Пятница, марта 29, 2024
Важное

Ютазь недлясто Мордовиясо ды Россиянь регионтнэсэ тешкставсь Эрзянь ды мокшонь кельтнень весероссиянь чись.

Тень кувалма апрелень 15-це чистэ Мордовиянь Раськень драмань театрасо ютавтовсь торжественной промкс ды ульнесть ламо лия мероприятият.

Эрзянь ды мокшонь кельтнень весероссиянь кенярксчинть панжизе РФ-нь Президентэнть Владимир Путинэнь «Виде линиясто» саезь видеороликесь.

– Минек ули истямо раське – Россиянь кезэрень раськетнень ютксто вейкесь – мокшэрзянь. Эрзят, мокшот, шокшот... Весе сынь ловить пряст мокшэрзякс. Ды кортыть вейке группань кельсэ. Ансяк сынст кельтне седе пек явовить вейкест-вейкест эйстэ, рузонь ды украинань кельтнень коряс. Теке марто сынь покш мельсэ ванстыть вейкетьксчист. Мекс? Сынь превейть ды чарькодить, явовомась мезескак парос а вети. Сон лавшомгавты этносонть, – мерсь Путин.

Неть валтнэде мейле Раськень театрань сценанть лангс лиссь Мордовиянь Прявтось Артём Здунов.

«Кельгома ялгат, вечкевикс оят, дорогие друзья! – ушодызе кортамонзо Артём Алексеевич. – Минек масторонь Президенттэнть седе вадрясто а ёвтат. Течи Россиянь ламот ёнкстнэсэ тешкстави Эрзянь ды мокшонь кельтнень чись. Ёвтан поздоровт ды покш мелень явома минек кезэрень ды тиринь кельтненень – эрзянь ды мокшонь. Сехте прявтось – сеть ломантненень мелень явомась, кить ванстыть ды сюпалгавтыть сынст. Эряви ванстомс минек культурань сюпавчинть ды пачтямс сонзэ   эйкакштненень-нуцькатненень. Эрьва раськесь ашти колмо нежедькстнэнь лангсо: келенть, конась вейсэнди культуранть ды поэзиянть, раськень ярсамопельтнень ды минек раськень пек мазый оршамопельтнень. Эряви тень ванстомс! Неень аволь шожда шкастонть васенце таркас лиси натой аволь политической, а общественной дипломатиясь. Ламот минек лелятне-ялакстнэ эрить омбо мастортнэсэ, а эряви сеземс мартост сюлмотнень, эряви толковамс, ледстнемс седе, кинь кисэ воёвасть покштянок. Минь ялатеке изнятано. Минь покш мель явтано лия раськетненень, зярдояк а макссынек эсенектнень!

Культурань сюпавчинь иестэнть, конань яволявтызе Россиянь Президентэсь, Мордовиясо кемекстазь раськень культурань ды государственной кельтнень ванстомань ды сюпалгавтомань коряс программа. Сон уш нолдазь тевс, ды минь карматано сонзэ кастомо-виевгавтомо. Мон весемесэ лездан. Башка мель явтано раськень-художественной промыслатненень, туристэнь проекттнэнень, книгатнень нолдамонтень. Эряви виевстэ невтемс республиканть. Вановтом коряс, течи важодемась ветяви пек парсте. Арсян весенень изнявкст! Минь виде кинть лангсо!»

Республикань Прявтось явшесь казнеть эрзянь ды мокшонь раськень культурань, кельтнень ды койтнень-кирдатнень ванстоманть кисэ. Ламот тонавтыцятне тешкстазь МР-нь Прявтонь Благодарностьсэ.

Шумбракстнемань вал марто пшкадсь МР-нь Госсобраниянь Председателень полавтыцясь Сергей Вдовин. Сергей Михайлович тиринь эрзянь кельсэ ёвтась поздоровт МР-нь Госсобраниянь Председателенть Владимир Чибиркинэнь пельде ды истя жо явшесь казнеть образованиясо важодицятненень.

Мероприятиянть юрсо яволявтозель эрзянь ды мокшонь кельтнень сехте вадря тонавтыцясь. Пелькстамонь финалс лиссть вете тонавтыцят Саранскойстэ ды республикань районтнэстэ. Сехте вадря тонавтыцякс кармась Саранск ошонь 17-це № школань – «Тавла» Тонавтомань центрасто Оксана Трушкова. Когда тешкстызе МР-нь Правительствань Председателень полавтыцясь Галина Лотванова, те пелькстамось минек республикасо ютавтневи уш 15 ламо иеть. Ды эрьва ие сонензэ явови покш мель.

Школатнесэ ды ВУЗ-сэ тиринь кельтнень тонавтнемадо кортась Эрзянь ды мокшонь раськетнень регионъютконь общественной вейсэндявксонь прявтось Юрий Мишанин. Юрий Александрович тешкстызе, меельце шкастонть эрзянь ды мокшонь кельтнень кастомга-виевгавтомга домка важодема ветяви Интернетсэ: панжовить тиринь кельсэ аккаунтт социальной сеттнесэ, улить эсенек блогерткак. Те пек вадря ёнкс од ломантнень марто важодемасонть.

Кенярксчистэнть казезь Эрзянь ды мокшонь кельтнень ды литературань регионъютконь XXIV олимпиадань изницятне, ёвтазь «Масторава» Регионъютконь фестивалень-пелькстамонь итогтне.

Истя жо Мордовиянь эрицятнень туртов видеонть вельде поздоровт кучсть эрзянь ды мокшонь раськетне, конат эрить Россиянь лия регионтнэсэ. Теде мейле весе пурнавозтнень ды инжетнень туртов «Умарина» ансамблясь невтсь мельстуиця концерт.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».