Саранск ошонь округонь Культурань кудосо панжовсь «Мастер года 2025» изобразительной ды декоративно-прикладной творчествань мастертнэнь, художественной промыслань ды ремеслань ошонь выставкась-пелькстамось. Тедеде сон юты 22-цеде ды алтави Мордовиянь автономиянь 95 иетненень.
Выставкантень явсть мель малав сядо кедьчелькевть. Весе сынь невтсть зярыя важодевкст. Пелькстамонь ютавтыцятне кецясть, тедеде сюпавсто невтеви творчествань эрьва кодамо енксось: живопись, графика, керамика, викшневкст, чувтосто керсевкст, стазь оршамопельть, кружовасто, илевсто кодамось... Содавикс мастертнэнь марто тесэ важодевксэст невтизь студенттнэ, художественной школань тонавтыцятне, од артыцятне, пенсионертнэ, весе сетне, кить явить мель творчествантень.
– Те выставкасонть мереви невтемс пря эрьванень, кинь ули мелезэ. Ламо содавикс артыцятне ды мастертнэ ушодызь творческой кист самай те пелькстамостонть ды пачкодсть сэрей текшс. Дивавты, кодат виев, мазый ды мельстуиця важодевкст тейнить автортнэ. Свал стака тенек кочкамс юткстост сехте партнэнь, – кортась конкурсонь жюринь прявтось В. А. Варданян.
Мирдть-нить Сергей Александрович ды Ольга Николаевна Аблисимовтне «Мастер года» пелькстамосонть васенцеде. Сынь уш сисем иеть тейнить эрьва кодат кедьенкст илевсто. Теевксэст невтнизь «Шумбрат, Мордовия!» республикань раськень творчествань фестивальсэнть, ульнесть Рузаевкань ды Темниковань районтнэнь кенярксчитнесэ.
– Монь покштям стыль шубат ды эрьва кодат теевкст кедьстэ (кожа). Ольгань покштязо ульнесь кузнецекс. Ды, нать, миненекак ютась шкинемантень вечкемась. Мон военной пенсионер, шкам ули. Весть неинек, кода эсенек велень церась илевсто коды паргот. Мекс бу а варчамс эстенек? Чачсь покш меленек. Интернет вельде весементень тонадынек. Маштомс кодамо – те аламо. Эряви муемс эрявикс материал! Кальтне касыть эрьва кува, ансяк аволь весе илевтне маштовить кодамс. Ламо шка ютавтат материалонь анокстамга. Илевт минськак касттано, истя жо вешнетяно, кува касыть эрявикстнэ: улевель парсте мендявиця, илязо синдеве, – евтни Сергей Аблисимов.
Кедьчелькевтне илевсто кодыть стулт, табуреткат, креслат, комодт, оршамопелень кирдемс паргот, вазат, кшинь путомс паргинеть ды натой каткань кудынеть. Те материалстонть эрьва мезе кодави, секскак ломантне сеедьстэ пшкалить тенст мезеяк кодамс, тейнить заказт. Ламот кармавтыть казнекс малавиксэст туртов. Аблисимовтне сынськак малавиксэст ды ялгаст туртов свал кодыть илевсто казнеть. Тонат аштить мельспаросо ды евтыть сюкпрянь валт. Сергей тейни сень, мезесь стака, саемга, каркасонть. Ольга полады тевенть седе тов. Вейке паргонь кодамс пельчи ютавтат. Тагояк, улезэ ансяк материал.
Конкурссонть эрьва номинациянь коряс яволявтозельть изницятнень лемест. Истя, «Мастер года» лемесь ды Гран-прись максозель гончаронь искусствань мастерэнтень Александр Русяевнень. Сон важоди М. Е. Евсевьев лемсэ МГПУ-нь художественной ды музыкальной образованиянь кафедрасо старшей преподавателекс. Гончаронь тевентень яви мель студентэнь шкасто саезь.
Татьяна Маторкина