Аволь умок тешкставсь Эрзянь ды мокшонь кельтнень весероссиянь чись. Мероприятият ютавтовсть кода Мордовиясо, истя Россиянь ламо регионтнэсэ, косо эрить эрзят ды мокшот. Ютазь оймсема читнестэ Эрзянь келень чись келейстэ тешкставсь Пенза енксонь Бессоновань буень Пазялго (Пазелки) велесэ – тесэ ютавтовсь тиринь кельсэ валморонь ловномань коряс пелькстамо. Сон пурназель Пазялго велень школасо.
Сынст лемест а стувтнить. Музейсэнть ули стенд, школанть икеле ашти кеврунго, конанть мельга якить тонавтницятне. Ды мероприятиядонть икеле весе пурнавозтне Пензань областень Эрзянь-мокшонь раськень культурной автономиянть пельде Тиринь масторонь ванстыцятнень лемс путсть цецят. Эзизь стувто Аванть-героинянть Евгения Прохоровна Тимошкинаньгак, кона чачтсь-кастсь кемень эйкакшт, сисемтнень нельгинзе войнась. Сонзэ лемс Пазялгонь школантень понгавтозь мемориальной лаз.
Теде мейле ушодовсь кенярксчинь вастовомась. Пурнавозтненень лембе поздоровт евтась Эрзянь-мокшонь раськень регионъютконь вейсэндявксонь Исполкомонь прявтось Татьяна Ларина. Татьяна Ивановна тешкстызе, неень шкане эрзятне ды мокшотне эрить масторонь весе регионтнэсэ. Ды пшкадсь эйкакштненень истямо кармавтома марто: «Яводо мель тиринь келенть тонавтнемантень, кортадо эрзякс. Эдь келесь, раськень койтне-кирдатне – те прявт сюпавчи, конатне ютасть минек покштятнень-бабатнень пельде».
Пензань областень Эрзянь-мокшонь раськень культурной автономиянь прявтось Елена Первушкина тешкстызе, тедеде тиринь кельсэ валморонь ловномань коряс пелькстамось ютавтови кемнилеецеде. «Те пек покш тев. Ды тень кисэ покш сюкпря минек энтузиастонтень, эсь раськенть кисэ мелявтыцянтень Александр Федорович Борисовнень. Сон эрьва ие теи пек покш робота мероприятиянть анокстамга, – мерсь Елена Григорьевна. – Те иестэ весе масторось тешксты Ине Отечественной войнасо Изнямонь 80 иетнень. Те покш кенярксчи эрьванть туртов. Эйкакшт, пшкадян тыненк, вакссонок эште эрить сетне, кие олякстомтсь Тиринь масторонть ятонть эйстэ, кие кирдинзе войнань стакачитнень, важодсь тылсэ. Кортадо мартост, кевкстнеде войнань иетнеде, истят евтнематне питневтеметь».
Эряви меремс, Пазялго веленть содасызь ламо ендо. Ды ялатеке, васняяк, сень кувалма: тосонь эрицятне ванстызь эсь раськень оймест, эзизь стувто коест-кирдаст (тосо эрьва иестэ ютавтневи Эрзянь покшчи), весемесэ бажить ванстомс тиринь келест.
Кадык школасо, кода лия велетнесэяк, сон паро ладсо а ветяви, теке марто тосонь тонавтыцятне эрьва ладсо бажить содавтомс эйкакштнень эсест раськенть эрямо пингензэ марто, эйкакштнень оймес снартнить вельмевтемс тиринь келентень вечкемань сяткине.
Тень туртов сынь ютавтнить эрьва кодат чокшнеть, вастовомат, пелькстамот. Вейкесь эйстэст – тиринь кельсэ валморонь ловномань коряс. Тедеде конкурсось алтавсь Ине Изнямонь 80 иетнень топодемантень. Ды, эряви меремс, сонзэ участникекс кармасть аволь ансяк школань весе тонавтницятне, истя жо эйдень кужов якицятнеяк. Самай сынь тердезельтькак васенцекс сценанть лангс. Мельспаро ульнесь марямс, кода вишкинетне ловныть Серафима Люлякинань валморонзо. Эряви меремс, сынь эзть манявкшно. Валтнэнь евтасть видестэ ды чарькодевиксстэ.
Седе тов пелькстамонть поладсть школасо тонавтницятне 1-це классто саезь 9-це классос молемс. Весемезэ жо пелькстасть 30 эйкакшт. Весе сынь ловность валморотнень аволь «адя кодаяк». Эрьвась снартнесь панжомс валморонть смустензэ, невтемс сонзэ аволь кода паро, невтемс налксезь ладсо. А стяко жюринтень, козонь совасть Исполкомонь прявтось Татьяна Ларина, МР-нь культурань заслуженной важодицясь Раиса Щанкина ды тиринь раськенть кисэ мелявтыцясь Александр Борисов, пек стакаль кочкамс изницятнень. Эряви меремс, казневтеме эзь кадово кияк.
Изницятненень максозельть Шнамонь коневт ды казнеть, конатнень эрьва иестэ эсензэ ярмак лангс рамси те вастовоманть ютавтомасо лездыцясь Александр Борисов. Казнеть истя жо ульнесть Мордовия Республикань делегациянть пельдеяк.
Тиринь кельтнень ванстоманть кисэ тешкставсть школань тонавтыцятнеяк. Самай сынь максыть весе виест ды путыть оймест эйкакштнень эрзянь келентень тонавтомантень.
Истя жо вастовоманть лувсо эйкакштнень марто ветявсь профориентационной кортамо. Саранск ошонь Л.П. Кирюков лемсэ музыкальной училищань ды Ф.В. Сычков лемсэ художественной училищань тонавтыцятне евтнесть неть образовательной учреждениятнесэ тонавтнемадонть ды тердсть школань прядыця церынькатнень-тейтерькатнень варчамс эсь ерокчинть шкинемань профессиясо.
Кодамо жо кенярксчи эрзянь мазый моровтомо? Истямосо кунсолыцятнень кенярдовтызь Пазялго велень «Чевгелина» ды «Эрзянка» фольклорной коллективтне, истя жо Мордовия Республикань народной артисткась Анна Атласова ды «Ламзурь» фольклорной ансамблянь морыцятне. Сынст пельде кезэрень эрзянь моротне токизь весень седеест.
Вастовомась прядовсь сюкпрянь евтамосо. Васняяк школасо тонавтыцятненень, конатнень прявтсо Л.В. Спиридонова. Сынь, мезеяк лангс апак вано, снартнить а максомс лепамомо эрзянь келентень, раськень ойментень. Бути истя карми весе эрзянь велетнесэ, минек келесь карми эрямо!
Юлия Еремина