Ноябрянь 27-28-це читнестэ Саранскойсэ пурназель «Марса/Вейсэ – Мы вместе» регионъютконь эрзянь ды мокшонь од ломанень колмоце форумось. Сон ютась «Койтне од ломантнень эрямосо» лементь ало.
Саранскоев, Мордовиядо башка, пачколесть инжеть Московонь, Самарань, Саратовонь ды Нижегородской областтнестэ. Форумонь васенце чистэнть инжетненень ютавтозель экскурсия МР-ва Росгвардиянь Управлениянь «АРКУДА» ОМОН-нь центрава, конась ашти Рузаевка ошсо. Омбоце чистэнть И. Д. Воронин лемсэ республиканской краеведениянь музейсэ мольсь форумонь важодемась. Весемезэ тей пурнавкшность кавксоньгеменде ламо ломанть.
«Тынь костонтядо?» – музеень фойес совамсто, эрзянь мазый оршамосо кавто од тейтертнень неезь, пшкадинь тенст эрзянь кельсэ. «Мы из Саратовской области», – валон чарькодезь, макссть тень каршо вал мазыйкатне. Минь, келя, а кортатано эрзякс, ансяк тия-тува чарькодтяно: ундоксонок тестэнь, Мордовиянь Ицялонь райононь. Тейтертне састь Саратовской областень Советской райононь Советской посёлкасто. Ицялбуестэ эрзятне зярдо-бути састь тов од порасто. Кевкстинь тейтертнень, косто истят мазый оршамопельть саевсть Саратовской областьсэ? Мерсть, келя, посёлкасост эри сыре эрзява – Вавилова Раиса Петровна, кона сонсь эсь кедьсэ сты-теи истят эрзянь оршамопельть. Велесэст ули апокшке музейгак, косо таштавсть байтяк курмот-кармот. Теде башка, сон тонавты одтнэнь эрзянь культурантень, покш читнестэ лезды мартост анокстамс раськень ярсамопельть. Вана истя, эзинь кенере совамо, Юлия Тараненко ды Наталья Кожемякина Саратов ёнксонь од тейтертне чопавтимизь раськень койтнес-кирдатнес. Арсезевинь, мезе од сынь течи марить, бути истякак койтнень-кирдатнень содасызь? Ансяк «кой» валось, конась эрзякскак ды мокшокскак гайги вейкетьстэ, панжозель форумонть шкасто истя келейстэ ды домкасто, натой ваннозельть целанек государствань прявт законтнэнь ды эрямо лувтнень ёнксост.
Аволь уш васенцеде од ломанень форумонь ветицякс аравтозельть ёроков од ломантне. Неть: филологиянь наукань кандидатось, "Мордовия" ГТРК-нь «Сияжар» раськень куронь важодицясь ды ней «РУВИКИ» интернет-энциклопедиянь эрзянь разделэнть редакторось Александр Данильчев ды МР-нь Правительстванть юрсо гуманитарной наукань НИИ-нь научной сотрудникесь Оксана Белкина. Мероприятиясь ушодовсь мелень кепедиця видеороликсэ, косо невтезельть эрзянь ды мокшонь раськетнень покш читнень певтеме мазычист. Те видеонть поладозь, залонтень мельга-мельцек совасть «Варма» арт-театрань стилизованной костюмонь невтицятне вейсэ «Торама» фольклорной коллективенть марто. А весть уш истят покш мероприятиятне ушодовкшныть «Тюштя» кезэрень моростонть, зярдо дорамась весень терди раськенек-ундоксонок идеме-ванстомо…
Покштнень пельде вал
Форумонть важодемазо ушодовсь МР-нь культурань, раськень политикань ды архивень тевень министранть Светлана Баулинань шумбракстнемань кучовксонзо ловномасто, конань пачтизе теке министерствань раськеютконь кевкстематнень коряс отделэнь прявтось Александр Кочеваткин.
Домка ёвтамо пачтясь Эрзянь ды мокшонь раськень регионъютконь общественной вейсэндявксонь председателесь Юрий Мишанин, конась «Традиционные духовно-нравственные ценности» докладсонзо кепединзе весе правовой ёнкстнэнь: «Койтнень питнейчитнеде минь меельце шкасто ламо кортатано. Нурькинестэ ледстяса, мезе эйзэнзэ сови. 2022 иень ноябрянь 29-це чистэ минек Президентэсь Владимир Путин тешкстызе «Об утверждении основ государственной политики по сохранению и укреплению традиционных российских духовно-нравственных ценностей» Указонть. Эйсэнзэ невтезь неть коень питнейчитнень перечнясь. Юткозост кандовить: эрямось, достоинствась, ломаненть праванзо ды олячинзэ, патриотизмась, гражданственностесь, Тиринь масторонтень служамось, нравственной идеалтнэ, кеме семиясь, эрявикс важодемась, гуманизмась, милосердиясь, коллективизмась, исторической ледстнемась, раськетнень вейсэндявомась ды лият». Седе тов Юрий Александрович домкасто панжизе эрьва терминэнть.
Теевсь патриотической паро коекс тердтнемс покш мероприятиятнес специальной военной операциянь участниктнень. МР-ва Росгвардиянь Управлениянь «АРКУДА» ОМОН-со важодицясь, СВО-нь участникесь Денис Солдатов кайгасо (скрипка) налксизе И. С. Бахонь «AIR» композициянть, мейсэ пек дивавтынзе пурнавозтнень.
Сельведьс пачтизе залонть эсь патриотической ёвтнемасонзо Покш Березникень райононь Ташто Найман велень цёрась Александр Николаев. Сон ней эри Нижней Новгородсо – старшей офицер, боевой действиянь ды военной службань ветеран. Александр Серафимович ледстизе 2008 иестэ Северной Кавказсо чавовозь Олег лелянзо, кона ульнесь ефрейторокс. Тиринь велесэ сонзэ лемс панжозель мемориальной лаз ды лемдезель вейке ульцясь. Невтезель солдаттнэнь тонавтомань видео. Лия роликсэнть вейке омбоце мельга невтезельть Афганонь ды Чечнянь войнатнесэ чавовозь од цёратнень фотографияст. Залось стядо вансь ды эрьвась нардтнесь сельведензэ. Зняро эрямот саи эрьва войнась, зяро сельведть валозь масторонь келес, кодамояк онкссо а онкстави…
«Вейсэ терроризманть каршо» пшкадема марто кортась экстремизмань каршо бороцямонь центрань прявтонь полавтыцясь Олег Уздимаев. Сон ёвтнесь седе, кодамо покш чумондома учи сетнень, кие минек масторсо ушоды экстремизмань эли терроризмань тевть. Сехте берянесь, вербовщиктне интернет вельде мессенджерсэ апаро тевень тееме апокш ярмакто сиведить эйкакштнень, конатненень зярс эзть топоде 18 иеть. Манчить эйсэст, келя, тон аволь совершеннолетней, секс теть мезеяк а ули. Ансяк те малав аволь истя. Эрьва апаро тевенть кисэ ломанесь, куш покшось, куш аволь, озавтови тюрьмас. Вейке диверсантонть тевензэ ланга видеосонть невтезель, кода тонась, истямо кармавтома вельде, пултась релейной шкаф. Цёранть пекстызь васня аволь совершеннолетнеень колонияс, мейле – строгой режимень тюрьмас. Весемезэ максозельть тензэ 15 иеть. Истя, апак арсе эсь эрямодо ды законтнэнь апак сода, од ломанесь яжизе весе эрямонзо…
Пазонь валонть од ломантненень кандызе протоиереесь, Саранскоень ды Мордовиянь епархиянь Саранскоень епархиальной управлениянь ответственной секретаресь, Иоанно-Богословской соборонь настоятелесь Алексей Селезнев. «Духовные традиции молодёжи» докладсонзо сон ледстинзе Пазонь заповедтнень, конатнень ломантненень кирдема эрьва чи.
Седе тов ледстязельть эрзянь ды мокшонь свадьбадо мейлень кезэрень койтне-кирдатне ды раськень оршамопелесь. Васенцеде пек домкасто пачтясь Н. П. Огарёв лемсэ МГУ-нь юридической институтонь теориянь, государствань ды правань историянь ды раськеютконь правань кафедрань профессорось Юлия Сушкова. Раськень оршамопеленть вандынь чиде кортась Степан Эрьзя лемсэ музеень важодицясь Наталья Челмакина.
Вал одтнэнень
Промксонь омбоце пелькссэнть вал максозель одтнэнень. Яволявтозель вейсэнь тема: «Медиапроекты как форма популяризации традиционных ценностей». Нама, эрямось а ашти ве таркасо. Течинь вешематнень коряс, ламо мезе теема Интернетэнь «паксятнесэяк». Ловови, те седеяк касты од ломантнень мелест тиринь кельтнень тонавтнемантень. Филологиянь наукань кандитаттнэ Валентина Гришунина ды Александр Данильчев, конат важодить «Рувики» интернет-энциклопедиянь мокшонь ды эрзянь келень редакторокс, ёвтнесть эсь од тевдест ды энялдсть одтнэньгак лездамс тенст те певтеме ды эрявикс тевсэнть. Неень шкас тиринь кельтнес ютавтозь малав кавксо тёжат эрьва кодамо информациянь кандыця текстт.
Н. П. Огарёв лемсэ МГУ-нь филологиянь факультетэнь студенткатне Анастасия Денисова, Дарья Шиндяйкина ды Юлия Тувышкина вейсэнь докладсо ёвтнесть тиринь кельсэ теварсевкстнэде, ловизь ды невтнизь медиапространствасонть сынст таркаст. Ледстизь анокставиця эрзянь ды мокшонь кельтнесэ корпустнэнь, конатнень теи минек университетэсь, ды лия лезэв ды келень тонавтнемс маштовиця ресурстнэнь.
М. Е. Евсевьев лемсэ МГПУ-нь колмоце курсонь студенткась, Отяжбуень мазый тейтересь Анастасия Виряскина ёвтнесь эсь од тевдензэ, конань топавты Интернетсэ. Сон – киберволонтёр. Те од молема (движение), конась лезды культурань кастомантень. Раськень тевтнень коряс Федеральной агентстванть лезксэнзэ вельде теезельть киберволонтёронь курот, конат Интернетэнть вельде невтить культурань проектт ды мероприятият.
Лия эрзянь тейтересь, Яна Кудашкина, кона важоди НТМ-сэ «Вал» программань репортёрокс, ёвтнесь «ВКонтакте» соцсетьсэ лопадонзо, косо сон вети «Тонеть» эрзянь кельсэ куро. Тосо Яна ёвтни велень эрямодо, путни минек содавикс поэттнэнь валморот, мезесь пек вечкеви ловныцятненень.
Ламо тев тееви мокшонь кельсэяк. Ёроков тейтересь, этноблогерэсь Оксана Белкина, кона, ледстясынек, ульнесь форумонь ветицякс, ёвтнесь мокшонь келенть коряс Интернетсэ эсь проекттэнзэ. Мокшонь ёроков омбоце тейтересь Мария Маршакова теи мокшонь раськень костюмонть коряс неень шкань оршамот, конат пек тусть мельс од ломантненень.
Меельце валсонзо Юрий Мишанин шнынзе пурнавозь весе од ломантнень. Келя, тев теезь ули, ансяк те аламо. Эряволь бу седе ламо истят ёроков ломанть, конат путовлизь виест ды шкаст тиринь кельтнень ванстомантень. Арсетяно, сы шкасто истя улияк.
Форумось прядовсь мельстуиця концертсэ.
Марина АГАФОНОВА