Масторлангонь журналисттнэ ды типографиясо важодицятне советской шкане эсь профессиональной кенярксчист тешкстасть маень 5-це чистэ. Тенень путозель ушодкс сядодо ламо иеде икеле, сон алтавкшнось «Правда» газетань васенце номерэнть лисемантень. Се шкастонть саезь ламо полавтовомат ульнесть СМИ-тнень важодемасо, конат кеместэ сюлмавозь политической эрямонть марто.
Кода содатано од историястонть, 1991 иень январень 13-це чистэ саезь РСФСР-нь Верховной Советэнть Указонзо коряс «День советской печати» кенярксчись полавтызе лемензэ, теезель «Россиянь Печатень чикс», ды кармась тешкставомо иенть ушодовомсто. Ялатеке печатень ветерантнэ те шкас ледстнить икелень датанть ды явить тензэ мель.
Мордовиянь журналисттнэнь ютксо улить истят ломанть, кинь тетяст-аваст, покштяст-бабаст эрямост алтызь сермадыцянь а шожда тевентень. Тень кувалма ледстясынек Куторкинтнэнь раськенть.
Те иень маень 12-це чистэ топодить колоньгемень вете иеть, кода тусь эрямосто эрзянь поэтэсь, прозаикесь, СССР-нь Писателень союзонь членэсь Андрей Куторкин. Сон ульнесь МАССР-нь Писателень правлениянь председателекс ды, мезесь пек питней неень шкане «Эрзянь правда» газетасо важодицятненень ды минек ветерантнэнень, сонзэ покш путовксозо тиринь газетанть кемекстамонь шкастонть.
Ледстясынек, Андрей Дмитриевич 1934 иенть самс важодсь «Эрзянь коммунасо», шкань ютазь «Якстере теште», мейле «Эрзянь правда» газетасонть, конань аволь весть полавтневсть лемезэ ды нолдамонь тарказо.
Людмила Резяпкинадо сермадовксонть а стяко ушодыя сонзэ покштянзо лелянть – Андрей Куторкинэнь валдо лемензэ ледстямостонть. Эдь кода кортыть ломань ютксо, ламось юты тенек, сеедьстэ сермадомо маштомаськак, покштянок-бабанок ды лия малавиксэнек эйстэ.
Те шкас Людмила Николаевнань мельс кадовсть эйкакш пингень валдо ледстнематне, кодашка покш бажамозо ульнесь важодемс газетасо. Валонзо коряс, васенце сермадовкстнэнь анокстынзе 6-це классо тонавтнемстэ. Эште сестэ сынст кармась кучнеме «Пионерская правда» ды райононь газетатнес. Теде мейле эрьва чистэ, ды аволь весть, ванкшнось почтань ящикенть, учось од прессанть, бажась неемс публикациянзо. Ды сынь ульнесть! Эйсэст мельспаросо ловныльть семиянек!
Людмилань, сестэ эште Куторкинань, содаса умок. Се шкастонть саезь, зярдо мазый, елганя рунго од тейтерекс сась важодеме Печатень кудос. Журналистэнь кинзэ эште студенткакс ушодызе «Республика молодая» од ломанень газетасонть, конась лисниль ламо иень перть. Публикациянзо ловнозь, рединь, кода кассь шкинемань ерокчизэ, кодат талновтыця ды мелень витиця публикацият сон анокстась.
Ледстневи, аволь аламо кортамот ды дивсемат ульнесть минек, журналисттнэнь, ютксо, кода маринек сонзэ монастырев эрямо туемадонзо. Эдь сестэ аламо кить содасть, кодамо тувталонь кувалма сон тосо эрясь, ансяк кода лиссь домка статьязо, минь чарькодинек – тов пачтизе профессиясь. Ды аволь ансяк православиянь темас, косо тевс нолдась «журналистэсь полавты профессиянзо» важодемань лувонть, лия публикациятнесэяк кенярдовтсь ловныцятнень. Эште, сон машты эсензэ икелев аравтлувонь (целень) путомо, ды, мезеяк лангс апак вано, кода бу стака тензэ аволь уле, сонзэ топавтомо. Нать, а стяко эсь шкастонзо Мордовия Республикань Журналистэнь союзонь икелень прявтось Лидия Григорьевна Снегирева баславакшнызе «Сударыня» тейтерьавань газетань прявт редакторокс, конась теезель сонзэ ушодксонзо вельде.
Видькстатано, аламот юткстонок сайтяно лангозонок истямо покш канст, кода улемс СМИ-нь прявтокс, зярдо эряви кандомс покш ответственность аволь ансяк эсеть публикациятнень, истя жо изданиянь весе сермадыцятнень кисэ. Людмила Резяпкина те газетанть прявтонь тевенть топавтсь кемень иень перть. Теде мейле ульнесь «Информационно-аналитическая редакция «Рузаевские новости» АНО-нь прявт редакторокс. Теке шкасто важодсь М.Е. Евсевьев лемсэ МГПУ-нь кафедрань старшей преподавателекс, Н.П. Огарев лемсэ МГУ-нь филологиянь факультетэнь журналистикань кафедрань ГЭК-нь председателекс.
Аволь весть савсь марямс Людмила Николаевнань ялгатнень пельде, што сон машты тееме мельспаро мартонзо важодицятнень туртов, а невти прянзо «покш начальникекс», лезды сынст тевест топавтомсто. Соды, сестэ куш кодамо сотрудникесь мари кеняркс ды касы мелезэ седе парсте важодемс икелепелев.
Кевкстеманок лангс, кодамо а стувтовикс тев ульнесь сонзэ туртов редакциясо важодемстэ, каршо валсонзо тешкстась, сындест ламольть. Койсэнзэ, вейкенть весе мартонзо важодицятне кувать а стувтсызь.
Се шкастонть, кода Людмила Резяпкина ульнесь «Сударыня» тейтерьавань газетань прявт редакторокс, коллективнек сынь кирнявтнесть парашютсо. Теде икеле зярыя недлянь перть анокстасть те ответственной тевентень, якасть занятиятнес, конатнень ютавтсть аэроклубонь инструктортнэ. Сась талновтыця чись. Малав вайгельбень сэрьсэ кепедевсть моданть эйстэ, алов варштамсто сельмест икеле ульнесть вирть, паксят, сынь жо кортасть седе, кодамо материал кармить анокстамо! Валонзо коряс, «менельсэ планеркась» пингензэ перть а стувтови.
Виде, течи стака ловомс, зяро публикацият анокстась те ероков журналистэсь республикань, райононь ды федеральной изданиятнень туртов. Седе, кода аволь пек умок якась специальной военной операциянь участниктненень гуманитарной лезксэнь пачтямо, Людмила Резяпкина эзь карма евтнеме… Койсэнь, вейке ендо, тейсь пек видестэ, эдь седеймарямонь тевтнень эряви топавтомс салавинька, кода сермадозь Пазонь книгасонть. Омбоце ендо, теде эряви евтнемс, штобу лиятнеяк, сонзэ лангс ванозь, кундавольть весенень эрявикс те паро тевентень Изнямонь чинть малавгавтомга.
Минек справканок:
Людмила Резяпкина (тейтерькс Куторкина) – Мордовия Республикань Журналистэнь союзонь прявт, Н.П. Огарев лемсэ МГУ-нь филологической факультетэнь журналистикань кафедрань прявтонь тевень топавтыця, исторической наукань кандидат, МР-нь массовой информациянь средстватнень заслуженной роботник, МР-нь Прявтонь ды МР-нь Правительствань Администрациянть юрсо Общественной советэнь председателень полавтыця, Мордовия Республикасо Общероссийской Народной фронтонь региононь штабонь член. Людмила Николаевна сови Мордовия Республикасо Антитеррористической комиссиянть пингстэ терроризмань а нолдамонь коряс информационной политикань анокстамонь коряс Экспертэнь советс.
Ламо иень перть парсте важодеманть ды общественной роботань топавтоманть кисэ Людмила Резяпкинанень максозь покш казнеть. Сынст ютксо: «МР-нь СМИ-нь заслуженной роботник» почетной лемесь, «За межнациональное согласие» медалесь, «За личный вклад в развитие Республики Мордовия» МР-нь Прявтонь почетной знакось, «За заслуги перед профессиональным сообществом» Россиянь Журналистэнь союзонь почетной знакось. Людмила Николаевна кавксть лиснесь Мордовия Республикань Прявтонь лауреатокс.
Валентина Юдина