Пятница, марта 29, 2024
Важное

Мордовиянь цёрантень Вячеслав Асановнень, кона чачсь-кассь Покш Березникень райононь Ало Велесэ (Чёрная Промза), аволь умок максозель «Заслуженный работник транспорта РФ» покш лемесь. Те Указонть тешкстызе сонсь Россиянь Президентэсь Владимир Владимирович ПУТИН.



Вячеслав Асанов колоньгемень вете иеде икеле, армиядо мейле сеске, кармась важодеме автобусонь шоферэкс Саранск ошонь «Мордовавтотранс»-со ды важоди тосо те шкас. Сон уш ламо иень перть ускси автобусонь пассажиртнэнь Мордовиянь районтнэва, истя жо Московов, Пензав, Нижней Новгородов, Самарав, Саратовав ды лия оштнева.

«Важодемань вейсэнь стажом – 35 иеде ламо. Овсе од цёрынькакс ушодынь тонавтнеме ардтнеме ЗИЛ-сэ. Нама, ветницянь тевесь аволь шождатнестэ, пек ответственной, ялатеке эсень тевем вечкса! Эрьва чистэ покш мельспаросо сырган важодеме, эсень вечкевикс тевем топавтомо. Седейшкава кенярдан сенень, сонсь Владимир Владимирович Путин истя питнейстэ тешкстызе а шожда тевем», – истя ёвтни сонсь Вячеслав Александрович.

Вячеслав Александрович Асанов, тевтнень лангс апак вано, яла чуросто сакшны эсензэ тиринь Ало Велев, а стувтни эйсэнзэ, пек вечксы эсь тиринь ёнксонзо! Эдь тезэнь сон 1964 иестэ чачсь, тесэ кассь, тесэ ютась эйкакшпоразо. Кода а вечкемс эсь тиринь ёнксонть, косо эрясть покштянзо-раськензэ, тетянзо-аванзо, ялаксонзо-сазоронзо… Эдь Ало Велень ульцятнесэ Слава эйкакшпорасто васенцеде буксовась рудазонь шкане эсензэ налкшкесэнзэ, конань теекшнизе тензэ тиринь тетязо, кона сестэ, нама, эзь сода седе, што ютыть ламо иеть, касы Слава цёраст покшсто, карми превеекс ды тевень вечкицякс, моли тонавтнеме шоферэнь а шожда тевентень ды сонсь Россиянь Президентэсь Владимир Владимирович Путин истя питнейстэ тешкстасы сонзэ лемензэ…

Миньгак седейшкава кецятано те покш ды питней казненть максоманзо кувалма, арсетяно Вячеслав Александровичнень кеме шумбрачи, покш уцяска ды зыянтомо киланго!

Мила БОГАТОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».