Четверг, марта 28, 2024
Важное

Кода одкстомсь ды мазылгадсь Кочкурвелесь, Кочкурбуень куншка курось, неить аволь ансяк тосонь эрицятне, инжетнеяк. Тосонь администрациянь прявтось Светлана Николаевна Герасимова теи весементь тиринь ёнксонзо паролгавтомга. Районось бажи невтемс прянзо эрьва кодамо конкурссо, конатне федеральной проекттнэнь лувсо яволявтовить иестэ иес.

Тедедень августсто ёвтазельть Мордовиянь муниципальной образованиятнень паролгавтомань сехте вадря проекттнэнь конкурсонь итогтне, конат ютавтовсть «Жилье и городская среда» национальной проектэнь «Формирование комфортной городской среды» федеральной проектэнть лувсо. Изницякс лисекшнесть вейксэ арсемат, сынст ютксо – Кочкуровань Советской ульцясо парконть одкстомтомась.

Те тарканть паролгавтомс арсекшнесть сынсь эрицятнеяк, конатне каясть кисэнзэ ламо вайгельть. Те изнямось кандсь аволь ансяк кеняркс, истя жо ламо ярмакт: 2022 иестэ парконть мазылгавтсызь-одкстомтсызь эштё 8 миллионт целковоень питнес. Тешкстама, те паркось уш зярыя иеде теде икеле весть изнякшнось истямо жо конкурссо, ды весе эрицятне эсь сельмсэст неизь, кода веленть куншкасо чачсь паро оймсема тарка: теезельть якамонь од таркинеть, путнезельть эземнеть, эйкакштненень нурямкат, чийнемкат, стявтозель морамонь туртов таркине – сцена. Кезовонть виевгадома шкасто, зярдо культурань кудотнесэ эзть мерне ютавтнемс мероприятият, те паркось саинзе неть тевтнень эсензэ лангс. Тесэ ютавтневсть морамот-киштемат, кинонь ваномат, пелькстамот… Ней явозь ярмактнень вельде карми топавтовомо парконть паролгавтомань омбоце пельксэсь.

Меельце шкатнестэ районось кармась вечкевикс таркакс Саранск ошонь эрицятнень туртовгак. Тесэ «Безопасные и качественные автомобильные дороги» нацпроектэнть лувсо паро асфальтсо ацазельть китне, ды ламот кармасть одов само эрямо тиринь велетнес, рамамо тосто кудот, а важодеме – ардтнеме ошов. Кода кортыть эрицятне, 25-35 вайгельбетне неень шкане овсе а покш мелявксось, лиясто Саранскойга ардомс седе ламо шка ютавтат «пробкатнень» кувалма. Паро полавтомат меельце шкатнестэ неявить лия ёнкстнэсэяк.

Паро оймсема тарка – сыре ломантнень туртов


Кочкурбуень эрицятнень туртов социальной лезксэнь максомань учреждениясонть, конанть прявтсо Виталий Дмитриевич Объедкин, уш пельиеде ламо роботы од отдел. Тесэ чинь перть лезкс максови 60 иеде седе сыре ломантненень, конатне неень шкане пенсиясот ды аштить кудосо. Те отделэсь важоди пондельникстэ саезь пецяс, чизэнзэ ниле част, ды лезды ломантненень паролгавтомс ёжомарямост, муемс ялгат-оят, седе ливчакавтомс рунгонть. Ды те весе максови питневтеме. Отделэнь прявтось Вера Фёдоровна Зверкова, культорганизаторось Вера Александровна Лукина, гимнастикань коряс инструкторось Любовь Николаевна Ермолаева весе седейлембест максыть сыре ломантнень марто важодеманть туртов.

Оймсема ды рунгонь ливчакавтома таркинесь важоди Кочкуровань Культурань кудосо «Демография» нацпроектэнь «Старшее поколение» федеральной проектэнть лувсо. Эрьва чистэ 7–10 аватне мельспаросо ютавтыть тесэ шканть: тейнить специальной упражненият, ушова яксить скандинавской палкатнень марто, киштить-морыть, оймсить массажонь теиця ды рунгонь ливчакавтыця кресласо, лецить сантнэнь, ловажатнень Кузнецовонь аппликаторонть ды «Алмаг» аппаратонть вельде, ваныть фильмат, артыть картинат, кунсолыть православной притчат, кодыть-викшнить, натой тонавтнить яксеме подиум ланга.

«Старость в радость» благотворительной фондось сыре ломантненень ды инвалидтнэнень лездамонть туртов явсь соцзащитань отделэнтень эрьва кодат тантейпельть. Ней аватне вейсэ симнить чайде ды каванявить кашадо, печениядо ды ламбамо ярсамопельде.
Кода кортыть аватне, чись тесэ юты, а марявияк. Вана, саемга, Людмила Ивановна Абойкина сакшны тей Семилейстэ эрьва чистэ. Сы, ды виезэ кепети. Нина Андреевна Ермайкина ниле ковт уш тов яки ды ней кутьмерезэяк седе оймась. Нина Андреевна Левкина якси тей апрельстэ саезь ды тешксты, келя, кумажанзояк лоткасть сэредемеде.

Миньгак якинек те мелень витема таркантень ды эсенек сельмсэ неинек, кода оймсить сыре ломантне. Сеске неяви, кода валдомгадыть чамаст, ливчакадыть рунгост, теке сёлмот касыть. Пароль бу, истят нупальть панжовольть республикань велетнесэяк, аволь ансяк райононь куншка куротнесэ. Мелесь-арсемась чинь ютавтомань истямо таркадо пек паро, ялатеке сонзэ эряви келейгавтомс. Неень шкане сыре ломантнень туртов пек а сатныть истят вастовоматне, кортнематне-седеень чамдоматне, шумбрачинь паролгавтомань усиятне.

Марина Девятова

Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».