Орданьбуесь – Мордовиянь сехте кезэрень оштнестэ вейкесь. Сон содавикс эсь лия ёнов а молиця историянть, культуранть ды ёроков ломантнень коряс. Тесэ свал покш мельсэ учить инжеть ды маштыть сынст вастомо. Сыцятненень ули мезе невтемс, мейсэ сынст дивавтомс ды кенярдовтомс.
Весементь тень коряс Орданьбуень райононь Н. К. Крупская лемсэ центральной библиотекасонть зярыя шкадо икеле панжовсь Туристэнь центра. Те куронть важодемань прявт тевекс ашти туристэнь китнень-янтнэнь арсемась, мельстуиця экскурсиятнень ютавтомась. Тесэнь важодицятнень программасонть явовить зярыя маршрутт: исторической, музейной – районсонть ниле музейть: Орданьбуесэ Краеведениянь ды Военно-морской флотонь, Орозбиесэ – «Урусовские валенки» ды Баеньбуесэ – С.Д. Эрьзя лемсэ музейтне. Истя жо ули религиозной маршрут, конанть лувсо ванновить райононь содавикс лисьмапрятне ды церьковатне. Невтеви Казанской Ключевской цёрань пустынесь, кезэрень ды од церьковатне, конатне аштить велетнева.
Весе те важодеманть лия специалисттнэнь марто вети библиотекань туризмань коряс прявтонь полавтыцясь Юлия Сергеевна Суюшова. Сонзэ марто минь кортынек важодемань прявт ёнкстнэде ды инжетненень вечкевикс таркатнеде.
– Минек Орданьбуень районось сюпав культурань ды историянь эрьва кодамо таркатнень коряс. Невтемс ули мезе. Васняяк, кода эсенек райононь эрицятненень, истя ве ёндо сыця инжетнененьгак пек тукшныть мельс райононь музейтне, косо улить пек сюпав коллекцият. Сынь ёвтнить аволь ансяк минек ёнксонь сюпав историядонть, истя жо ёроков ломантнеде, эрицятнень тевдест. Истя, Баеньбуесэ С. Д. Эрьзя лемсэ музейсэнть улезь, карматано седе ламо содамо ине скульпторонть эрямодонзо ды шкинемадонзо. Музеень важодицятне истя жо ёвтнить веленть сюпав историядонзо. Вишка инжетнень туртов жо тесэ улить лишметь, конатнень лангсо ардтнемась неень шкань эйкакштнень туртов покш кеняркс. Те эдь икеле лишметнеде велетнесэ ульнесть ламо, ней те ракшась вастневи чуросто. «Урусовские валенки» музеенть содавтозь, прянек чопавттяно тесэнь эрицятнень тевентень – понань лембе кемтнень кевердемантень. Тесэнь кедьчелькевтне аволь ансяк невтьсызь, кода теевить неть лембе карсемкатне, истя жо инжетненьгак тонавтсызь те а шожда тевентень. Тесэ ютавтовиця мастер-класстнэнь сыцятне пек вечксызь, – ёвтни Юлия Суюшова. – Нама, ютавтнетяно виртуальной экскурсият. Якатано школатнева, ёвтнетяно эйкакштненень минек Орданьбуе оштонть, кодамо сон ульнесь, кодат лиссть полавтомат. Пек кенярдовты, меельце иетнестэ ошонь куротне витневсть-вадрялгавтовсть, теевсть вадря скверт, площадь, оймсема таркат. Истя жо эсь инжетнень содавттано эрзянь раськень койтнень-кирдатнень марто. Кодамо-бути велесэ келейстэ тешкстыть Мастянть, косо-бути – Троицянть ды лия кенярксчитнень. Минь пурнатано группа ды ардтано те велентень. Инжетне эсь сельмесэ неить неть покш читнень мазычинть ды чарькодить эрицятнень туртов сынст смустест. Истят экскурсиятне свал вечкевикст ды пурныть ламо инжеть.
Райононь инжетнень туртов пек тукшны мельс гастрономической маршрутось. Сонзэ лувсо невтеви ды ёвтневи се продукциядонть, конась тееви-нолдави районсонть. Тесэ улить ламонень содавикс ды вечкевикс брендтнэ.
Маенть ушодовомсто эсь кенкшензэ одс панжинзе «Чудо ферма» комплексэсь, конась ашти Суподеевка велесэнть. Тосо свал ютавтневить ламо эрьва кодат мастер-класст: розень кшинь, Суподеевкань пряникатнень, пачалксетнень, прякатнень, чак-чаконь панемань, чаень анокстамонь, сапонень пидемань коряс.
Юлия Суюшова, Орданьбуев эрьва кодамо ёнкстнэстэ инжетнень тердемга, «ВКонтакте» социальной сетьсэнть вети кавто курот – «Ардатов туристический» ды «Туристические тонкости Ардатова», косо ёвтни райондонть ды тесэ улиця мельстуиця таркатнеде.
– Монь туртов те весемесь од. Инжетнень марто монськак тонавтнян райононть. Ули мель те ёнксонть кастомс-виевгавтомс, – ёвтни Юлия Сергеевна. – Неень шкасто истя жо башка мель явови спортивной туризмантень. Маласо шкастонть сонзэ арсеви невтемс седе келейстэ. Тень коряс пек мелявтан. Васняяк, спортонтень мель седе пек явить эйкакштне, важодемс сави седе ламо сынст марто. А те пек а шожда. Эйкакштнень эрявить вастомс, арсемс программанть, спортонь объекттнэнь невтнемс. Ды теке шкастонть явомс мель экскурсиятненень – содавтомс сынст ошонть, историянь ды культурань таркатнень марто, ды весементь теемс истя, штобу туевель мелезэст. Эйкакштнень марто важодемасо арсинек башка мель явомс налксемань ёнксонтень. Весементь невттяно тенст викторинатнень, мастер-класстнэнь, квесттнэнь ды пелькстамотнень вельде.
2024 иесь минек масторсо яволявтозь Семиянь иекс, тень юрсо башка мель тедеде карми явовомо семиянь туризмантень.
– Минь арсинек маршрутт, конатне туить мельс эйкакш марто семиятненень, – ёвтни Юлия Суюшова. – Монь койсэ, те программась васняяк улевель мелень коряс эйкакштненень, сестэ аватнеяк, тетятнеяк кармить мельспаросо.
Туристэнь куншкакурось кеместэ важоди райононь Культурань кудонть марто. Вейсэ сынь пурныть-анокстыть кенярксчитнень, ютавтыть пелькстамотнень, кода райононь эрицятнень, истя инжетнень ютксо.
Эряви меремс, важодемась ветяви «Пушкинской картатнень» коряскак. Эйкакштнень марто важодемасо те ёнксось пек эрявикс.
– Райононь туризманть виевгавтомга снартнетяно теемс весементь. Бажамонок – молемс ансяк икелев, панжомс од ёнкст ды мельстуиця таркат минек инжетнень туртов, штобу миненек савольть седе ламо ломанть, – кемекстызе Юлия Суюшова.
Овсе аволь умок Орданьбуень райононь инжетнень туртов арсевсь туристэнь эштё вейке маршрут, конась карми ютамо ошонть малава чудиця Ратор лейганть. Тия карми якамо теплоход. Экскурсиянть шкасто мереви ванномс пертьпельксэнь мазычитнень, теевемс содавиксэкс райононь историянть, тесэнь эрямонть марто ды оймсемс эрьва чинь мелявкстнэде.
Минек республиканть туртов те ёнксось од, арсеви, туристтнэнь мельс сон туи ды карми вечкевиксэкс.
Юлия Еремина