Ожоковонь 15-це чистэ И. М. Яушев лемсэ музыкальной театрасо ютась «Финнэнь-угрань транзит» искусствань ды раськень творчествань раськеютконь фестивалень Гала-концертэсь. Тей сакшность Удмуртиянь, Ленинградонь ёнксонь, Коминь, Ямало-Ненецкой округонь, Коми-Пермяконь округонь, Карелиянь, Вологдань артисттнэ ды кедьчелькев ломантне.
Сынст туртов арсезель сюпав программа. Инжетне ваннызь Саранск ошонть, сайнизь Кочкурбуень Вирь Тавлань чувтосто керсемань школав, ютавтсть тенст эрьва кодат мастер-класст.
Кой-кона коллективтне васенцеде невтить пряст «Финнэнь-угрань транзит» фестивальсэ, лиятне ульнесть уш. Инжетнень марто ютась пресс-конференция. Сонзэ ветясть МР-нь Культурань, национальной политикань ды архивень тевень министрань васенце полавтыцясь А. И. Карьгин, Республикань раськень творчествань кудонь прявтось С. В. Чиндина. Коллективень ветицятне ёвтнесть, косто састь ды кода молить творческой тевест. Эрьвась ёвтась сюкпрянь валт фестивалень ютавтыцятненень, Мордовиянтень тесэ лембестэ вастоманть кис.
Татьяна Евгеньевна Щербинина сась Коми-Пермяконь округонь Пермень краень Кудымкар ошсто. Сон вети «Вежалун» (ютавтови кода «кенярксчи») коми-пермяконь моронь театра. Коллективсэнть кемгавтово ломанть. Ансяк Саранскоев састь аволь весе.
– Минь путнетяно музыкальной спектаклят. Тевс нолдатано кортамонь жанранть, невтнетяно иень перть молиця кенярксчинь тешкстамонь койтнень. Теде башка, тонавтнетяно фольклоронть, ютавттано ванкшномат-тонавтнемат. Покш меленек весементь ванстомс: моротнень, киштематнень, койтнень-кирдатнень. Мезть сёпомс, неень шкане весе те ёмамо лангсо… Ансамблянь участниктне весе содыть тиринь келест. Минек лангсо коми-пермяконь алкуксонь оршамопельть.
Эсенек концерттнэсэ мельспаросо невтнетяно коенек. Ломантне сакшныть тиринь келень кунсоломо. Сеедьстэ морсетяно Пермь ошсо, косо ютавтовить финнэнь-угрань раськетнень кенярксчить, истя жо эсенек ошсояк. Мартонок важоди профессиональной музыкант, тонавтымизь седямо кезэрень седямопельсэнть, сон флейтань кондямо. Од ломанть ютксонок арасть. Ули меленек тердемс театразонок эйкакшт, теемс мартост вейсэ кодамояк программа. Сёрмадынь проект, арсян путомс од ломантнень марто музыкальной спектакля.
«Финнэнь-угрань транзитсэ» минь васенцеде. А ёвтавияк, кодамо ёжонок! Мельспаросо теевинек содавиксэкс лия ёнкссто сазь коллективтнень марто. Монь мельс свал тукшныть авань оршамопельтне. Вана тынк, Мордовиясо, сынь ванстовсть. Ды те пек паро! Эрьва тюсось, тешксэсь канды кодамо-бути смусть, содамс тень – пек паро, – ёвтнесь Т. Е. Щербинина.
Гала-концертсэ «Вежалун» моронь театрась невтсь зярыя номерт. Сынь кенярдовтыцят, пейдевтицят.
Инжетнень туртов лембе вал марто пшкадсь МР-нь Культурань, национальной политикань ды архивень тевень министрась С.Н.Баулина:
– Весе стакачитнень лангс апак вано, миненек, культурасо важодицятненень, эряви пурнавкшномс. Эряви теемс весементь койтнень-кирдатнень, культуранть ванстомга. Истят вастовоматнесэ нетяно раськетнень культурань сюпавчист, промыслатнень ды ремеслатнень, ёвтнетяно творческой салавачитнеде, важодемань тевтнеде, марясынек раськень моротнень ды фольклоронь лия ёнов а молиця гайттнень. Кеман, Мордовиядо ледстнематне кувать кармить эждеме седеенк.
Истя жо сцена лангсо морасть Карелиянь «Верея» раськень моронь ансамблясь, Выборг ошонь «Вереск» ансамблясь, Салехардонь «Овс мув нэ» хантынь фольклоронь ансамблясь, Анастасия Ларцева ды «Закрутиха» коми-пермяконь фолк-группась, Удмуртиянь «Идиллия» мирдть-нить Лекомцевтнень дуэтэсь, Сыктывкаронь сервисэнь ды связень колледжень модань ды дизайнонь театрась невтсь мазый оршамопельть, онлайн вельде минь неинек омбо масторонь «Лейгарид» фольклоронь ансамблянть, северо-карелэнь ансамблянть, венгрань государственной фольклорной ансамблянть. Истя жо морасть эсенек коллективтне: В. И. Ромашкин лемсэ «Торама» фольклорной ансамблясь, «Мерема» народной фольклорной ансамблясь, Зубова-Полянань райононь «Мокшаваня» фольклорной коллективесь.
Башка тарка явозель декоративно-прикладной творчествань выставканть туртов. Тесэ невтневсть мазыйдеяк мазый викшневкст, кодавкст, оршамопельть, някат ды ламо мезе лия. Вологдасто сазь мастертнэ М. Ч. Медкова ды О. Ф. Кириллова невтнесть кружевань кодамонь салавачитнень.
«Финнэнь-угрань транзит» раськеютконь фестивалесь – В. Д. Поленов лемсэ «Финно-угорский культурный центр Российской Федерации» ГРДНТ-нь филиалонь проект. Сон поладови седе тов.
Татьяна Маторкина
Фототне Эдуард Ретунскиень