Сентябрянь 28-це чистэ Саратовань областень Петровской райононь Оркина велесэ ютась «Шумбрат» эрзянь ды мокшонь культурань регионъютконь фестиваль. Сонзэ инжетнень ды участниктнень вастсть региононь эрьва кодамо районтнэ, сынь анокстасть декоративно-прикладной творчествань ды раськень ярсамопелень выставка. Оружиянь макетэнь пек паро выставка невтсь Оркинань эрицясь Виктор Фёдоров.
Инжетне путсть цецят Ине Отечественной войнасо чавовозтненень кеврунгонтень ды Александр Кузнецовонь мемориальной лазонтень. Сон ульнесь «Кучугуры» фольклорно-этнографической ансамблянь ветицякс ды аккомпаниаторокс.
Оркинань Культурань кудосо, Национальной культурань центрасо ютасть киштемань, чувтосто керсемань, эрзянь някань теемань коряс мастер-класст. Истя жо невтевсь Алпатовтнень семиянть картинань выставкаст. Од артыцясь Эмилия Алпатова ютавтсь эйкакштнень марто мельстуиця творческой интерактив.
Инжетне мельспаросо ванкшнызь «Эрзянь ды мокшонь оршамопельтне» выставканть. Ваннызь эрзянь ды мокшонь культурань музеенть, косо пурназь минек раськеденть сюпав экспозиция.
Концертэсь ушодовсь «Широка страна моя родная» моросонть, конань вейсэ морасть весе ансамблятне.
Седе тов инжетненень невтезель свадьбань коесь. Сон алтавсь РФ-со Семиянь иентень. Пурнавозтне натой сыргасть киштеме, истя мазыйстэ седясь баянсо Павел Леонтьев! Сцена лангсо ульнесть Саратовань областень зярыя коллективть. Оркинань «Кучугуры» ды «Лисьмине» фольклорной коллективтне.
Весень туртов паро казнекс кармась
Г.И. Сураев-Королев лемсэ «Келу» фольклорной ансамблянть морамозо. Сынь гайгстызь эрзянь ды мокшонь кезэрень моротнень. Ваныцятне вастызь лембестэ, весе седейстэ цяпасть Мордовиянь артисттнэнень.
«Шумбрат» кенярксчив сакшность инжеть Мордовиясто, Башкортостансто, Пензань областьстэ. Тесэ ульнесть областень Думань депутаттнэ, раськетнень вейсэндявкстнэнь прявттнэ.
Паро валт пурнавозтненень ёвтасть Саратовань областень внутренней политикань ды общественной тевень министрань полавтыцясь Тимофей Лещенко, МР-нь культурань, раськень политикань ды архивень тевень министрань васенце полавтыцясь Александр Карьгин, Эрзянь ды мокшонь раськень регионъютконь общественной вейсэндявксонь исполкомонь прявтось Татьяна Ларина. Сюкпрянь вал марто весенень пшкадсь Саратовань «Шумбрат» Эрзянь ды мокшонь национально-культурной центрань прявтось В. И. Кривошеева. Мельстуиця казнесэ казевсть ансамблясо морыцятне, сетне, кить теить покш путовкс раськень койтнень ванстомасо ды вельмевтемасо.
«Шумбрат» кенярксчись вейсэндинзе Саратовань областьсэ эриця эрзятнень ды мокшотнень, лия раськень ломантнень, конат зярыя пингень перть эрить тесэ ялгаксчисэ. Тимофей Лещенко, Саратовань областень внутренней политикань ды общественной отношениятнень министрань полавтыця:
– Национально-культурной вейсэндявкстнэнь марто минь ютавтнетяно эрьва кодат культурно-массовой мероприятият, конатнень вельде а стувтовить ды ванстовить раськетнень койтне-кирдатне ды культурась. Кармась паро коекс ютавтнемс Петровской райононь Оркина велесэ «Шумбрат» национально-фольклорной праздникенть, козонь пурнавкшныть аволь ансяк Саратовань эрзятне ды мокшотне, сакшныть делегацият Мордовиясто ды лия регионтнэстэ, косо эрить неть раськетне. Ютавтнетяно лия лувонь вастовоматкак: фольклорной концертт, тиринь келень ванстомань ды кемекстамонь коряс кругловой стольть, выставкат… Меельце ловоматнень коряс, эрзятнеде ды мокшотнеде Саратовань областьсэ весемезэ 10,9 тёжат, те 0,43 % весе эрицятнестэ, ды те цифрась аволь вишкине.
Минек Внутренней политикань ды общественной отношениятнень министерствась кирди весе ушодкстнэнь, проекттнэнь ды арсевкстнэнь, конатне алтазь раськетнень ютксо вейсладямонь гармонизациянть туртов.
Минь мельспаросо кирдтяно оянь сюлмот Мордовиянь Минкультнацонть марто. Содатано, сынь лездыть Россиянь субъекттнэсэ важодиця эрзянь ды мокшонь культурань центратненень. Бути кортамс «Шумбрат» МНКЦ-донть, конась панжовсь сисем иеде теде икеле Саратова ёнкссо, тешкстаса, те вейсэндявксонь прявтось Валентина Кривошеева минек министерстванть ды тынк республикань министерстватнень ды ведомстватнень марто кеме сюлмиця. Валентина Ивановна ломанесь а оймиця седей марто, неть иетнень перть невтизе прянзо ансяк паро ёндо. Сон эрзянь ды мокшонь раськень культурань мероприятиятнень ушодыця, анокстыця, истя жо тиринь масторонь покш патриот, ламо мезе теи од ломантнень патриотической лувсо кастомань коряс. Кирди кеме сюлмот кода лия НКО-тнень, истя жо «Гвардейская смена», «Росгвардия» военно-патриотической вейсэндявкстнэнь марто. Вейсэ ютавтнить Мужествань урокт, ледстнемань чить, акцият. Валентина Кривошеева сови Саратова ёнксонь Губернаторонть юрсо панжозь Национально-культурной организациятнень марто вейсладямонь советс, сон – региононь общественно-политической эрямонь редявикс активист.
Саратовасо эриця эрзятнень ды мокшотнень ютксто мон, нама, тешкставлия эштё Павел Фёдорович Чатуровонь. Ней сонзэ тевензэ полады цёразо – Фёдор Чатуров. Павел Фёдорович ульнесь «Равось – ояксчинь лей» фестиваленть-экспедициянть, кода мерить рузонь кельсэ, «идейной вдохновитель», ды, кода нетяно, те проектэсь эри уш 23-це ие, сон пек эрявикс, вечкевикс, ды мон эзинь марсе истят аналогтнеде лия регионтнэсэ.