...Лия валморотнень ловномстояк а лоткат дивсемеде. Вана вейкесэнть ансяк кавксо валрисьметь. Ловнат ды теке цела ёвтнема икельгат юты, кода иневедь чиресэ оймсемстэ вастовсть кавто од ломанть.

Ды – на тенк – «лембе ёнксонь лембесь валовсь санга», «вакссот седейс ки вешни од ялга» (46 с.).
Лиясонть истя жо кавксо валрисьметь. Ансяк кодат! «Мелем – лембекс седейзэть валовомс…, мерть онозот совамс ды кадовомс» (48 с.).
Вечкемась, ансяк вечкемась ломаненть тейсы уцяскавокс, эрямонтень кенярдыцякс. Ды сон, вечкемась, мезентеньгак а яжави. «Ине вий эри эйсэнзэ свал, сёлмов кемема сэрьсэнзэ лекси. Вейке вал, вейке вечкемань вал сехте кемевикс идицякс эрси».
А стяко поэтессась вечкеманть лови «ёжонь тёкшокс» (49 с.), конадо паро мезеяк лия арась.
Лия валморотнестэяк вастат ламо валт, конатне, мерят, таго-зярдо чарасть тонсеть превсэ-удемсэ, анокольть прамс конёв лангс. Арась! Нать, Пазось эзь максо теть истямо сяткине, кодамосо казизе эрзянь те аванть? Тень кемевтемга максан зярыя саевкст.

* * *
…Модамасторось одс эжни,
Шожда котат карсесь.
Ломань ломанензэ вешни,
Эрьва кува чалгсезь. («Касома», 54 с.)
* * *
…Юты, прядови веть,
Яви удомат парсте.
Сакшныть онстонок сеть,
Кие эйстэнек арси. (58 с.)
* * *
…Иля кевкстне, иля кевкстне яла,
Марик оймень мором, ванозь сельмес.
Мон тонь вакссо гай толпандякс палан,
Секс тонгак вакссон а вайсят кельмес.
(63 с.)
* * *
…Мелявкстнэде, ванок, иля синдевть,
Куш вестешка варма мельга кучить.
Иля капша истя, зярскак кирдевть, –
Кода мон, тонь косояк а учить. (68 с.)
* * *
Киян тонеть мон, тон монень кият?
Бути течи ялатеке туят,
Лия кедь чевтинестэ сювордат,
Лия рунго тонадозь кутмордат?
Ды, неяви, оймамо а муят.
Курок мекев малынезэм чият. (69 с.)
«Сехте лембе валтнэ течи – Тонеть!..»
Вечкемадо истят видькстамотнеде певтеме. Ды аволь ансяк цёра ялганень. Седеяк лембе валт поэтессась алты сехте малавикс ломанензэ туртов: аванстэнь, тетянстэнь, кавто эйденстэнь-какшонстэнь.
«Мелезэнь леди монь вечкевикс тетям», – сельведень пачк конёвонтень панжизе седей сэредьксэнзэ Татьяна, зярдо кулось вечкевикс тетязо («Тетянень», 100 с.). Теке шкасто а лоткси сюконямодо шкинень аванстэнь, киде седе малавикс ды вечкевикс ломань сонзэ туртов арась.
Те масторсонть, косо чачинь-касынь,
Васень аволь кеме эскелькст теинь,
Вишка пингстэ эрзянь «авай»
Сех малавикс ломанентень меринь…
…Сюкпря, авай, пси седееть кисэ,
Сан мон кудов, вастат кшисэ-салсо.
Зярс тон ознат, берянь тев а лиси,
«Тякинем», – тень мерят эрзянь валсо…(128 с.)
Татьяна сонськак умок уш велявтсь авакс. Три-касты кавто эйкакшт – «васень покш кенярксом – превей цёрам ды седеень витемам – тейтерем» (26 с.). Весе седей псинзэ максы сыненст. Теде видькстась ды аволь вестькак эсензэ валморотнесэ.
Сехте питней ломанень – эйкакшон,
Кавто нармушкинеть, валдо ойметь… (27 с.)
Сюконямо валсо панды паронзо сеть ломантненень, кить ульнесть тензэ тонавтыцякс, превс путыцякс, тевсэ лездыцякс.
Мельспаро лангозот ваномс,
Ёжот эжи, мартот пейдезь.
Коданя сэрезэть касомс –
Маштомс кирвазтнеме седейть?!

Превей валот Тон ёвтасыть,
Ды Тонеть потмаксос кемить.
Эрзянь раськенек содасы
Маризь Кемаль мазый леметь… (103 с.)
Мельтеме эзинзе кадо эрзянь содавикс ломантнень Р. Д. Жегалинань, моронь пурныцянть Олёшонь, поэтэнть Числав Журавлёвонь, «Чилисема» журналонь икелень прявтонть Н. И. Ишуткинэнь, эрзянь келень факультетсэ тонавтыцянзо Д. В. Цыганкинэнь («Тензэ мерить «пепельный блондин». Ды Дмитрий Васильевич лемезэ!», 108.с.).
Свал мельсэ-превсэ кирди «Чилисема» журналонть, конанть марто сюлмавозь ламо иень перть. Алтась тензэ ламо лембе валт:
…Валдо сонзэ лемезэ,
Кенярдовты чачозо,
Сэрей эрзянь оймезэ,
Смустев эрьва валозо…(109 с.)

«Весе ули парсте»
Те аволь весе, мезе ёвтыксэлинь Татьяна Мокшановань од пусмос совавтозь валморотнеде. Весе се, мезе кирвазсь потсон сынст ловномсто, сеске а панжови конёв лангс. Ужо, юты зярыя шка, таго озан сынст ловномо, варштан лангозост лия сельмесэ, карман седеяк пштистэ онкстнемест эрьва ёндо ды, кеман, муян эйстэст седеяк ламо паро ёнкст. Тердян тынкак, ловныцят, саемс кедезэнк те пародояк паро пусмонть. Ды эйстэнзэ алкукс мутадо «Оймамо тарка». Саты ансяк панжомс сонзэ ды икеленк сравтови келейдеяк келей пакся, косо касыть эрьва кодамо тюсонь цецят – валморот. Эйсэст эрьва валось – тундонь пургондавкс, эрьва валрисьмесь – чевте мода лангс видезь, чипайсэ эждязь, лембе пиземесэ валнозь, ломанень превсэ ды вийсэ кенерстезь касовкст. Ды, секень вант, а явовтадо те пусмонть эйстэ валскенть самс, зярдо
Чилисемань толось
Валдонь сятко верьгедсь.
Вень чоподась колавсь,
Нармунь моро серьгедсь.

Сыргозсь минек модась,
Корштась валскень танстте.
Сон вадрясто содась:
Весе ули парсте. («Валске», 147 с.)

Ломань ёнкссо
Ломань ёнксось аволь истя эжди,
Куш варштан нусманясто – а кежди,
Сонсь а кирди эйсэнь, сонсь а пани,
Ломань ёнксось а истямо маней.

Эриялгам кудов капши само.
Лавтовонзо тодовкс путсы прялом.
Кода тесэ мелем иляст вано,
Кияк а чарькодьсы эрзянь валом.

Ванан, кода уить пондакш пельтне,
Кадык кудов пачтясызь монь
мельтнень.
Тесэ ськамонзо вишкине эйдем
Тиринь валом каршо яла пейди.

Ледстнян
Мельсэ кирдян… ледстнян…
Ванстан седей вакссо,
Конась васня кецни,
Мейле – панксонь-панксонь.
Ютазенть а яван,
Кодаяк а ойман.
Сехте уцяскаван
Ды сехте пайстоман.
Валовозат, сэредькс, –
Састо оймем чиртян.
Арсематне эрикст…
Ледстнян… мельсэ-кирдян. (134 с.)

* * *
Чизэ састо валги.
Менельчиресь сыремсь.
Весь васняяк чалги
Тозонь, косо виресь.

Мейле чиезь-капшазь
Сон пачкоди велес,
Эрьва ёнов варштазь,
Срады моданть келес.

Чополгадозь, эрькес
Ваи ковонь сиясь,
Чейтне эрькенть перька
Ёвкст ней тошкить лият. (135 с.)

Раиса Щанкина