Тиринь енксонтень, культурантень, раськентень, келентень вечкемась ушодови эйкакш пингестэ. Тенень эйкакшонть тонавтыть семиясо, седе тов – эйдень кужосо ды школасо. Аволь умок тиринь газетась якась инжекс Саранскоень 90 № эйдень кужов, косо минь эсенек сельмесэ ванынек, кодамо патриотической важодема ютавтови эйдетнень марто. Эряви меремс, те эйдень кужось уш ламо иеть лемдеви Этнокультурной тевкадовксонь куншкакурокс.
Эйдень кужонь прявтокс нилеце ие важоди эсь тевензэ содыця, эряза ды эрзянь ундокс марто авась Галина Васильевна Заева. Сон чачсь Саранскойсэ. Тетязо, Василий Николаевич, Отяжбуень Наборные Сыреси велень эрзя, авазо, Нина Васильевна, Рязанень енксонь рузава. Од порасто направлениянь коряс кучозель Саранскоев, косо ламо иеть важодсь строительной училищасо тонавтыцякс. Тесэ жо вастызе вечкеманзо, лиссь мирденень, чачтсь кавто тейтерькат, ды семиясь кадовсь эрямо Мордовиясо.
Галина Заева ледстни, школасо тонавтнемстэ сон пек активноель. Свал ардтнесь пионерэнь лагерев, косо ульнесь вожатоекс. Эйкакштне сонзэ вечкилизь, свал пурнавильть перьканзо. Эрьванть марто од тейтересь муиль кель-вал. Сонензэ вечкевсь истямо эряза эрямось. Школасо вейкеяк мероприятия а ютниль сонтемензэ.
Зярдо сась шка кочкамс, ков Галина моли тонавтнеме, тейтересь апак кавтолдо евтызе умонь мелензэ-бажамонзо – сон, кода авазо, карми тонавтыцякс. Секскак документэнзэ максынзе М.Е. Евсевьев лемсэ МГПУ-нь биологиянь ды химиянь факультетэв. Ансяк важодемс специальностень коряс тензэ эзь саво, кочкизе аламодо лия енксонть, конась истя жо сюлмавозь эйкакш марто. Мольсь важодеме эйдень кужов.
– Нилеце курссо тонавтнемстэ карминь важодеме Саранскоень 66 № эйдень кужосо. Ушодынь воспитателекс, мелезэнь тусь. Сюкпря евтан те эйдень кужонь прявтонтень Лидия Владимировна Дубавцеванень. Сон ульнесь монень вадря тонавтыцякс. Те таркасонть важодинь кото иеть, мейле ютынь 112 № эйдень кужов, тосо уш важодинь старшей воспитателекс. Ниле иеде икеле аравтымизь 90 № эйдень кужонь прявтокс, – евтни Галина Васильевна.
Весемезэ те эйдень кужонтень якить 355 эйкакшт, важодить 14 группат. Эйдетнень марто роботыть 28 воспитательть ды 13 воспитателень лездыцят. Теде башка, эйдень кужосонть улить эште зярыя важодицят: костюмерт, музыкальной роботникть, шлицят-урядыцят, пидицят-паницят ды ванстыцят. Вейке валсо, важодицянь коллективесь аволь вишкинетнестэ.
– Минек коллективесь пек вадря. Эйкакштнень марто важодить тевде а пелиця, ероков, эряза ломанть. Лиякс меремс, алкуксонь профессионалт. Чарькодеви, эйкакш марто важодемась аволь шождатнестэ. Ансяк, бути седейсэть палы те роботантень вечкемань толнэсь, стакачитне изнявить, тонь весемесь лиси. Эрьва валске мон ютан важодема таркав паро ежосо, эдь тесэ весемесь кенярдовты. Свал кортан, эрямосонть эряви муемс важодема оймень коряс. Сюкпря Пазонтень, монь сон ули, – корты Галина Заева.
Эряви меремс, 90 № эйдень кужосонть эйкакштне марто ютавтови покш важодема. Галина Васильевна тешксты, сынь важодить региональной компонент юрсо, эдь аволь стяко сынст эйдень кужось лемдеви Этнокультурной тевкадовксонь куншкакурокс. Кода содатано, РФ-нь Президентэнть Владимир Путинэнь Указонзо коряс, 2026 иесь яволявтозь Россиянь раськетнень вейсэндявомань иекс, секскак 90№ эйдень кужонть важодемась кеместэ сюлмавозь тень марто. Тесэ покш мель явови раськень культурантень, койтнень-кирдатнень ванстомантень: келейстэ тешкставить эрзянь-мокшонь, татаронь ды лия раськень кенярксчитне, теде башка, эйкакштнень туртов ветявить патриотической занятият.
Истя жо Галина Васильевна евтнесь, неень шкане топавтови покш важодема лия региононь эйдень кужотнень мартояк. Весемесь ушодовсь Од иеде икеле, зярдо шабра региононь эйдень кужотне Интернетсэ яволявтсть эйкакштнень туртов артовксонь акция.
– Ней минь важодтяно Санкт-Петербургонь, Казанень, Чувашия Республикань зярыя ошонь эйдень кужотнень марто. Весе важодемась моли электронной почта вельде. Тевс нолдатано акцият. Саемга, эйкакштненень эряви артовкс вельде невтемс тиринь енксонть эли сонзэ кодамояк культурной объектэнть мазычинзэ-сюпавчинзэ. Минек кужось ней аноксты пек мельстуиця акция-проект, конань вельде карматано евтнеме лия региононь эйдетнень туртов минек республикань культурадонть, раськень койтнеде ды тешкстнэде. Саемга, эйкакштне воспитательтнень марто вейсэ анокстызь Мордовиянь тешксэнть – ривезенть. Някась-ракшась лиссь пек вадря, эйкакштне сонзэ оршавтызь раськень оршамопельсэ. Те ривезенть ды лия атрибутиканть арсетяно кучомс лия регионов. Эдь эрьва артовксось, эрьва сермась кази эйдетнень туртов покш кеняркс, – евтни Галина Васильевна.
Пек паро, эйдетнень марто ютавтови истямо важодема. Те корты седе, Тиринь масторонтень вечкемась эйсэст карми касомо ды виевгадомо.
Истя жо минь карминек содамо, 90 № эйдень кужонть перька теезь экологиянь яннэ, конань эйкакштне содавтыть покш мельспаросо. Теде башка, Галина Васильевнань валонзо коряс, маласо шкасто арсеви теемс раськень яннэ, конань вельде эйдетне ды сынст тетяст-аваст теевить содавиксэкс раськень мифологиянь образтнэнь марто – Ведьаванть, Вирьаванть, Куйгорожонть ды лиятнень.
Башка мель кортамосонть Галина Васильевна явсь эйдень кужонь раськень музеентень, конась ашти васенце этажсо. Музеенть туртов ламо иеть, сонзэ пурнызь сынсь воспитательтне. Сон аволь покш, ансяк эйсэнзэ ули весе эрявиксэсь. Эйкакштнень туртов музейсэнть ютавтовить занятият, конатнень лувсо эйдетне содавтовить раськень культуранть марто.
Седе тов кортамонть поладынек 90 № эйдень кужонь старшей воспитателенть Галина Николаевна Трофимова марто. Аванть важодемань стажозо покш – 21 ие. Галина Николаевна чачсь Ицяло велесэ. Тетязо – руз, авазо – мокшава.
Школань прядомадо мейле од тейтересь тусь тонавтнеме Саранскоев. Прядызе Н.П. Огарев лемсэ МГУ-нь филологиянь факультетэнть. Эйдень кужов сась важодеме васенце эйкакшонзо марто.
– Ветия эйкакшонть эйдень кужов ды кадовинь мартонзо. Васенце чистэнть лездынь воспитательтнень туртов группань тевтнесэ, ванынь, кода ютавтови важодемась вишкинькатнень марто. Тевесь мелезэнь тусь. Сермадынь яволявтома, секе жо чистэнть саимизь важодеме. 16 иеть роботынь 97 № эйдень кужосо, мейле сынь тей, – евтни Галина Николаевна.
Аванть валонзо коряс, воспитателень тевесь кеместэ сюлмавозь эйкакштненень вечкеманть марто. Секскак сынст коллективсэ важодить эсест тевест кисэ мелявтыця ломанть. Чарькодеви, эйкакш марто важодемась аволь шождатнестэ, сонензэ максовить ламо вийть ды цидярдома. Ансяк Галина Николаевна эсь тевензэ а лови стакакс. Вана уш зяро иеть важодема таркав сон сакшны шожда ойме марто. Эрьва чизэ ушодови вейкетьстэ: васняяк содавты эрьва группань эйкакштнень, вастови воспитательтнень марто, кортасызь, кода молить тевтне группатнева, улить-арасть кодаткак мелявкст ды кевкстемат.
Неень шкане Галина Васильевна паро превс путыця од воспитательтнень туртов. Сон эряза, эрьва ков кенериця, эрьва тевс чарькодиця. Весе пшкалить тензэ лезкс мельга. Вадря, зярдо минек эйкакштнень марто важодить истят профессионалт.
Алена Артемьева
Фототне 90 № эйдень кужонть.