Четверг, марта 28, 2024
Важное
 
«Мерема» раськень фольклорной ансамблясь, конань прявтсо Мордовия Республикань культурань заслуженной роботникесь Екатерина Модина («Саранск ошонь Культурань дворец» МБУК), «Лаймоня» эйкакшонь фольклорной ансамблясь, прявтось – Мордовия Республикань культурань заслуженной роботникесь Виктор Пивкин (Сыре Шайговань райононь «Центр национальной культуры» МБУК) ды Сыре Теризморга велестэ викшницясь Анна Цыганова невтизь ёрокчист покш мероприятиятнесэ, конатне ютавтовсть Чувашия Республикасо.


Июнень 22-27-це читнестэ Чувашия Республикасо ютасть Весероссиянь ниле фестивальть: «Родники России» раськень творчествань Весероссиянь ХХХ фестивалесь, Эйкакшонь весероссиянь васенце Фольклориадась, Эйкакшонь весероссиянь Ассамблеясь, «Русь мастеровая» декоративно-прикладной искусствань раськень кедьчелькевтнень весероссиянь ХХ пелькстамось.

Июнень 20-це ды 24-це читнестэ Чебоксары ошонь куншкакуронь Якстере площадьсэнть Россиянь комсь регионтнэстэ сазь 48 ламо кедьчелькевтне невтизь эсь мастерстваст декоративно-прикладной творчествань эрьва кодамо ёнкстнэсэ. Пелькстамось мольсь ульцясо. Сонзэ участниктне кавксо часонь перть тейсть «Россыпь народных умельцев» теманть коряс эсь произведенияст. Пелькстамось мольсь истямо номинациятнева: «Вышивка», «Ткачество», «Лоскутное шитьё», «Текстильная кукла», «Художественный бисер», «Художественная береста», «Резьба по дереву», «Роспись по дереву», «Керамика», «Художественная обработка растительных материалов», «Войлоковаляние», «Художественная обработка кожи». Ваныцятне ды участниктне ульнесть мастер-класстнэсэ, теевсть содавиксэкс Россиянь содавикс кедьчелькевтнень марто.

«Русь мастеровая» декоративно-прикладной искусствань раськень мастертнэнь конкурссонть Мордовиянть пельде ульнесь Сыре Шайговань райононь Сыре Теризморга велень Раськень культурань центрань викшницясь Анна Ивановна Цыганова. Сон невтизе мокшонь викшнемань лиятнень ёнов амолемачинть. Творческой важодевксэнтень, конань сон теизе пелькстамосонть, совавтынзе эрзя-мокшонь викшнемань кезэрень койтнень, культуранть ды неень шкань элементтнэнь.

Июнень 22-24-це читнестэ Чебоксарынь прявт площадьсэнть ютавтозель «Родники России» раськень творчествань Весероссиянь ХХХ фестивалесь. Рав леенть чирес фестивалесь пурнакшнынзе масторонь кемень регионтнэстэ шкинемань коллективтнень. Эйсэнзэ ёрокчист невтизь Чувашиянь, Башкириянь, Татарстанонь, Ульяновскоень, Тверень, Коми Республикань, Марий Элэнь, Мордовиянь, Пермень краень, Нижегородской ды Рязанень областтнень малав 200 артистт. Фестивалень программантень совасть эрьва кодамо ёнксонь, лувонь ды жанрань художественной коллективтнень невтемаст. Мероприятиятне ютасть Чебоксарынь зярыя творческой площадкатнева ды республикань лия оштнева.
Эрзянь ды мокшонь раськетнень морамонь явовиксчинть мероприятиясонть невтизь «Мерема» фольклорной ансамблянтень совицятне. Фестивалень торжественной панжомасонть сынь морасть кавто морот: «Розь паксенесь» ды «Вай, тядяней». Мейле морызь «Пазчанготь» ды «Эх, вай, ех» моротнень.

Фестивалень омбоце чистэнть «Меремась» морамонь колчинзэ невтизе Рав леенть чиресэ аштиця Мариинской Посад кезэрень ошсонть. Фольклорной ансамблянть 40 минутас концертэнь программазо пек тусь ваныцятнень мельс, конатне эзть кирдеве таркасост, тукшность киштеме морыцятнень марто вейсэ. Истя жо весень седеест ансамблясь солавтынзе раськень моротнень неень шкань лувсо морамосост.

Сень лангс апак вано, кунсолыцятнестэ ламотне эзть чарькоде валтнэнь, ялатеке мазый вайгельтне кармавтызь сынст мезе вийть цяпамо. Раськень моротне, конатне моразельть оймень путозь, эзизь кадо мельтеме вейкеяк ваныцянть.

«Мерема» ансамблянтень совицятне те чистэнть саезельть купецень бытэнь музеев, истя жо сынь ульнесть ошонь сехте сэрей таркасонть, Инязоронь пандонть лангсо. Истя сон лемдеви секс, тесэ 1767 иестэ ульнесь Екатерина II Инязоравась.

Сюпав ды эрьва кодамо ёнксонь фестивалень культурной программась прядозель гала-концертсэ. Эйсэнзэ Саранскоень «Меремась» морызе неень шкань обработкасо «Адя, киял, мазый репсэнь саламо» эрзянь кезэрень моронть, конантень покш питне путсть кода Чувашиянь раськень моронь искусствасонть специалисттнэ, истя жо весе кунсолыцятне. Фестивальсэнть участиянть кис минек шкинемань коллективесь казевсь дипломсо ды питней казнесэ. «Мерема» фольклорной ансамблянь прявтось Екатерина Модина тердезель Эйкакшонь весероссиянь ассамблеянь жюринть составс.
Июнень 25-27-це читнестэ Чувашиясь вастсь Весероссиянь эйкакшонь васенце фольклориадань инжеть. Фольклориадась – те фольклорной покш фестиваль, конасонть Россиянь ламо ёнксонь койтнень-кирдатнень невтсть эйкакшонь ды од ломанень любительской творческой коллективтне.

Фольклориаданть лувсо ульнесть торжественной церемоният ды ульцятнева вейсэ ютамот, регионтнэнь презентацият, ояксчинь чокшнеть, выставкат, мастер-класст, творческой мастерскойть, ярмункат ды флешмобт. Фольклориадась поладозель Эйкакшонь фольклорной ассамблеясо, конасонть ёрокчинь коряс пелькстасть эйкакшонь ды од ломанень фольклорной коллективтне.
Мордовиянть пельде Фольклориадасонть ульнесь Сыре Шайговань райононь Сыре Теризморга велень Национальной культурань центрань «Лаймоня» эйкакшонь фольклорной ансамблясь. Эйзэнзэ совицятне ёрокчист невтизь ошонь ды тосонь районтнэва эрьва кодат площадкатнень лангсо. Сынь морызь «Вай, Ваняня, Ваняня», «Луга», «Арька, Арька, ялгаканей» моротнень. «Лаймоня» эйкакшонь коллективесь кармась васенце Фольклориадань дипломантокс, казевсь раськень койтнень ванстоманть ды фестивальсэнть участиянть кис дипломсо. Истя жо сынст тешкстызь «Государственный Российский Дом народного творчества имени В. Д. Поленова» ФГБУК-нь Рузонь фольклоронь центрась ды Чувашия Республикань Прявтось.
Республикань Раськень творчествань кудось Весероссиянь фестивальтнесэ ды пелькстамотнесэ участниктненень ёвты сюкпря ды арси тенст од изнявкст!

Зинаида Ляшина,
«Республиканский Дом народного
творчества» ГБУК-нь раськень коень шкинемань отделэнь прявт.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».