Ютазь оймсема читнестэ Орданьбуень районось тешкстызе чачома чинзэ – 96 иетнень. Истя жо тедеде 244 иеть топодсть Орданьбуе ошонтень.

Райононь чись – учовикс кенярксчи Орданьбуень весе эрицятнень ды инжетнень туртов. Эрьва ие те чистэнть ютавтовить мельстуиця вастовомат, концертт, ярмункат ды выставкат, косо тесэнь кедьчелькевтне невтить эсь ёрокчист ды шкинемаст.

Те кенярксчинтеньгак выставкась пурназель сюпав. Тесэ ульнесть чувтосто, керамикасто ды коцтсто эрьва кодат теевкст, а кодамо мазыйдеяк мазый люстра ды канделябра тесэ невтевсть! Теевксэсь, эряви меремс, филигранной. А вана тевс нолдавт материалось – фрукта алдо ящикть. Лиссь жо а ёвтавикс мазычи, конась виень коряс алкуксонь мастерэнть туртов. Истя жо тесэнь кедьчелькев аватне маштыть тикшестэ ковёронь ды някань кодамо. Штатолт, мазылгавтомапельть, кептереть, паргинеть, оршамот – сувениртнэ эрьвантень мелень коряс.

Нама, кенярксчинть перть весень каванясть тантей ярсамопельтнеде, конатне пидезь-панезь раськень койтнень кирдезь. Тесэ явовсь райононь эрьва поселениясь. Эдь эрзятнень кезэрень шкатнестэ саезь эрьва велесэнть ули эсест ярсамопель, конась анокстави ансяк покш кенярксчитнес.

Вейкеяк покш чи а ютакшны казневтеме. Орданьбуень райононь чачома чистэнть эйстэдест истя жо ульнесть ламо. Тешкстызь райононь ёроков эрицятнень ды эсь важодемасо сехте вадрятнень, ламо эйкакшонь триця семиятнень, СВО-нь таркатнесэ минек масторонть кисэ аштицятнень ды сынст малавиксэст.

Райононь прявтось Александр Антипов ёвтась покш сюкпря весе эрицятненень эсь тиринь ёнкссо эрямонть вадрялгавтоманть кисэ.
Кодамо кенярксчи моровтомо ды спортонь пелькстамотневтеме. Тесэ эсь ёрокчист невтизь покшнек-вишкиненек. Шкинемань коллективтне весень кенярдовтызь раськень моротнесэ ды неень шкань хиттнэсэ.
Кенярксчись ютась лембестэ. Мероприятиясь весенень казсь а стувтовикс мельёжо.

Фототне саезь Баёньбуень ДК-нь соцсетень куросто ды «Маяк» Орданьбуень райгазетасто