Декабрянь 17-18-це читнестэ Саранскойсэ важодсь Российской Федерациянь Финнэнь-угрань раськетнень ассоциациянь 7-це Инекужось. Сон панжовсь ды ютавтовсь Республикань раськень театрасо. Тей сакшность финнэнь-угрань ды самодийской раськетне, кить эрить минек масторонь 43 регионтнэва.

Театрань фойесэнть мельспаросо вастсть инжеть минек масторонь эрьва кодамо ёнкссто: Удмуртия, Карелия, Марий Эл, Коми, Татарстан, Башкортостан, Чувашия республикатнестэ, Кировонь, Владимирэнь, Московонь, Ленинградонь, Нижнеень, Мурманскоень, Оренбургонь, Пензань областтнестэ, Краснодаронь ды Пермень крайтнестэ, Ямало-Ненецкой, Ханты-Мансийской, Ненецкой автономной округтнестэ ды лия таркатнестэ.

Мордовияв сакшность Россиянь федеральной ды региональной округонь общественной вейсэндявксонь прявтт ды тов совицят, культурань, образованиянь, наукань важодицят, раськеютконь тевтнесэ экспертт, од ломанень вейсэндявкстнэс совицят, эсенек республикань ды Мордовиянь томбальде журналистт.

Инекужонть прявт тевезэ – гражданской вейсэндявоманть кемекстамось, Россиясо ды сонзэ томбале эриця ламо раськетнень коест-кирдаст вельмевтемась ды ванстомась, раськеютконь тевтнень виевгавтомась.

Васняяк инжетне теевсть содавиксэкс васенце этажсо невтевиця кедьчелькев ломантнень кедьсэ анокстазь выставканть марто. Тосо кенярдовтсть сельметь чувтосто керсевкстнэ, кодавкстнэ-викшневкстнэ, мазылгавтозь кевердезь понань кемтне, эсь кедьсэ стазь някатне ды истя седе тов.

Инекужось ушодовсь «Торама» фольклоронь ансамблянть кезэрень покш чинь ушодовомань лувонть невтемасто. Седе тов сценанть лангс тердевсь Россиянь Финнэнь-угрань раськетнень ассоциациянь прявтось Пётр Тултаев.

– Течи пурнавинек Саранскойсэ АФУН-нть вийсэ ниле иень перть теезденть кортамо, – мерсь Пётр Николаевич.
Седе тов сон теинзе содавиксэкс весе пурнавозтнень, кие ды кодамо регионсто сась инжекс. Вейсэ кунсоловсь РФ-нь Гимнась. Чатьмонемань минутасо ледстязельть ниле иень перть те тевсэнть виевстэ важодицятнень лемест, кить те шкастонть тусть эрямосто.
РФ-нь Президентэнь Администрациянь Руководителень полавтыцянть Магомедсалам Магомедовонь пельде пшкадеманть ловнызе РФ-нь Президентэнь Внутренней политикань коряс управлениянь Раськень политикань департаментэнь прявт советникесь Алексей Яковлев. Эйсэнзэ кортави: «Финнэнь-угрань раськетнень покш путовксост Россиянь государственностенть кемекстамосо ды ламот раськетнень вейсэндямосо. Неень шкане Российской Федерациясь ашти васенце таркасо финнэнь-угрань раськеютконь ламодояк ламо тевтнень топавтомасо. Финнэнь-угрань культурань лия ёнов а молиця койтне-кирдатне аштить Россиянь культурань а явовиця пельксэкс».
Инекужосо важодиця органтнэнь кемекстамодост мейле кунсолозель мандатной комиссиянь докладось.

Пурнавозтне паро мельсэ кунсолызь «Российской Федерациянь Финнэнь-угрань раськетнень ассоциация» Весероссиянь общественной движениянь региононь отделениятнес совицятнень тиринь кельсэ пачтямост (синхрононь перевод марто). Тешкстасынек, минек республиканть пельде эрзянь кельсэ доклад тейсь МР-нь Писателень вейсэндявксонь прявтось Татьяна Швецова, мокшонь – Эрзянь ды мокшонь раськень регионъютконь общественной вейсэндявксонь председателесь Юрий Мишанин.

Тешкстасынек, эрьва делегатось бажась пачтямо седе ламо сынст регионсо теезденть ды икелепелень аравтлувдонть. Теке шкасто ледстязельть сеть асатыкстнэ, конатнень коряс сынь кармить кортамо секциятнесэ ды кемить АФУН-нть пельде лезксэнть лангс. Кой-кона кевкстематне ванкшновсть сеске Инекужосонть, сынст коряс толковамот тейсь Ассоциациянь прявтось Пётр Тултаев.

Чинь омбоце пельксстэнть Инекужонтень сакшнось Мордовия Республикань Прявтось Артём Здунов. Артём Алексеевич делегаттнэнень пшкадсь эрзянь ды мокшонь кельтнесэ, сон ёвтась сюкпрянь валт Россиянь АФУН-нь совицятненень лиятнень ёнов а молиця культуранть ванстоманзо кисэ. – Финнэнь-угрань раськетне зярыя пингетнень перть ванстыть эсест коест-кирдаст. Минек раськетнень кондямо малавиксчись чуросто вастневи лиятнень ютксо! Тынк Инекужонть покш таликазо Россиянь ламо раськетнень культурань эрямосо вейсэндямосонть. Тынь – государственной вейсэндявксонь пек паро невтевкс, истя жо раськеютконь мастортнэнь ютксо, – мерсь МР-нь Прявтось.

Артём Здунов истя жо покш мель явсь аволь коммерческой организациятнень важодемаст виевгавтомань эрявиксчинть лангс.
– Неень шкане НКО-нень улить ламо кист-яност. Фондтнэ явить эрьва кодат грантт тынк мельтнень-арсематнень топавтомс. Невтемакс, тедеде ярмаконь лезкс явозь колоньгемень проекттнэнень. Сынст ютксто ламотненень покш питне путозь федеральной властень кирдийтнень ёндо, – мерсь Артём Алексеевич.

«Российской Федерациянь Финнэнь-угрань раськетнень ассоциация» Общероссийской общественной движениянть важодемадо докладонть теизе сонзэ прявтось Пётр Тултаев. Пётр Николаевич кортась вейсэ тевтнень топавтомадо, ояксчисэ раськетнень эрямодо. Сон тешкстась, маласо шкастонть эряви виевгавтомс важодеманть цифровой лувсо важодеманть коряс. Россиянь финнэнь-угрань раськень кельтнень улить онлайн-валксост. Сынст коряс ушодсть тевест социальной сеттне. Те кевкстеманть коряс мерсь виевгавтомс важодеманть ды седе сеедьстэ невтемс тиринь кельтнень ды культуранть Интернетсэ.
Седе тов тейсь доклад ревизионной комиссиясь. Сонзэ прявтокс вемельсэ кочказь Николай Храмов. Теке жо чистэнть ютавтозельть Россиянь АФУН-нь прявтонь кочкамот. Весе делегаттнэ вемельсэ максызь вайгелест Пётр Тултаевень кисэ. Сонзэ полавтыцякс кармасть Марий Элстэ Михаил Васютин ды Удмуртиясто Татьяна Ишматова.
Инекужос сыцятне пурнавкшность тематической зярыя секцияс, конатнень ютксо: «Родные языки, образование и культура финно-угорских народов России: современные стратегии развития», «Информационные технологии в полиэтническом обществе», «Этнотуризм, бизнес, проектная деятельность», «Молодежные инициативы и лучшие практики». «Финно-угорские народы в едином культурном коде многонациональной России» кругловой столентень делегаттнэ пурнавкшность омбоце чистэ.
Инекужонть важодемстэ ёвтазельть ламо арсемат ды талновтыця кевкстемат, превс путомат. Ламотне эйстэст совить Резолюциянтень. Кемеви, сынь весе кармить топавтовомо шкастонзо.


Татьяна ИШМАТОВА,
«Удмурт Кенеш» Всеудмуртской ассоциациянь президентэсь:

– Тешкстаса, Российской Федерациянь Финнэнь-угрань раськетнень ассоциациясь сайсь ушодкс минек республикасто, тень ловозь, минек ломантненень аволь ялатеке, мезе карми улеме икелепелев те вейсэндявксонть марто. Мельспарозонок, течи редятано сонзэ виевгадоманзо. Те вастовомасонть несынек, кода эряви важодемс икелепелев минек культуранть, кельтнень ванстомаст, од ломантнесэ патриотической лувонть кемекстамонть коряс.
Минек делегациясь анок совавтомс эрямос сеть паро арсематнень, лезэв тевтнень, конатнень тешкстасынзе топавтомс Инекужось, конат ладить федеральной вешематненень. Эдь пек эрявикс тев содамс, кода течи арсетяно, мезес неень шкане бажатано?!

Анна АНХИМОВА,
«Государственный историко-архитектурный и этнографический музей-заповедник «Кижи» Культурань ФГБУ-нь общественностенть марто сюлмотнень, покш мероприятиятнень, музейной проекттнэнь ды программатнень коряс специалистэсь, «Лига прибалтийско-финских народов» Карелиянь региональной общественной организациянь правлениянь председателесь:

– Карелия Республикасто Инекужов сынь вепсэнь раськенть пельде. Делегациянок аволь покш, ниленек: ютксонок карелэнь, вепсэнь ды финнэнь раськеть. Мон сован «Российской Федерациянь Финнэнь-угрань раськень ассоциация» Весероссиянь общественной движениянь президиумс. Инекужосонть теевсть итогт ниле иень перть важодемантень. Минь маринек ламо од эсенек туртов, конань карматано нолдамо тевс республикасонок. Истя жо седейшкава пачтинек седе, мезе тееви меельце шкасто Карелия Республикасо, башка мель явинек этнотуризмань темантень.
Койсэнь, покш лезэ кода минь саинек, истя лиятнененьгак пачтинек.

Дмитрий МАКАЙКИН, «Московонь областень эрзянь ды мокшонь национально-культурной автономия» общественной вейсэндявксонь прявтось:

– Инекужов минек делегациясь сась покш мельспаросо. А мезть сёпомс, меельце кавто иетнестэ, пандемиянь шкастонть, чуросто карминек вастневеме, вейсэ талновтыця кевкстематнень ванкшномо.
Орманть коряс стакачитнень лангс апак вано, Московонь областень Химки ошсо те иестэ ютавтынек «Шумбрат, Подмосковье!» покш чинть, ков пурнавкшность ламо эрзят ды мокшот. Инекужонть ютавтомадо икеле ламо кортынек келенек ванстомадо, кезэрень койтнень-кирдатнень вельмевтемадо. Течи неть тематне поладовсть Кругловой стольсэнть ды секциятнесэ. Ули мелем ёвтамс сюкпря кода Москов алонь правительствантень, истя жо Мордовиянь прявттнэнень раськень паро тевтнень виевгавтоманть ды лездамонть кисэ.

Валентина ЮДИНА
Фототне Эдуард Ретунскиень