Четверг, июня 13, 2024
Важное

Маень 25-це чистэ Ульяновск ошсо ютась «Шумбрат» эрзянь ды мокшонь раськень кенярксчись. Коень коряс сон мольсь «Владимирский сад» ошонь парксонть, конась ашти пандопрясо, Рав леенть чиресэ. Тей сакшность киштицят ды морыцят областень сеть районтнэстэ, косо эрить эрзятне ды мокшотне. Покш чись алтавсь Семиянь иентень.

 

Ульяновской областьсэ эрить ламо эрзят. Улить истят районт, косо зярыя эрзянь велеть. Тосонь школатнесэ тонавтнить тиринь келенть, улить эйкакшонь ды покш ломанень фольклорной ансамблят, эйкакштне сакшныть Саранскоев пелькстамо келень коряс олимпиадав, ардтнить тей вузсо тонавтнемеяк. Зярс тосо улить ломанть, конат сэредить раськень культуранть, койтнень-кирдатнень ванстомаст кисэ. Ды те кецявты. Вана нейгак ламотне сакшность «Шумбрат» кенярксчив. Тесэ ульнесть Ульяновской областень морамонь ламо коллективть. Сынь аволь ансяк морасть, велетне анокстасть ярсамопелень, декоративно-прикладной творчествань ды лия ули-паронь выставкат.

Кенярксчинть панжизь Мордовиянь государственной филармониянь артисттнэ: сцена лангсо морасть Карина Сергеева, Маруся Фомина, мельстуиця концерт невтсь Г. И. Сураев-Королёв лемсэ «Келу» фольклорной ансамблясь. Коллективенть ваныцятне вастызь пек лембестэ.

«Шумбратов» инжекс сакшнось Ульяновской областень губернаторось Алексей Русских, сон ваннынзе весе выставкатнень, конатнень анокстызь районтнэ. Ломантне паро мельсэ каванизь эрзянь раськень ярсамопельтнеде, ёвтасть тиринь кельсэ лембе валт, морасть нурька морот.

Минек масторонь историяс сырнень буквасо сёрмадозь эрзянь ды мокшонь содавикс ломантнень лемест. Неень шкасто эрзятне-мокшотне Ульяновской областень лия раськетнень ютксо ламочинь коряс саить нилеце тарка. Сынь виевгавтыть минек региононть ды масторонть. Сюкпря ёвтан тенк раськеютконь тевтнес путовксонть кисэ, раськетнень ютксо ялгаксчинть кисэ, – кортась Ульяновской областень губернаторось Алексей Русских.

Лембе вал марто пурнавозтненень пшкадсть МР-нь культурань, национальной политикань ды архивень тевень министрань васенце полавтыцясь Александр Карьгин, Эрзянь ды мокшонь раськень регионъютконь общественной вейсэндявксонь прявтось Юрий Мишанин, Ульяновской областень эрзянь ды мокшонь раськень культурань автономиянь ветицясь Владимир Софонов.

Сюкпря ёвтан МР-нь Прявтонть Артём Здуновонь пельде тынк областьсэ эрзянь ды мокшонь культуранть, койтнень-кирдатнень ванстоманть ды вельмевтеманть кисэ. Ульяновской областесь – паро невтевкс лия регионтнэнь туртов, кода тесэ маштыть ютавтомо раськень кенярксчить, маштыть пурнамо вейс ломантнень. Кадык минек ютксо ялгаксчись седе товгак ансяк виевгады, – кортась Александр Карьгин.

Кевейкее иеде икеле самай те парксонть «Шумбрат» кенярксчись ютась васенцеде. Сон кармась учовикс ды вечкевикс фестивалекс. Тей пурнавкшныть областень эрьва кодамо районсо эриця эрзятне ды мокшотне. Нейгак састь кеветее районсто. Ульяновск ошсо нолдави «Ялгат» эрзянь ды рузонь кельсэ газетась. Кармась лиснеме «Шумбрат, Рав!» телепередачась. Покш лезкс тенень максы Ульяновской областень Правительствась. Сюкпря ёвтатано Правительствантень, Искусствань ды культурной политикань министерствантень те кенярксчинть ютавтоманзо кисэ, – пачтясь Владимир Софонов.

Надежда Геннадьевна Гусева сась Старомайнской райононь Матвеевской велень поселениясто. Авась важоди вете велень культурань кудотнень прявтокс. Вейке велесь – Базарный Мордовский Юрткуль. Тосо эрить шокшат.

Минь эрьва ие сакшнотано «Шумбратов». Тедеде сынек «Мокшанка» ансамблянок марто. Эрьва ие анокстатано, арсетяно, мейсэ дивавтомс, кода седе тантейстэ каванямс инжетнень. Ней ускинек ямксонь каша, овтонь лапа, пуштазь алт, прякат, пачалксеть, поза, чапамо ловсо – эрзятнень неть сехте тантей ды вечкевикс ярсамопелест. Истя жо ускинек невтемс кезэрень ули-парот, конат ванстовить музейсэнек.

Те кенярксчисэнть МР-нь Культурань, национальной политикань ды архивень тевень министерстванть пельде Благодарностьсэ казевсть тиринь келень тонавтыцятне, эйдень кужонь ды культурань учреждениянь важодицятне. Ютксост – Валентина Ивановна Буртасова. Сон чачсь Кузоватовской райононь Кивать велесэ. Весе пингензэ перть эри тосо. Тукшнось ансяк школадо мейле тонавтнеме. Прядызе Сызранень педагогической училищанть. Направлениянь коряс кучнизь роботамо Новокуйбышевск ошов. Оймесь тердсь тиринь ёнксов, велявтсь Киватев, лиссь мирденень. Кармась важодеме школасо. Образованиянь коряс сон – эйдень кужонь тонавтыця, школасо ветясь музыкань урокт ды эрзянь келень кружок.

…Мольсть 1990-це иетне, кодаткак материалт арасельть. Васня панжозель «Эрзя-мокшонь фольклор» кружок, косо эйкакштне теевсть содавиксэкс ёвкстнэнь марто, тонавтнесть стихть ды морынеть, путнесть сценкат, содавтовсть тиринь раськень историянть марто. Тетятнень-аватнень марто стасть эйдест туртов эрзянь оршамопельть, тейсть пряс путомкат, кодасть кирьгава эрьгеть-мазыльмат. Валентина Ивановна пурнась «Пизёлнэ» ансамбля. Сон вешнесь музыкальной аранжировкат, эсь ярмак лангс теевтсь минусовкат, ютавтсь рузонь морот эрзякс, тонавтнесь ды путнесь эйкакштнень марто эрзянь-мокшонь киштематнень. Тонавтыцясь редясь ёроков эйкакштнень уш эйдень кужосто саезь. Мейле важодсь мартост школасо, эрьва кенярксчинтень анокстасть творческой номерт.

Ледстнян, сакшнось тенек Саранскойстэ «Келу» фольклорной ансамблясь. Мон стинь шаршавонть удалов, лепштия магнитофононь кнопканть ды истя сёрмадынь эстень морост. Мейле карминек неть моротнень тонавтнеме ды морсеме ансамблясонок. Васня музыкавтомо, акапельна морсинек эйсэст. Эйкакштненень пек вечкевсь. Сестэ областьсэнек ушодсть ютавтомо эйкакшонь фестивальть. Автономиянь васенце прявтось М. И. Крымкин ютавтнесь, нейгак паро валсо ледстнетяно лемензэ. Кавто чинь перть мольсть фестивальтне-конкурстнэ. Тов сакшныль Саранскойстэ Владимир Ромашкин «Торама» ансамблянзо марто, – ёвтни Валентина Ивановна.

В. И. Буртасова 40 иеть алтась школантень. Ней важоди клубсо культорганизаторокс, истя жо вети «Пизёлнэ» ансамблянть, косо морсить эйкакшт ды покшт. Культурань кудось аволь умок витневсь-петневсь, ней сон лембе, ули эрявикс аппаратура. Косо ансяк эзь морсе «Пизёлнэсь», косо ансяк эзь невтне ёрокчинзэ. Сайнесь изнямонь таркат. Валентина Ивановна тонавтницянзо марто эзь менстне морамонь конкурстнэнь. Сон макссь эйкакштненень сёлмот, вийть, превть. А стяко зярыя тонавтницянзо тусть сонзэ киява, кармасть педагогокс, истя жо поладыть важодеме эйдетнень марто.

Фестивальсэнть эсь маштомачист невтизь областень эрзянь ды мокшонь ансамблятне, сынь невтсть виев ды мельстуиця концерт. «Шумбрат» кенярксчись седе тов поладови областень районтнэва.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».