Таштамковонь 7-це чистэ Кочкурвелень культурань ды оймсемань парконтень пурнавкшность пек ламо ломанть – районось тешкстызе 97-це чачома чинзэ.
Кенярксчисэнть ульнесь мезе лангс ваномс, мезень кувалма дивсемс ды кенярдомс! Кавто метрань сэрьсэ маралясь Владимир Завьялов – райононь алкуксонь визитной карточка. Пек паро гармонист, Вирь Тавласо велень клубонь прявт, паро азор – тиринь Семилейсэ касты эсензэ кондят жо покштояк покш эмежть. Кавксоньгемень килограммань сталмосо мазыйканть-дураккуяронть кайси кедьстэ кедьс налксезь! Теде башка, сельмень сявадстыця алуж – седеезэ, корты, зярс оля. Тейтерть, саинк мельс!
Кенярксчинтень сакшность семиянек. Вана Гагаринтнэ ды Суяшовтне – ламо эйкакшонь триця тетятне-аватне. Вана кинь лангсто саема пример: одт, а вана семиясост уш колмонь-колмонь эйкакшт, вейкест-вейкест марто эрить ояксчисэ ды ванстыть эсь сюлмотнень. Истямо вана семиянь уцяскань салавачись! Мордовиянь Прявтось Артем Здунов шнынзе ламо эйкакшонь триця тетятнень-аватнень, арсесь вечкема ды паро эрямо, явшесь казнеть вишкинетненень.
Кочкуровань районось кеместэ виевгады. Эрязасто топавты национальной проекттнэнь, конат совавтовить эрямос Российской Федерациянь Президентэнть Владимир Путинэнь мелензэ коряс. Строявить од кить ды эрямо таркат, одкстомтовить здравоохранениянь, культурань, спортонь учреждениятне, вадрялгавтовить общественной таркатне, теевить эйкакшонь од площадкат ды оймсема таркат.
Тедеде федеральной программанть лувсо допрок витнезель Кочкуровань средней школась.
«Покш мельсэ сакшнан Кочкуровань районов хозяйствань тевтнень ды кенярксчитнень коряс, – мерсь Артем Здунов. – Те районось эсь прянзо пек кеместэ мари экономикань, велень хозяйствань, вельхозпродукциянь переработкань коряс. Минь бажатано, инфраструктураськак илязо уско удалов. Тедеде Кочкурбуень средней школась допрок витнезь. Одкстомтомат учить эште кавто школат, конатнень маласо шкастонть витнесынек-петнесынек. Те пек эряви эйкакштнень туртов, штобу сынь тонавтневельть ды касовольть-виевгадовольть вадря условиятнесэ. Икелепеле – покш арсемат инфраструктуранть коряс. Эдь тей сакшныть ламо инжеть: «Кречетэв», «Карнаев». Течияк мон сынь аволь ськамон, эсень тетянь-авань марто. Сынь покш питне макссть инжень вастомантень. Сюкпря истямо анокстамонть кисэ!»
Районось кирди каштанчи эсензэ енкссо чачозтнень кувалма: Советской Союзонь Геройтнень, Социалистической Трудонь Геройтнень, Славань Ордентнэнь полной кавалертнэнь кувалма – аволь эрьвась шнасы прянзо тень коряс.
«Ансяк весементень юрось – экономикась, – тешкстызе республикань Прявтось. – Тынь важодеме вечкицят, секскак Пазось максозо, штобу районось виевгадоволь, штобу сеть налогтне, конатнень минь пурнатано (а эдь минь касттано налогонь ды экономикань коряс), молевельть ломантнень лезэс. Седейшкава течи кортынь ламо эйкакшонь триця семиятнень марто, истят семиятнеде пек ламо Кочкуровань районсо».
Артем Здунов евтась сюкпря «Норов» Агрохолдингень руководствантень эсь важодицятнеде мелявтоманть кисэ. «Кармавтан весенень саемс пример Агрохолдингенть пельде. Важодицятнень туртов эрямо таркат, профессиясо касома – ули весемесь, мезе эряви, штобу семиясь кемекставлизе эйкакшонь чачомадо меленть. Те пек эрявикс!» – мерсь Мордовиянь Прявтось.
Кочкуровань районось ашти каштанчисэ эсензэ историянть, культуранть, раськень койтнень-кирдатнень, покш, ояксчисэ эриця семиятнень, важодемань кеме династиятнень кувалма.
Артем Здунов явшесь казнеть райононь эрицятненень, истя жо «За смелость и отвагу» отличиянь тешкст максозь СВО-нь участниктненень Игорь Савиннэнь ды Татьяна Шведкованень.
Эйкакштнень кастомасо цетавкстнэнь ды кудораськень сехте вадря койтнень вельмевтемасо ды виевгавтомасо покш путовксонть кисэ Мордовия Республикань Прявтонь Сюкпрянь серма максовсь Григорий ды Людмила Бояркинтнэнень – те кизэстэ семиясост чачсь нилеце эйкакш. Ней Бояркинтнэнь кавто церынест ды кавто тейтернест.
Мордовия Республикань Госсобраниянь депутатось, «Норов» Агрохолдингень руководителесь Александр Поздняков земляктненень поздоровонь евтамсто тешкстызе покш лезксэнть республикань Прявтонть пельде. «Сюкпря Артем Алексеевичень тетянзо-аванзо туртов истямо церанть кисэ!» – мерсь сон.
Кочкуровань райононь прявтось Светлана Герасимова мерсь: Мордовиянь Прявттомонть ламось бу аволь тееве: «Минек эйкакштне кармить тонавтнеме ды касомо неень шкань условиятнесэ – истят жо, кода ошсо. Евтатано сюкпря скверэнть кисэ, конась тедеде теезь нацпроектэнть лувсо. Кочкуровань райононь эрицятненень сон кармась вечкевикс таркакс. Меельце кавто иетнестэ витнезь 30 ламо вайгельбеть кить. Карматано бажамо истя важодеме седе товгак!»
Фототне
Егор Горинэнь ды МР-нь Прявтонь пресс-службанть.