Четверг, июля 10, 2025
Важное

Сентябрянь 14-це чистэ Орданьбуень Баеньбуе велесэ панжсть кеврунго Россиянь Героентень Григорий Слугиннэнь. Вастовомасонть ульнесть Мордовиянь Прявтось Артём Здунов, Слугинтнэнь семиясь, Героенть боевой ялганзо, велень эрицятне ды Мордовиясо чачозтне.



Григорий Слугин чачсь ды кассь Орданьбуень моданть лангсо, эсь тевенть – Тиринь масторонтень служамонть – кочкизе эштё школасо тонавтнемстэ, секскак, кода лелязояк, сайсь мель молемс тонавтнеме военной училищав.

СВО-нть ушодовомсто эзь нее лия ки, кода молемс ванстомо Россиянь мельтнень-вановтнень. Васенце таркас офицерэсь свал аравтсь личной составонь эрямост ванстоманть. Вадря службанть кисэ сонензэ шкадо икеле максозель «гвардиянь капитан» лемесь, казезь «За отвагу» медальсэ ды кавксть – Мужествань ордентнэсэ.

Иеде икеле Григорий Слугин топавтсь боевой тевть Запорожской областень Вербовое веленть ванстоманзо коряс. Сентябрянь 25-це чинь вестэнть ятось ушодсь кежей каявома. Штабонь прявтось, гвардиянь капитанось саизе эсензэ лангс артиллериянь толонь ветямонть, сыргась ятонь прявт каявомань таркантень. Бажась лездамс ротань командирэнтень ды лоткавтомс каявоманть. Тюреманть видестэ ветямонть вельде ятонь войскатне кандсть редявикс ёмавкст ды ушодсть потамо. Потамсто ятось ёртсь офицерэнть ёнов дрон, Григорий Александрович чавовсь.

Слугинтнэнь семиянть туртов те зыянось пек покш. Григорийде ледстнематне кармить эрямо сонзэ малавикстнэнь, земляктнень ды мартонзо служицятнень седейтнесэ.

– Ней шкась аволь шожда, шка – зярдо парось тюри кеженть каршо. Григорий Александрович аштесь паронть ёно ды максызе тень кисэ эсь эрямонть, весень минек кисэ, Мордовиясо сэтьме эрямонть кисэ. Ансяк арась мезеяк седе стака, зярдо ёмавттано истят геройтнень, седе пек малавикстнэнь, ялгатнень туртов, зярдо героесь макссы эрямонзо эсь раськенть паро эрямонзо кисэ. Эряви кирдемс мельсэ: те минек питнейчинек, сон свал кадови мартонок. Пингеде-пингес эряви ванстомс сонзэ лементь, – кортась Артём Здунов.
Григорий Слугин явсь мель гирянь спортонтень – те рузонь спортонь видэсь, конань минек масторсонть сюпавт коензэ-кирданзо. Мордовиясо ней сонензэ явить мель кавто тёжадо ламо ломанть. Теке марто, те спортонь военно-прикладной видтнэнь армейской дисциплинатнень ютксто вейкесь.

Артём Здунов ёвтась мель Мордовиясо эрьва иестэ ютавтнемс Гирянь спортонь чемпионат, конантень максомс Россиянь Героенть Григорий Александрович Слугинэнь лементь. Баеньбуень ды Орданьбуень эрицятне, тесэ чачозтне шнызь те меленть.
Россиянь Героенть боевой ялгазо Александр Олегович ёвтась сюкпря Григориень тетянстэнь-аванстэнь вадря цёранть трямонзо-кастоманзо кисэ: «Гриша марто вейсэ аволь весть топавтынь боевой тевть. Те превей, ответственной боец, алкуксонь ялга».

Россиянь Героентень, гвардиянь капитанонтень Григорий Слугиннэнь кеврунгонть панжизь Мордовиянь Прявтось Артём Здунов, военноенть тетязо – Александр Григорьевич, авазо – Татьяна Васильевна, довазо – Алена Слугина ды лелязо – Александр Слугин.

Масторонь Геройденть ледстнемга ютавтозель панихида, конань прядовомга Мелетий владыкась мерсь: «Кода алкуксонь христианин, Григорий невтизе Тиринь масторонтень, эсь полксо служицятненень вечкеманть. Минь кирдтяно мельсэ геройтнень, кить максызь эсест эрямост ялгатнень кисэ. Свалшкань ледстнема Григорий воинэнтень».
Пурнавозтне путсть цецят гвардиянь капитанонь кеврунгонтень ды ледстизь сонзэ ине тевенть чатьмонемань минутасо. Баеньбуень калмолангсо Республикань Прявтось ваннызе часовнянть. Тешкстызе, Мордовиясо те кармась вадря коекс – стявтомс калмолангсо озномга ды кулозтнень ледстнемга истят аволь покш часовнят.

Те чистэнть Баеньбуесэ Артём Здунов башка кортась Григорий Слугинэнь семиянзо ды мартонзо служицятнень марто.
Слугинтнэнь семиясь – кеме, ялгаксчисэ эриця, сынь ванстыть духовной ды нравственной питнейчитнень. Александр Григорьевич ды Татьяна Васильевна свал кирдсть Александр ды Григорий цёраст мелест-вановтост, весе ушодксост, башка мель явсть эсь раськень, тиринь ёнксонь ды масторонь историянтень сынст мелест явовтомантень. Паряк, те лездась сенень: лелят-ялакст сюлмизь эрямост Россиянтень служамонть марто ды специальной военной операциянь васенце читнестэ саезь топавтсть эсь боевой долгост.
Истя жо толковасть семиянть туртов талновтыця кевкстематнеде. Вейкесь – калмолангонтень кинть теемась. Те ульнесь Григориень пельде аванстэнь алтамось. Ней сонзэ топавтсызь республикань прявттнэ.

Вастовомасонть истя жо яволявтозель: максомс велень школантень ды Баеньбуень вейке куронтень Россиянь Героенть лемензэ. Григорий Александровичень эрямозо – Отечествантень служамонь, воинской присягань кирдемань, отвагань ды мужествань невтема. Минек тевенек – ванстомс тень коряс ледстнематнень ды пачтямс эйкакшонок-нуцьканок туртов.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».