2025 иень Содамочинь чинть Отяжелень райононь Поселкань 2 № средней школань тонавтницятне куватьс кармить кирдеме мельсэст: кенярксчинь линейкантень сыненст сакшнось республикань Прявтось Артем Здунов. Тедеде школась витнезель педе-пев ды тензэ максызь Советской Союзонь Героенть В.М. Михеевень лементь.
Кенярксчинь линейкась ушодовсь РФ-нь Государственной флагонть кепедемасто – те правась максозель 11-це классонь тонавтницянтень Алена Власованень, истя жо СВО-нь ветеранонтень Виктор Жадеевнень ды сонзэ тейтерентень – 7-це классо тонавтницянтень София Жадееванень.
«Шумбрачи, вечкевикс землякт! Вечкевикс тонавтыцят, тетят-ават, эйкакшт, васенце классос молицят, специальной военной операциянь участникть! Пек мельспаро истямо маней чистэ неемс одкстомтозь школанть, эйкакшонь площадканть, конаванть ютават эйкакшонь коляска мартояк. Ансяк школанть эряви пештямс од содамочитнеде, валдо оймеде. Минек Президентэнть кармавтоманзо коряс тедеде одкстомтынек 10 школат, сы иестэ арсетяно витнемс малав 30. Ды истя карми эрьва ие, зярс весе инфраструктуранть а витнесынек. Мон пшкадян васенце классо тонавтницятненень: тынк икеле истямо мельстуиця шка! Ванстодо вейкенк-вейкенк, тонавтыцянк – кемеде, мейле карматадо ледстнемест ламо иеть. Арсян, штобу тынь вечкевлинк эсь од содамочитнень ды нолдавлинк сынст тевс», – мерсь Артем Здунов.
Школась кирди мельсэнзэ эсь прядыцятнень, конат ней ванстыть Тиринь масторонть, примить участия СВО-сонть. Мордовиянь Прявтось казсь покш награда – «За храбрость» II степенень медаль – боевой тевтеематнень ветеранонтень, СВО-нь участникентень Сергей Паршениннэнь.
Почетонь инжетнень ютксо торжественной линейкасонть истя жо ульнесь «Время героев» федеральной программань участникесь, спецоперациянь участникесь, Мужествань кавто ордентнэнь кавалерэсь, Саранскойсэ чачозесь Алексей Жбанов.
Весе тетятнень-аватнень, тонавтницятнень ды тонавтыцятнень пельде од школанть кисэ республикань Прявтонтень евтасть сюкпря школань прявтось Елена Душкина ды тетянь-авань комитетэнтень совицясь Наталья Заводаева.
Тедеде школасонть васенце классос мольсть 14 тонавтницят. Республикань Прявтось ды почетонь инжетне явшесть тенст казнеть ды арсесть изнявкст тонавтнемасо.
Артем Здунов ваннызе од школанть, кортась тонавтыцятнень, тетятнень-аватнень ды школасо тонавтницятнень марто, истя жо ульнесь васенце классо тонавтницятнень уроксо. Сехте апелицякс кармась Сережа Казаев. Сон эзь талакадо: «Тынь – Артем Алексеевич Здунов? Мереви кеденк лепштямс?»
«Нама!» – Мордовиянь Прявтось венстизе кедензэ церынентень.
Те кедень лепштямонть Сережа Казаев карми кирдеме мельсэ эрямонзо перть!
Школасто лисемстэ Мордовиянь Прявтонть вастызь тосонь эрицятне ды евтасть сюкпря райононтень мелень явоманть ды пек вадря школанть кисэ.
Отяжелень районсо важодемань коряс улемстэ Артем Здунов якась райононь больницяв. Тесэ аволь умок прядовсь «Продолжительная и активная жизнь» нацпроектэнь здравоохранениянь первичной звенань одкстомтомань-вадрялгавтомань коряс федеральной проектэнть лувсо поликлиникань отделениянть допрок витнемась.
Медучреждениянь одкстомтомасо топавтозельть покш тевть. Ниле этажсо зданиясонть витнезь ушоенксось, латось, уштомань, вентиляциянь, пси ды кельме ведень пачтямонь, канализациянь, толонь мадстемань систематне. Рамазь неень шкань оборудования клинической лабораториянть туртов, од мебель.
«Минь прядынек педе-пев витнеманть ды путынек неень шкань оборудования. Ней райононь эрьва эрицянтень максови медицинань вадря лезкс. Больницянь одкстомтомась истя жо вадрялгавтынзе медперсоналонть туртов важодемань условиятнень», – тешкстась райононь больницянь прявт врачось Вячеслав Карасев.
Артем Здунов ваннызе чинь стационаронть, специалисттнэнь ды педиатрань кабинеттнэнь. Меельце зярыя иетнень перть райононь больницянтень «Земский доктор» федеральной программанть коряс састь важодеме колмо докторт ды вейке фельдшер. Вейкесь юткстост – участковой педиатрась Ангелина Суслина. Сон совась больницянь командантень мелят. Од авинетне пек кенярдыть, сынст эйдетнень марто важоди истямо мелень явиця ды эсь тевень содыця доктор. Неть читнестэ коллективенть сюпалгавтсы эште участковой терапевтэсь.
Мордовиянь Прявтось арсесь медиктненень ды пациенттнэнень уцяска ды кеме шумбрачи.
Мордовиянь Прявтось истя жо ванкшнызе «Стекло в архитектуре» предприятиясонть од производстванть. Тесэ нолдавить алюминиень профилень валдонь нолдыця конструкцият, конатне тевс совавтовить эрямонь кудотнесэ, производствань помещениятнесэ ды общественной зданиятнесэ суликань путомсто. Те фасадт, вальмат, совамонь ды балкононь кенкшть, порталт, кепедемань-шаштомань конструкцият, телень садт, суликань пирявкст.
Предприятиясь истя жо тонавтнизе кшнинь профилень конструкциятнень обработкань ды производствань енксонть.
Райцентрасонть укшномань бассейнасонть улиця суликатне – предприятиянь специалисттнэнь тевест. Текень пингстэ «Стекло в архитектуре» предприятиясь важоди аволь ансяк минек республикань, истя жо лия региононь застройщиктнень ды строямонь компаниятнень марто.
Тедеде Промышленностень виевгавтомань республикань фондонть лезксэнзэ вельде предприятиясь рамась вальматнень ды кшнинь конструкциятнень производстванть туртов од оборудования.
Артем Здунов райононь прявтонть Константин Николаев, МР-нь Минпромонь ды «Стекло в архитектуре» ООО-нь руководстванть марто кортнесь предприятиянть седе тов виевгавтомань, производствань вийтнень келейгавтомань ды важодемань од таркань теемань кевкстематнеде. Неень шкане предприятиясонть важодить малав 70 ломанть.