Пятница, июля 01, 2022
Важное

 

Эрямом перть ламо таркава якинь, ламо вастовомасо ульнинь. Ламо неинь, ламо маринь ды ламо мезе ютавтынь седеем пачка: талноматкак, ацирьгалематкак ды, нама, кенярксткак. Ды ялатеке истят ёжомарямот, кодат печтинь поэзиянь чокшнестэнть, кона ульнесь А. С. Пушкин лемсэ библиотекасо июнень 16-це чистэ, умок уш эзть совсе седеезэнь.

Чокшненть перть мезе мольсь потсон, вейке валсо а ёвтасак. Теке мерят, лавтовон лангс сёлмот чачсть ды кепедимизь менелев: вант, келя, верде, кодамо мазый моданок, кодат ломанть эрить лангсонзо, кодамо сюпав ды ламо тюсонь сынст эрямост. Весе тень эйс се чокшнестэнть «чопавтимизь» эрзянь мазыйдеяк мазый тейтересь, ней од авась (аволь умок чачсь эйдезэ) Алина Подгорнова.
Ловныцятне, арсян, марсизь те лементь, содавикст сонзэ шкинеманзо марто. Кинень эзь пра истямо уцяска, тердян нейке муемс А.Подгорновань валморонзо марто книгатнень. Эйстэст лиссть колмо: «Марямга» (2013 ие), «Кроме рифм» (2016 ие), «Мель» (2021 ие). Апак кавтолдо мерян: сынь а кадтадызь мельтеме, икеленк панжови алкуксонь поэзиянь мастор, конань трокс ютамсто марясынк ды несынк эрямонь весе тюстнэнь.


Вастовомасонть гайгсть ансяк валморот. Тень лангс апак вано, сынь киньгак эзизь налкставто ды эзизь сизевте, мезде пельсь ды эсь пелемадонзо видькстась сонсь поэтессась. Мекевлангт, эрьва валморось пурнавозтнень оймес валсь ансяк лембе ёжомарямот, кармавтсь дивсеме эрзянь келенть мазычинзэ кувалма, арсеме ды лия сельмесэ варштамо сень лангс, мезе моли минек перька.
Мезесь седеяк лембекс тейсь вастовоманть, те – састо гайгиця музыкась, конань алов пек парсте ладясь Алинань сэтьме ды чевте вайгелеськак. Эсензэ валморотнень сон аволь ловнось, теке мерят, моразь морась. Ды мезесь эзизе кадо мельтеме киньгак: поэтессась валморонзо ловнось конёвс апак варштне. Те кодамо ёроковокс ды превейкс эряви улемс – часто ламо шкань перть ловнозь валморотнень кирдемс пря потсо?! Алина сынст ловнось, теке мерят, пештеть чулгонесь. Стамбаро, апак капша ды ёжомарязь.

Весе тень эйстэ сайтянзат ансяк покштояк покш мельспаро ды каштанчи. Эрзянь од ломантнень ютксо улить парсте ды ёроковсто сёрмадыцят! Истят сёрмадыцят, конатне маштыть чарькодеме эрямонь смустенть, марямо вечкемань танстенть, редямо пертьпельксэнть мазычинзэ ды, мезесь весемеде питней, весе тень мазыйстэ ды превейстэ невтеме тиринь кельсэ эсест шкинемаст вельде.
А стяко вастовоманть прядовомсто весе пурнавозтне кувать цяпасть поэтессантень стядо, ёвтасть тензэ седейшкавань сюконямот ды казсть мазый цецят.

Вастовомась – те таго вейке пелькс «Мордовиянь од вайгельть» республикань литературань фестиваленть молеманзо пингстэ, конась ютавтови «Некоммерческое партнерство «Национальный спектр» издателень ассоциациянть ды А. С. Пушкин лемсэ раськень библиотеканть (Мордовия Республика) «Культура» национальной проектэнь «Творческие люди» федеральной проектэнть лувсо. Фестиваленть ютавтоманзо туртов ярмактне явозь «Россиянь культурань фондонть» пельде.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».