Ули кортавкс: «Масторлангсонть арасть таланттомо ломанть, эдь сонзэ Пазось казьсы эрьвантень чачомсто». Алкукскак, кие парсте арты, кие моры, кие машты налксеме музыкальной седямопельтнесэ, кие тантейстэ пиди-пани, а кие, кода Светлана Гинина – куш кодамо коцтсто сты шедеврат, човалясто викшни картинат ды тейни лиятнень енов а молиця раськень енкс марто мазылгавтомапельть. Ловныцятнень а манчемга, евтатано, те авась эсь вечкевикс тевензэ туртов алты весе эрямонзо. Весемесь жо ушодовсь, кода свал, кудораськестэ. Тешкстама, Светланань аванзо ендо весе аваломантне пингест перть вадрясто викшнесть-стасть. Неть маштомачитне ютасть сонензэяк.
Эрямосонть муизе вечкевикс тевензэ
Светлана – рузава. Чачсь Ромодановань районсо. Зярдо сонензэ топодсть ниле иеть, семияст сась эрямо Саранскоев. Авазо ламо иеть важодсь паспортисткакс, тетязо жо эрямонзо перть ульнесь тепловозонь машинистэкс. Светлана кассь ды кавксо класстнэнь прядомадо мейле мольсь тонавтнеме Саранскоень 19 № училищав. Колмо иеть тонавтнесь стыцякс. Училищанть прядомадо мейле кучомань коряс аламошкас важодсь стыцянь фабрикасо. Ансяк тейтерентень мезе-бути ялатеке эзь сатно, ды сон поладызе тонавтнеманзо. Ютась закройщикень курсат. Сындест мейле варчизе прянзо микшнемань тевсэ. Саранскойсэ панжсь оршамопелень зярыя лавкат, косо микшневсть шубат ды лембе курткат. Те тевсэнть лакась малав 20 иеть. Теде башка, чокшне ланга, зярдо прыль юткошка, стыль шубат сонсь. Ошсо эдь свал муевить модань вечкицят, конатне рамсить эксклюзивной оршамопельть. Секскак Светлана сеске мусь рамсицят. Зярдо жо ушодовсь ковидэнь кезовось, авась пекстынзе лавканзо ды прянек-пильгенек чопавтсь од шкасто кочказь профессиянтень. Ды, кода тешксты Светлана, тень кувалма овсе а янкси. Ней авась мари прянзо эсензэ таркасо ды чиде чис седеяк вечксы тевенть, конантень алтызе эсь эрямонзо.
– Сюкпря евтан бабанень ды аванень, кинь пельде монень ютась те ерокчись. Сельмень икеле нейгак ашти бабань велень кудопотмозо. Соват эйзэнзэ ды теке музейс понгат: тодовлангакстнэ, кроватень вельтявкстнэ, столь ланга каямотне – весе ульнесть мазылгавтозь кедьсэ викшневкссэ. Седикеле эдь арасельть кудонь лия мазылгавтомкат. Бабань пельде монень кадовсть викшнезь зярыя нардамот, конатнень сон викшнинзе эште од тейтерькакс. Мон ванстан эйсэст, лован сынст минек кудораськень реликвиякс, – евтни стыцясь.
Неень шкасто авась сты кода вешемань коряс (на заказ), истя эсензэ оймензэ кунсолозь. Свал муевить рамсицят. Светлана ве чияк а ашти тевтеме. А зяро вейсэнь проектт республикань содавикс дизайнертнэнь ды артыцятнень марто сон топавтсь! А лововитькак. Вана аволь умок прядызе «Ладава» арт-студиянть марто вейсэнь проектэнть лангсо важодеманть, конань вешеманзо коряс Светлана стась эйкакшонь раськень стилизованной малав 60 оршамопельть. Кода тешксты сонсь авась, важодемс савсь чинек-венек. Эдь шкась проектэнть топавтомс максови а пек ламо. Те тевденть башка, авась кенерсь топавтомс свалшкань рамсицянзо мелесткак. Теде икеле авась невтизе ерокчинзэ «Мир глазами ребенка: культура творчества и основы межнационального созидания», «Древо мира», «Цятконят» арт-студия марто вейсэнь проекттнэсэ. Важодемс савсь пек ламо, ансяк Светлана тешксты, роботась ютась теке ой ланга, эдь сон вечксы стамонь тевенть. Нама, стамодонть башка, сонензэ савсь ламо мезе викшнемскак. А уш кода оршамопелесь аноколь, эрявсь тейтерень эрьва костюмонтень човалясто теемс мазылгавтомапельть. Ансяк Светлана тесэяк эзь кайсе прянзо, весементь топавтызе шкастонзо.
Аванть важодеманзо лангс ве ендо ваныцянтень сы кевкстема: неть оршамопельтнень лангсо вейке шкасто важодсть зярыя ломанть эли, паряк, Светланань эсензэ сисем кедензэ? Капшатано евтамс, весе неть оршамопелень коллекциятнень стынзе ды викшнинзе дока стыцясь ськамонзо. Эдь те ломаненть вишкинестэ саезь ули покш ерокчизэ ды ламо цидярдомазо.
Кудораськенек лездыть СВО-нть туртов
Лезксэнь максомась ушодовсь кавто иеде икеле, зярдо Светланань церанзо малавикс ялгазо эсь олясо тусь Тиринь масторонть ванстомо. Шкань ютазь церась велявтсь кудов ды уставась важодеме волонтерокс, усксесь минек цератненень гуманитарной сталмот, посылкат. Самай сеть шкатнестэ Светлана семиянзо марто арсизьгак ушодомс лездамо минек боецтнэнень.
– Покш кудораськесэ эрьва тевесь топавтови вейсэ. Цератненень лездамонтькак ушодынек вейсэ. Саемга, ававтом омбоце ие коды понань носкат. Мирдень марто рамасынек тензэ суренть, усксынек. Сырькаесь кодась малав сядошка лембе носкат. Авам меельце шкастонть стась озамопелень лангс путовиця ламо коврикть, цератне вешить эйсэст, эдь техникасонть свал калгодот эземтне, окоптнесэяк сынь эрявить, яла аволь кельме модалангсо озадо аштемс. Теде башка, авам стась зярыя юдминеть (сумкинеть), лиякс тенст эште мерить планшетникть, конатнес а емамга тюремань паксясо ранязь боецэнть путовить документэнзэ. Монсь жо стынь оршамопельть: лембе ковтат, понкст, алгапонкст, удома таркас ацамот. Стамонь материалтнэнь рамсетяно минсь, эрятано рынканть маласо, мезе эряви – весемесь микшневи. Меельце шкастонть авань марто вейсэ стынек госпитальсэ аштиця цератнень туртов апокш тодовнеть, конатне пек эрявикст лецямо таркатнесэ. Весе неть посылкатнень пачтятано «Мордовия СВОих не бросает» волонтеронь вейсэндявксонь складов. А уш тосто сынст ускить минек цератненень. Весемесь пачкоди, боецтнэ свал кучить сюкпрянь валт ды лембе фотот минек пельде кучозь лезксэнь посылкатнень каршо, – евтни Светлана Гинина.
Авась а покшкавтниця, эсь лемензэ ковгак а сермадстни. Сон тешксты, те весемесь моли седейстэ. Ды тесэ а кода лиякс, истя минь вейсэ малавгавттано Изнямонть.
Алена Артемьева