Пятница, марта 29, 2024
Важное

Пек паро куля сась Отяжелень районсто Мордовиянь ды шабра регионтнэнь эрицятнень туртов. Ютазь недлясто тосо панжовсь «Каменка» пандо прясто сокссо кирякстнемань куншкакуро.

Ды истямо паро – Куршевельде а явови! Сонзэ стявтомань спонсорокс кармась «Талина» компаниянь группась ды прявтозо Виктор Бирюков. Роштовас те курось важодсь тестовой режимсэ, ансяк сонзэ варчамо сакшность уш тёжадо ламо туристт.

Сокссо ардтнемань центрась ашти Троицкие Бугры пандонть прясо, конась ашти 96 вайгельбеде васоло Саранск ошсто ды 16 вайгельбеде – Отяжелестэ. Сонзэ ушодызь строямо эштё кизна, ней те алкуксонь неень шкантень ладиця пандо прясто кирякстнемань куро. Эйсэнзэ важодить верев кавто кузнемкат (подъёмникть), пандось явозь колмо трассав: тонавтницятнень туртов, сетненень, кить уш парсте аштить сокс лангсо, ды тюбингсэ кирякстнема ян. Основной трассась нолды часозонзо 270 ломанть, сонзэ кувалмозо 450 метрат. Тешкстама, «Каменка» лемесь максозь маласо аштиця веленть кувалма, ансяк, кода корты Михаил Подмарев, «Талина» ФСК-нь прявтось,  сон путозь аламошкас, семс, зярс а кочкави лия.

Куншкакуросонть ули кафе, эйкакшонь нупальть, эй ланга кирякстнемка ды медпункт. Кинь арасть соксонзо эли тюбингезэ, сетненень ули инвентарень прокат. Тесэ важодить инструкторткак. Кода корты Виктор Бирюков, бути кирякстницятненень те таркась вечкеви, сестэ агрохолдингесь стявты тезэнь инжень кудо ды, паряк, санаторияяк. Кирякстнема пандось ашти пек мазый таркатнесэ: тесэ вирть ды паксят, косо эрить ламо ракшат, эрькеть, косо ламо калт. Секскак ули мель панжомс сафари-парк, калонь кундсемань пелькстамот, лишмесэ ардтневтемань клуб ды леднемань тарка. Кирякстнема тарканть эйстэ а васоло ашти туристтнэнь туртов эштё вейке мельстуиця стявтовкс, конадонть Мордовиясо а весе содыть. Минек газетась жо а весть сёрмалесь сондензэ. Те Живоначальной Троицянь храмось, конась умок яжазель-калавтозель. Сон ловови Мордовиянь сехте сыре храмтнестэ вейкекс. Стявтозель церьковась 1695 иестэ тосонь сюпав помещикенть Степан Григорьевич Чирковонь ярмаконзо лангс Италиянь мастертнэнь вийсэ. 1840 иестэ храмось одкстомтозель ды вакссонзо строязель баягань чавома од нупаль. Эйсэнзэ ульнесть кавто престолт: Живоначальной Троицянь ды Иневанькс Богородицань Роштовань. Советтнэнь шкасто церьковась пелевидьс калавтозель ды теезель утомокс. 1937 иестэ зданиянть арсекшнесть овсе калавтомс, ансяк тевесь топавтозель 1990-це иетнестэ, зярдо яжазель башнятнень марто кудось. Ней тосо седе ванстовсь ансяк баягань чавома таркась ды кирьпецень зярыя стенат. Кортыть, те храмось карми одкстомтовомо истя жо спонсортнэнь ярмак лангс. Тевесь пек паро. Тосонь ёнксось валсо а ёвтавиця, кода мерить яла, виень пурнамонь тарка! Храмось ашти пандо прясо, вакссонзо певтеме паксят ды сэнь менелесь. Пандотне васняяк кекшить эйсэнзэ, ялатеке, вайгельбешка ардозь, сон, а варманень а правтовиця, а ломаннень а изнявиця пазонь кудо, лиси ды невти эсь кеме виензэ.

Арсетяно, варштамс неть таркатнень ламонь карми мелест. Отяжбуев ардомсто туристтнэнень вечкеви Отяжелень  ташто церьковась, конась зярдояк эзь пекставкшно, Андрей Первозванный лемсэ од храмоськак, конась ашти посёлканть куншкасо, ды маласонзо стявтозь паровозось, Раськень культурань мазый центрась. Кемтяно, неть ёнкстнэ кармить вечкевикст инжетненень ды Мордовиясо панжови од туристической маршрут.

   Марина Девятова

Фототне:

С. Чиженковонь

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».