Ютазь недлясто Марий Эл Республикань Йошкар-Ола ошсо важодсь Российской Федерациянь Финнэнь-угрань раськетнень ассоциациянь VIII Инекужось. Тедедень темась – «Традиционные духовно-нравственные ценности финно-угорских народов в укреплении единства российской нации».
Инекужось панжовсь ды ютавтовсь Марий Эл Республикань Яков Эшпай лемсэ государственной филармониясо. Тей сакшность финнэнь-угрань ды самодийской раськетне, кить эрить минек масторонь 41 регионга. Филармониянь фойесэнть мельспаросо вастсть инжеть минек масторонь эрьва кодамо енкссто: Удмуртия, Карелия, Мордовия, Коми, Татарстан, Башкортостан, Чувашия республикатнестэ, Кировонь, Владимирэнь, Московонь, Ленинградонь, Нижнеень, Мурманскоень, Челябань, Пензань областтнестэ, Краснодаронь ды Пермень крайтнестэ, Ямало-Ненецкой, Ханты-Мансийской, Ненецкой автономной округтнестэ ды лия таркатнестэ.
Марий Элэв сакшность Россиянь федеральной ды региональной округонь общественной вейсэндявксонь прявтт ды тов совицят, культурасо, образованиясо, наукасо важодицят, раськеютконь тевтнесэ экспертт, од ломанень вейсэндявкстнэс совицят ды финнэнь-угрань раськетнень журналистт. Инекужонть прявт тевезэ – гражданской вейсэндявоманть кемекстамось, Россиясо ды сонзэ томбале эриця ламо раськетнень коест-кирдаст вельмевтемась ды ванстомась, раськеютконь тевтнень виевгавтомась.
Васняяк инжетнень содавтызь васенце этажсо невтевиця кедьчелькев ломантнень кедьсэ анокстазь выставканть марто. Тосо кенярдовтсть сельметь раськень оршамопельтне, кодавкстнэ-викшневкстнэ, мазылгавтозь ды кедьсэ стазь някатне ды истя седе тов.
Инекужось ушодовсь Марий Элэнь шкинемань коллективтнень концертэнь невтемасто. Седе тов сценанть лангс тердевсь Россиянь Финнэнь-угрань раськетнень ассоциациянь прявтось Петр Тултаев:
– Течи пурнавинек Марий Элэнь АФУН-нть вийсэ ниле иень перть теезденть кортамо, – мерсь Петр Николаевич.
Седе тов сон теинзе содавиксэкс весе пурнавозтнень, кие ды кодамо регионсто сась инжекс. Вейсэ кунсоловсть Российской Федерациянь ды Марий Эл Республикань Гимнатне.
Истя жо Петр Тултаев ловнызе РФ-нь Президентэнть Владимир Путинэнь пельде пшкадеманть. Эйсэнзэ кортави: «Финнэнь-угрань раськетнень покш путовксост Россиянь государственностенть кемекстамосо ды ламот раськетнень вейсэндямосо. Неень шкане Российской Федерациясь ашти васенце таркасо финнэнь-угрань раськеютконь ламодояк ламо тевтнень топавтомасо. Финнэнь-угрань культурань лия енов а молиця койтне-кирдатне аштить Россиянь культурань а явовиця пельксэкс».
Теде башка, Инекужонь инжетненень лембе валт пачтясть финнэнь-угрань региононь прявттнэ, конатнень ютксоль Мордовия Республикань Прявтось Артем Здунов.
Промксонть лувсо Россиянь Финнэнь-угрань раськетнень ассоциациянь прявтокс тагояк кочказель Петр Тултаев, теде башка, одкстомтозель Советэнь движениянть од составось. Инекужосо важодиця органтнэнь кемекстамодост мейле кунсолозель мандатной комиссиянь докладось.
Тешкстасынек, эрьва делегатось бажась пачтямо седе ламо сынст регионсо теезденть ды икелепелень аравтлувдонть. Теке шкасто ледстязельть сеть асатыкстнэ, конатнень коряс сынь кармить кортамо секциятнесэ ды кемить АФУН-нть пельде лезксэнть лангс. Истя жо официальной пачтямотнеде башка, региональной отделениянь делегаттнэ ловность эсь тиринь кельсэ стихть ды морасть морот. Мордовия Республиканть пельде стихть ловность Александр Данильчев ды Оксана Белкина.
Чинь омбоце пельксстэнть Инекужонть лувсо важодсть панельной дискуссиянь колмо секциятне: васенцесь – «Этнокультурное наследие финно-угорских народов как фактор сохранения национального многообразия России»; омбоцесь – «Современные цифровые технологии, искусственный интеллект и медиаресурсы в сохранении и развитии родных языков»; колмоцесь – «Национальная литература, СМИ, искусство в формировании и укреплении единого культурного кода России», конасонть важодсь минек газетань корреспондентэськак. Неть секциятне поладызь важодемаст Инекужонь омбоце чистэнтькак. Кавто чинь перть секциясо важодицятне евтнесть ды невтсть мелень витиця проектт ды презентацият, эрьвась пачтясь эсь региононь историядо, тиринь кельде ды раськень эрямодо.
Инекужонь омбоце чистэ, секциятнень важодемаст прядомадо мейле, инжетне тагояк пурнавкшность Марий Элэнь Яков Эшпай лемсэ государственной филармониянь покш нупалентень, косо пленарной заседаниясонть евтазельть ламо арсемат, талновтыця кевкстемат ды превс путомат. Ламотне эйстэст совить Резолюциянтень, икелепелев конань коряс карми молеме финнэнь-угрань раськетнень марто важодемась. Кемеви, сынь весе кармить топавтовомо шкастонзо.
Финнэнь-угрань раськетне зярыя пингетнень перть ванстыть эсест коест-кирдаст. Минек раськетнень кондямо малавиксчись чуросто вастневи лиятнень ютксо! Эряви евтамс, Инекужонть покш таликазо Россиянь ламо раськетнень вейсэндямосонть. Финнэнь-угрань раськетне – государственной вейсэндявксонь пек паро невтевкс, истя жо раськеютконь мастортнэнь ютксо. Карматано кемеме, минек раськетне зярдояк а емить, эдь эште улить поладыцянок!
Алена Артемьева