Пятница, марта 29, 2024
Важное

Ютазь недлянь середасто М.Е. Евсевьев лемсэ МГПУ-со ютась творческой вастовома Мордовиянь национальной газетатнень ды журналтнэнь прявттнэнь ды представительтнень марто, конась анокстазель «Продвижение» тиринь келень ды литературань научно-образовательной центранть лезксэнзэ вельде. 

Те вастовомась, конань МГПУ-нь филологиянь наукань докторось, тиринь келень ды литературань кафедрань доцентэсь О.И. Налдеева арсекшнизе уш мелень апрельстэ, пандемиянть кувалма кадозель сыця иес. Ды вана тевесь топавтозель. Вастовомантень сакшность педуниверситетэнь тонавтомань коряс васенце проректорось С.М. Мумряева, филологиянь факультетэнь деканось С.Н. Степин, тонавтыцятне ды студенттнэ.

Национальной изданиятнень пельде ульнесть «Эрзянь правдань» прявт редакторось М.Н. Девятова, «Сятко», «Якстерь тяштеня», «Чилисема» журналтнэнь прявт редактортнэ: Т.В. Разгуляева, В.И. Брындина, Е.В. Барцаева, «Мокша» журналонь сотрудникесь М.В. Аникина ды «Мокшень правдань» прявт редакторонь полавтыцясь Н.М. Лобанов.

Панжизе вастовоманть С.М. Мумряева, кона ёвтась шумбракстнемань валт ректоронть М.В. Антоновань пельде ды содавтынзе пурнавозтнень «Продвижение» тиринь келень ды литературань научно-образовательной центранть марто. Студенттнэ-филологтне ёвтнесть, кода сынст факультетсэ важоди Эрзянь ды мокшонь кельтнень школась. О.И. Налдеева тешкстынзе сехте васенце ёнкстнэнь, конатнень коряс анокставить тиринь келень ды литературань тонавтыцятне. Мейле вал максозель вере ёвтазь газетатнесэ ды журналтнэсэ важодицятненень.

Сынь ёвтнесть эсь изданиятнень ютазь ды сыця шкадост, явшесть студенттнэнень ды тонавтыцятненень од номерт, тердсть сынст варчамс эсь пряст журналистикасо, стихень ды ёвтнемань сёрмадомасо. Газетатненень ды журналтнэнень неень шкане пек эрявить од кадрат, паряк, педуниверситетэнь студенттнэ сыця шкасто совить минек рядтнэс.

Эштё вейке мелявкс, конадонть кортасть пурнавозтне, те газетатнень ды журналтнэнь лангс сёрмадстомась. Тень коряс тевтне иеде иес стакалгадыть. Конёв лангс нолдазь газетатне ды журналтнэ ёмамо лангсот. «Сёрмадстомань кампаниясь теевсь сотрудниктнень туртов прянь покш сэредьксэкс, творчестванть лангс уш а сатокшныть вийтькак», – тешкстызе Т.В. Разгуляева. Те алкукскак истя. Од ломантне весе информациянть саить сайттнэстэ, социальной сеттнестэ, ансяк сынь зярдояк а полавтсызь газетатнень, кода электронной книгатне эзизь полавто алкуксонь книгатнень. Паро, улить свалшкань ловныцянок, конатне молить мартонок ламо иень перть.

Марина Девятова
Фотось Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».