Июнень 26-це чистэ Саранскоень куншкакуросо, «Эрзянь ды мокшонь подворья» музейно-этнографической комплексэнть вакссо, панжовсь регионъютконь чувтосто керсицятнень «Морыця чувто» («Поющее дерево») фестивалесь. Сонзэ анокстыцянзо ды ютавтыцянзо – МР-нь Культурань, национальной политикань ды архивень тевень министерствась, Эрзя-мокшонь раськень регионъютконь общественной вейсэндявксось.
Кезэрень шкасто саезь эрзя-мокшонь моданть лангсо ояксчисэ эрить ламо раськень ломанть. Сынст ды Равчирень весе регионтнэнь культурань койтнень-кирдатнень вельмевтемга ды ванстомга ютавтови «Морыця чувто» фестивалесь-конкурсось, конась минек республикасо вейсэнди Россиянь сехте ёроков керсицятнень. Неть: Удмуртиясто – Сергей Назаров, Самарань ёнкссто – Владимир Илюшин, Пензань ёнкссто – Александр Туркичев, Чувашиясто – Евгений Акимов, Ульяновскойстэ – Минибулат Абдрхимов, Мордовиясто – Пётр Рябов, Московонь областьстэ – Николай Гетьман, Нижней Новгородсто – Николай Аношкин.
Фестиваленть панжомсто пурнавозтненень паронь арсема марто пшкадсть: МР-нь Культурань, национальной политикань ды архивень тевень министрась Светлана Баулина, Эрзя-мокшонь регионъютконь мордовской общественной организациянь прявтось Юрий Мишанин ды Народной художникесь Анатолий Баргов.
Чувтосто кедьчелькев керсицятнень пельде сынст тердицятненень сюкпрянь валт ёвтась Пенза ёнксонь мастерэсь Александр Туркичев.
Теке жо чистэнть регионъютконь керсицятнень «Морыця чувто» фестиваленть-конкурсонть ютавтома тарканть содавтызь «Лихтибря» кизэнь лагерьсэ оймсицятне. Фестивалесь тосо карми ютавтовомо июнень 30-це чис. Саранск ошонь эрицятне ды инжетне те таркантень тердевить скульптуратнень васня теемаст мельга, мейле – корязост итогтнень ваномо.
Седе тов неть важодевкстнэ аравтовить Лямбирень райононь Аксёнова велень этнической куросонть, косо июлень 1-2-це читнестэ ютавтови Весероссиянь Сабантуй велень кенярксчись. Зярс жо весе, кинь ули мелезэ неемс, кода вельми чувтось ды теевить эйстэнзэ ёвксонь геройтне, тердевить Эрзянь ды мокшонь подворьянть ваксс.
Валентина Юдина