Те иесь минек республикасо сюпав мероприятиянь коряс. Сынь алтавить Мордовиянь автономиянть теевемань 95 иетненень, невтить, кода республикась кассь-виевгадсь, ёвтнить эрзятнень ды мокшотнень раськень койтнеде, кенярксчитнеде, содавтыть минек культуранть марто. Эрзянь ды мокшонь раськесь – Российской Федерациясо государствань теиця раськетнестэ вейкесь. Раськень культуранть, кельтнень, койтнень-кирдатнень ванстомась сонзэ туртов ашти прявт тевекс.
Весе те шканть перть минек республикась виевгавтови ламо лия ёнксонь коряскак. Паро полавтомат редявить экономикасо, политикасо, социальной сферасо ды истя седе тов. Неень шкане республикань районтнэсэ одкстомтовить культурань кудотне, теевить культурань досуговой центрат. Аволь пек умок истямо седеень витема тарка панжовсь Покш Березниксэ. Тосо ютавтовить ламо мелень витемань тевть.
Неть читнестэ тосо ютавтозель «Пою тебя, моя Мордовия!» лементь ало торжественной мероприятия. Те кенярксчись алтавсь Мордовской автономиянтень 95 иетнень топодемантень. Эрицятнень марто кенярксчинть ютавтомо сакшность Покш Березникень райононь администрациянь прявтось Иван Игонов, МР-нь Госсобраниянь депутатось Евгений Ледяйкин, Покш Березникень депутатонь райсоветэнь прявтось Алексей Топорков, Ветеранонь райсоветэнь Эрзя-мокшонь раськень регионъютконь общественной вейсэндявксонь местной отделениянь прявтось Пётр Прокин.
Мордовиянь Гимнанть кунсоломадо мейле ушодовсь кенярксчись. Васняяк сонзэ коряс поздоровт ёвтась Покш Березникень муниципальной райононь прявтось Иван Игонов. Иван Иванович тешкстась, Покш Березникесь – весе республиканть вишка пельксэзэ, сонзэ ули таликазо Мордовиянть виевгавтомасо, раськенть сюпалгавтомасо.
Виде, истят мероприятиятнесэ а седе вишкине мель явови специальной военной операциянь участниктненень, кить неень шкане ванстыть минек масторонть. Сынст ютксо улить Покш Березникень районсо чачозтне-касозтне. Неть цёратненень ды сынст семиятненень алкуксонь лезксэнь максомась – те минек васень тевенек.
Седе тов ушодовсь кенярксчинтень алтазь концертэнь программась. Киштицятне ды морыцятне седейшкава невтизь эсь ёрокчист. Рузонь ды эрзянь морот серьгедсть «Парынза» народной фольклорной ансамблясь, «Инерка» эстрадной вокальной ансамблясь, «Воля» цёрань ансамблясь, «Радужки» эйкакшонь вокальной ансамблясь, А. Смоланов, А.Кудряшов, Ю. Ворожейкина, Т. Потапова солисттнэ.
Кода свал, пси цяпамосо вастозельть минек республикань ды масторонь келес содавикс Покш Березникень райононь Парынзэлень мазыйстэ морыцятне Полина Тюрькина ды Елена Ледяйкина.
Истят мероприятиятне а максыть стувтомс минек историянть, покштянок-бабанок койтнень-кирдатнень ды, нама, тиринь келенек.
Валентина ВЛАДИМИРОВА