Январень 24-це чистэ Мордовия Республикань Государственной Собраниянь Председателесь Владимир Чибиркин вастовкшнось СМИ-тнень прявт редактортнэнь ды журналисттнэнь марто, конатне кармасть «Закон и власть» журналистэнь конкурсонь участникекс. Коень коряс изницятне тешкстазельть Мордовиянь Госсобраниянть чачома чистэнзэ.
Торжественной мероприятиясонть ульнесть МР-нь Госсобраниянь Председателень полавтыцятне Сергей Вдовин ды Евгений Тюрин.
Владимир Чибиркин тешкстынзе ютазь иень сехте содавикс тевтнень ды СМИ-тнень роленть региононть общественно-политической эрямосонть. Васняяк, Вайгелень максомань вейкине чинть анокстамсто ды ютавтомсто. «2021 иень кочкамотнень коряс информационной важодемась тердинзе республикань эрицятнень самс кочкамонь участкатнес ды максомс вайгелест мельстуиця кандидаттнэнь кис», – тешкстызе Владимир Чибиркин. Истя жо Владимир Васильевич ёвтась сюкпрянь валт СМИ-нь коллективтненень кезовонть изнямонь ды вакцинациянть коряс тематнень келейстэ панжоматнень, эрицятнень марто важодеманть кисэ. «Бажадо весементь сёрмадомс видестэ, роботадо масторонть, республиканть ды ломантнень лезэс».
Тедеде журналистэнь конкурсонь изницятне казезельть кото номинациясо. Казнетнень явшизь Владимир Чибиркин ды Сергей Вдовин. Минек «Эрзянь правда» газетась сайсь колмоце тарка «Республиканские, городские газеты и журналы» номинациясонть. Казнесь максозель прявт редакторонтень Марина Девятованень, кона ёвтась сюкпрянь валт Госсобраниянь Председателентень свалшкань лездамонть ды седейшкавань вастоматнень кисэ. Истя жо ламонень явшезельть МР-нь Госсобраниянь Почетонь грамотат ды Благодарностть.