андрей Бочканов. Паро студиясо сёрмадынек сонзэ. Пек ракавтыця лиссь мультфильмась. Арсян, сон туи весень мельс.

Умок арсинек теемс клип эйкакшонок марто. «Торамасо» улить вишка цёранок: Андрей Кузнецовонь – Тимофей, монь – Всеволод ды Павел Михайлов актёронть – Иван. «Шеньжа» морось седе, кода эйкакштне нудей потсто муить шеньжа (яксярго), сон ашти пизэсэнзэ ды нарви. Эйдетне пеель марто, шеньжась арси: састь чавомонзо, сынь жо мольсть седямс нудеень керямо. Сынь налксить неть цёрынетнень. Сниминек кизна, ней юты монтаж.

Течи те ансамблясонть морсить вете ломанть: Андрей Ромашкин, Андрей Кузнецов, Александр Учеваткин, Геннадий Егорькин, Виталий Прокин.
Эряви меремс, ожоковонь 23-це чистэ В.И. Ромашкин лемсэ «Торамась» невтсь покш онлайн-концерт. Те ульнесь SUGRIFEST раськеютконь фестиваленть ды Малавикс раськетнень чинть тешкстамо лувсо. Раськеютконь онлайн-концерт – васенце истямо тев морыцятнень туртов. Цёратне анокстасть, эрявсть ламо камерат, ломанть, конат теить звук. Суоминь ломантненень пек мельс тукшны «Торамань» морамось, секскак минек морыцятне паро мельсэ анокстасть покш концерт. Сонзэ ванызь модамасторонь келес!

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».