Вана сась сентябряськак, зярдо эйкакштне пурныть школав. Кинень-бути те карми васенце тонавтнема иекс, кинень-бути – меельце. Ды кортамось моли аволь ансяк эйкакштнеде. Тонавтыцятнедеяк веенстнэ васенцеде молить школав важодеме, лиятне тешкстыть сентябрянь меельце васень чинть. Истямотнень ютксо Надежда Евгеньевна Кривова, кона 3-це № школасо важоди 40-це ие. Сон – начальной классонь тонавтыця.
Надежда Евгеньевна сонськак тонавтнесь теке школасонть. Кавксо классонь прядомадо мейле, 1980 иестэ, кармась тонавтнеме Ицялонь педучилищасо. Сонзэ прядомадо мейле направлениянь коряс кучизь важодеме Саранскоень 10-це № школав. Тов саиксэлизь старшей вожатоекс. Августсто анокстась уш сентябрянь 1-це чинь линейкас, кода автобуссо ардомсто эртевсь Р. А. Титовас, кона се шкастонть важодсь 3-це № школань начальной классонь завучекс. Директорокс сестэ тосо ульнесь Г. Ф. Морозов, конанень Раиса Александровна сеске ветизе од тейтеренть. Раиса Титовань, кона мейле куватень шкас карми те школань директорокс, сестэ ульнесь покш мелезэ, штобу весе 3-це № школань прядыцятне саст важодеме эсест тиринь школав. Истя лисськак, Григорий Морозов сёрмадсь энялдома 10-це № школав ды од тейтеренть ютавтызь эсензэ школас. Истя, 1984 иестэ саезь, Надежда Евгеньевнань ушодовсь начальной классонь тонавтыцянь важодемань кизэ. Шкань ютазь, тейтересь тусь высшей образования мельга. Тонавтнесь Н. П. Огарёв лемсэ МГУ-нь географической факультетсэ, ансяк ялатеке эзизе кадо начальной школанть.
А лововитькак, зяро те шкань перть тонавтозь ловномо ды сёрмадомо вишка эйкакштнеде. Нолдазь кеменде ламо начальной школань класст. Ёвтазь ламо сюкпрянь валт. Тонавтницянзо нейгак а стувтнесызь, гайневтить тензэ покш читнестэ, кучить поздоровт ды лембе валт ды ули мезень кис. Истямо дисциплина, кодамо эрси Надежда Евгеньевнань классо, аламот, кить маштыть кирдеме. Сонзэ классо сэтьмечи натой переменастояк. Тонавтыцянть валонзо коряс, кодамо бу превей ды ёроков тонавтыцясь аволь уле, васенце таркасо свал улезэ дисциплинась ды уроконть сэтьмечисэ ютавтомась. – Шалтсо натой виев эйкакштнеяк а кармить марямо тонавтыцянть толковамонзо. Дисциплинас тонавтома васенце читнестэ саезь. Толковат тенст, бути карматадо пижнеме, а марясынк, мезде моли кортамось, мейле а чарькодьсынк теманть. Темань апак чарькоде а лиси парсте тонавтнема, истя кармить берянь отметканк, – ёвтни Надежда Евгеньевна, – истя васенце классто саезь эрьва чистэ ледстяма тенст, кода эряви ветямс эсь прянть школасо. Лиякс малав колоньгемень эйкакшт кодаяк а тонавтовить. А бути дисциплина ули, сынь маритькак, неитькак ды мезеяк саить превс. Теде башка, каштмолеме тонавтан столовойсэяк. Мерян, чоп шалтсо пидицятне мезе тенк пидить? Истя прясткак кармить сэредеме. Ды тынсенкак ярсамо шкасто кортамонк лэзэс а пачти. Ярсамс эряви чатьмонезь… Истя прянь ветямодо ледстяма апак лотксе, натой, столовойсэяк, аволь ансяк уроксо».
Омбоцесь, мезесь пек эрявикс эйкакштнень парсте тонавтомасо, те тетятнень-аватнень ёндо лезксэсь: аволизь кадо вишка классонь эйкакшонть васень класстнэстэ ськамонзо, аштевельть мартонзо ды лездавольть анокстамс урокт. Сынст лезкстэме тонавтыцясь ськамонзо аламо мезе теи. Кемекстамс тонавтозенть эряви кудосояк. Секскак эйкакшонть тонавтомасо семиясь ды школась молест вейке лувсо.
Ды колмоцесь, сехте эрявиксэсь – эряви вечкемс эйкакштнень, конань тонавтат. Ансяк те покш вечкемась лезды кирдемс весе стакачитнень. Бути тонавтыцясь а вечки эйкакшт, сонензэ пек стака важодемс школасо.
Надежда Евгеньевна ёвтни: «Лиясто жалятано эйсэст. Чарькодтяно, мекс лиясто эйкакшось эзь удово – те эли тона семиясонть тетятне-аватне а явить эрявикс мель эйкакшонтень, сёвныть, симить чапамодонть, аксунгалить – а кевкстьсак, содат, мезеяк течи теть а ёвтни…». Истя, эрьва семиянть мельсэ кирдезь, содазь, кие кода эри, эряви важодемс тонавтыцянтень. Ней стака эрси аволь ансяк эйкакштнень марто, истя жо тетятнень-автнень мартояк. Сеске гайгстыть пеняцямо тонавтыцянть лангс, бути мезеяк мелезэст а туи.
«А стяко авам, кона истя жо начальной школань тонавтыцяль, кортась: «Тейтерем, сисем пеель лангсо кармат важодеме. Маштт вачкодьксэнь кирдеме…» – тешксты Надежда Евгеньевна. Паряк, текень кувалма од ломантнестэяк аламот кить молить важодеме школав. Эйкакштнеяк седе кольневтезь. Ансяк тесэ чумот тетятнеяк-аватнеяк. Штобу эйкакшось илязо аксунгале, нерьгстасызь тензэ телефононть ды кадык эйсэнзэ сокари… Мейле тонавтыцянтень сави кардамс эйкакшонть те зыянов тевденть ды ушодомс тонавтомонзо.
Надежда Евгеньевнань авазо чачсь Покш Игнатбуень Новое Качаево велесэ. Эрзяваль. Эрзякс кортамо тонавтызе тейтерензэяк. Надежда Евгеньевнань мирдезэ умок уш арась... Кавто цёранзо прядсть Казанской духовной семинария ды мейле заочна тонавтнесть Н. П. Огарёв лемсэ университетсэ. Вейкесь прядсь исторической факультет, омбоцесь – филологической. Ней служить Елабугасо. Вейке нуцьказо моли котоце классос, налкси хоккейсэ ды футболсо. Омбоцесь – 2-цес, фигуристка. Неть эйкакштне васенце цёранть. Омбоценть эйкакшт арасть, алтызе эрямонзо Пазонтень, стявты часовнят.
Те иень майстэ 3-це № школасо панжовсь мемориальной лаз СВО-со чавовозтнень туртов. Ютксост Надежда Евгеньевнань ялаксозо – Сергей Евгеньевич Лапин. Сон казезь Мужествань кавто ордентнэсэ. Вейкесь максозель эрямонзо пингстэ, омбоцесь – куломадонзо мейле.
Н. Е. Кривова – трудонь ветеран, казезь «Почётный работник образования» лемсэ. Тедеде сон нолды 4-це классонзо, конадо мейле арси кадомс школанть ды туемс оймсеме. Арсетяно тензэ кеме шумбрачи ды уцяска! Пазось максозо сэтьме ды кувака эрямо! Истят виев тонавтыцятнень школасто нолдамскак бу а эряволь. Пельдензэ тонавтнема одтнэненьгак.
Марина Агафонова