Течи тешкстави Эйкакшонь ванстомань чись
Июнень 1-це чистэ масторлангсонть тешкстави Эйкакшонь ванстомань ды идемань чись. Те чистэнть минек республикасо ютавтовить ламо мероприятият. Кенярксчиденть икеле, маень 30-це чистэ, Мордовиянь Национальной театрасо невтезель «Сияжар» музыкально-драматической спектакля, конанть анокстыцясь – «Национальная безопасность и наука» АНО ИАЦ-сь. Культурань инициативань Президентской фондонть лезксэнзэ вельде панжозель проект «Арт-фолк театр «Цятконят» (ПКФИ-21-1-000345).
Проектэсь вейсэндинзе Мордовиянь ведьгемень од артисттнэнь – школасо тонавтницятнень. Сонзэ арсицянзо – Юлия Владимировна Бурова, Наталья Фёдоровна Маланкина ды Дмитрий Иванович Еделькин. Весе артисттнэнь туртов стазельть эрзянь, мокшонь, рузонь ды татаронь раськень мазый оршамопельть. Сияжар богатырденть спектаклясь киньгак эзинзе кадо мельтеме. Сон ёвтнесь седе, кода эрямс ялгаксчисэ весе раськетнень марто, кода вейсэ стямс зыянов тевтнень каршо ды а стувтомс – парось свал изнясы апаронть.
Саранск ошонь 25-це № лицейстэ ды 30-це № школасто цёрынькатне ды тейтерькатне вейсэ «Торама» фольклоронь ансамблянть марто налксесть, киштсть-морасть, седясть пенчсэ ды кезэрень эрзятнень музыкальной инструменттнэсэ. Тешкстама, концертэсь-спектаклясь анокставсь зярыя ковонь перть, репетициятне ютасть школасо урокто мейле. Эсь ёрокчист невтизь Орданьбуень беряньстэ неиця эйкакштнень туртов общеобразовательной школань-интернатонь вокально-инструментальной ансамблянь эйдетнеяк. Ваныцятнеяк ульнесть Мордовиянь школатнесэ тонавтницятне, конатне састь «сэредеме» ялгаст-ояст кисэ. Спектаклянть анокстамсто лезкс макссть Мордовиянь беряньстэ неицятнень туртов специальной библиотекань сотрудниктнеяк.