Декабрянь 7-це чистэ Республикань Культурань кудосо евтызь «Шумбрат, Мордовия!» республикань сехте покш, вечкевикс ды раськень фестивалень цетамотнень. Эрьва ие сон пурны тежат ломанть, конатнень вейсэнди Тиринь масторонтень вечкемась, койтнень-кирдатнень ды культурань сюпавчитнень ванстомадо мелявтомась.
Тедеде фестивалень участникекс кармасть ниле тежадо ламо ломанть. Те эрьва кодамо профессиянь ды эрьва кодамо иесэ ломанть – фольклоронь ансамблят, раськень моронь коллективть, ветеранонь хорт, эйкакшонь группат, авторт-морыцят, хореографической ды инструментальной коллективть, СВО-нь участникть.
Весе участниктненень ды ваныцятненень пшкадсь Мордовиянь Прявтось Артем Здунов.
«Ниле тежат ломанть – арсетядо, кодамо мелень явома! Эйстэст кавто пель марто тежатне – те од ломанть. Те корты седе, минь одкстомтано, кастано, пачтятано эсь культуранть минек эйкакштненень. Меельце иетнестэ минек Президентэнть лезксэнзэ вельде минь ладинек оборудования велень ды муниципальной 30 ламо клубтнес, одкстомтынек оршамопельтнень ды инструменттнэнь – те истя жо пек эрявикс ды покш тев», – мерсь Мордовиянь Прявтось.
Фестивалень сехте од участникекс тедеде кармасть Саранскойстэ ниле ковсо Артем Кормишин ды Ельникень районсто вете иесэ Ирина Келина. А верце планкась, кода мерсь Артем Здунов, тесэ арась. «Шумбратонтень» весе иетне ладить!
Те иень фестивалесь алтазель зярыя прявт читненень: Ине Изнямонь 80 иетненень, Отечествань ванстыцянь иентень ды Историянь ледстнемань иентень. Ды сехте виев цяпамотне алтавсть фестивалень участниктненень – СВО-нь боецтнэнень. Дивавтыця покш ерокчи марто ломанть! Сынст морамосост ульнесь аволь ансяк покш докачи, истя жо седейлембе ды видечи – стака ледстнематнеде ды а витевиця емавкстнэде. Сехте покш кажось – те войнась.
«СВОи герои» номинациясонть фестивалень диплом ды ледстнемань казнеть максозь специальной военной операциянь участниктненень:
Артур Сычевнень – Зубова-Полянань районось;
Андрей Барашкиннэнь – Инсаронь районось;
Руслан Пантелейкиннэнь – Инсаронь районось;
Николай Кочегаровнень – Ковылкинань районось;
Дмитрий Волковнень – Ромодановань районось;
Денис Салдатовнень – Саранск ош;
Александр Кузиннэнь – Рузаевкань районось.
«Молитва комбата» моронть морамонзо кисэ башка диплом максозь Лямбирень райононь Покш Елховка велень Воскресенской церьковань настоятелентень Владимир протоиереентень.
«Муниципальные образования с численностью населения до 10 000 человек» номинациясонть III степенень лауреатонь диплом ды 300 тежат целковойс сертификат максозь Темниковань райононь шкинемань коллективтненень,
II степенень лауреатонь диплом ды 400 тежат целковойс сертификат максозь Сыре Шайговань райононь шкинемань коллективтненень,
I степенень лауреатонь диплом ды 600 тежат целковойс сертификат максозь Кочкуровань райононь шкинемань коллективтненень.
«Муниципальные образования с численностью населения свыше 10 000 человек» номинациясонть колмоце тарканть саизе Торбеевань районось, омбоценть – Ковылкинань районось, изницякс жо лиссь Ромодановань районось.
Фестивалень Гран-прись ды 1 миллион целковойс сертификатось максозь Лямбирень райононтень.