Меельце ловоматнень коряс, эрзятнеде ды мокшотнеде Саратовань областьсэ весемезэ 10 тежат, те 0,43 % весе эрицятнестэ, ды те цифрась аволь вишкине. Тосонь эрзятне-мокшотне «Шумбрат» эрзянь ды мокшонь национально-культурной центрань прявтонть Валентина Кривошеева марто пек ероковт ды вейсэндявозь. Секскак, тесэ вейсэнь вастовоматне – свалшкань тев.
Сентябрянь 27-це чистэ «Шумбрат, ялгат!» эрзянь-мокшонь раськень культурань фестивалесь ютась Саратова енксонь Оркина велесэ, Кривошеевань ды райононь прявттнэнь лезксэст вельде. Те эрзянь велесэнть, конась ашти Петровской районсо, сон ютась кавксоцеде ды пурнась 200 ламо морыцят-киштицят аволь ансяк Саратова енкссто – Мордовиясто ды Пензань областьстэ. Тешкстама, фестивалесь пек вечкеви тосонь эрицятненень, эйстэдест пурнавкшнось цела зал. Сон ютавтневи тесэнь Раськень культурань центрасонть, конань панжицякс кармась тосонь эрицясь Александр Кузнецов – «Кучугуры» ансамблянь арсицясь ды культурань ванстыцясь. Сон уш умок арась ютксонок, ялатеке сонзэ тевтне ды койтне поладовить. Вастовомась зярдояк а ютни каванямкавтомо, эсест кудынесэст весень вастыть кшисэ-салсо ды раськень ярсамопельсэ Петровской, Советской, Новобурасской, Балтайской, Ершовской, Татищевской районтнэсэ эриця эрзятне-мокшотне ды лия раськень ломантне. А кода мазылгавтовсть Куншкакуронь ортатне: сынь молить эрзянь авань пряс путомка – панго енов.
Мордовиясто фестивалень почетной инжекс кармасть РФ-нь Федерациянь Советэнь сенаторось, Финнэнь-угрань ассоциациянь прявтось Петр Тултаев, МР-нь Минкультнацонь министрань полавтыцясь Александр Кочеваткин, Эрзянь ды мокшонь раськень регионъютконь общественной вейсэндявксонь исполкомонь секретаресь Татьяна Ширманкина, культурань ды СМИ-нь представительтне.
Сценанть лангс пурнавкшность Саратовань содавикс коллективтне, ютксост – «Лисьмине» ды «Кучугуры». Мордовиясто весень кенярдовтызь «Келу», «Мерема» ансамблятне. Весемезэ невтезельть 30 ламо номерт ды концертэсь мольсь 2 част.
«Шумбратось» невтизе, кода тошнакадсть тосонь эрицятне истят вастовоматнень кисэ, кодашка вейсэнь вий ды лембе марявсь те покш кенярксчисэнть. Палкине марто покштятнеяк-сырькайтнеяк капшасть кунсоломо моротнень, тиринь кельсэ кортамотнень, ламотнень эзть кирдеве сельведест. Секскак, «Шумбратонтень» – кувака эрямо ды ансяк икелев!
Мельть-арсемат
«Шумбрат, ялгат!» фестивальсэнть минь вастовинек Советской райононь Советский поселкань эрзянь аватнень марто. Раиса Петровна Вавилова ды Надежда Андреевна Никифорова – весе ютавтозь фестивальтнень участникть. Сынь умок уш эрить Саратова енкссо, ансяк чачсть Ицялбуень Павловка ды Селищи велетнесэ. Советский поселкав тусть родняст-раськест мельга ды тосо эрить малав весе пингест. Надежда Андреевна сеедьстэ сакшны тиринь велев, секскак эрзянь келензэ эзизе стувто ды парсте машты кортамо. Раиса Петровнань поселкав ускизе мирдезэ, сон эрзянь келенть а пек содасы, ансяк пек вечксы ды, кода машты, бажи ванстомс эрзянь культуранть ды койтнень. Аватне морсить раськень ансамблясо, стыть-викшнить эстест эрзянь палят, юткошкасто ловныть минек газетанть.
– Минь мельспаросо сакшнотано «Шумбратов», эдь те эрзятнень вастовома тарка. Течинь чинтень панинек эрзянь прякат, каймакт, пидинек сывелень прякинеть, овтонь лапат… Седеесь кенярды, зярдо марятано эрзянь морот, нетяно Мордовиясто морыця ды киштиця коллективтнень. Тесэ течи теке келень лисьмаприне, симат-симат, седееть витеви, – кортась тенек Раиса Петровна.
Вастовинек минь «Лисьмине» фольклоронь ансамблянь ветиенть Екатерина Морозова мартояк. Кевкстинек, костонь те мазый эрзянь оршамопельсэ эрзянь бояравась? А сон аволь эрзя, аволь мокшо – рузава, конанть седейсэ палы покш толнэ ды вечкема Россиянь культуратненень. Ламо эйдень триця авась сась эрямо Оркинав Саратовасто ды ней виевгавты тесэ эрзянь ды мокшонь раськетнень койтнень-кирдатнень, вети эйкакштненень «Эрзяночка» кружок, тонавты сынст морамо минек раськень морынеть. Сондензэ башка ловнодо сыця номертнэсэ.
Марина Девятова