Понедельник, июля 22, 2024
Важное

Неть читнестэ Саранск ошонь Культурань кудосо ютавтовсь «Норовонь кептерне» («Урожайная корзинка») выставкась, косо Саранск ошонь ды маласо велетнень эрицятне невтизь эсь пиретнесэ кастозь сюпавчинть. Выставкань лавсятнень лангсо – эмежть ды фруктат, цецясто мазый теевкст, салтовкст-пидевкст ды ламо лия мезе, мезенть азораватне ды азортнэ кастызь эсь эмежпиретнесэ.



Эряви меремс, «Урожайная корзинка» эрьва иень выставкасонть эсь ёрокчист ды кизэнь перть кастозест-анокстазест невтизь кодгеменде ламо ломанть. Кие-бути мероприятиянть ютавтомадо мари яволявтоматнестэ ды социальной сеттнень куротнестэ, а вана свалшкань участниктнень жо выставкань пурныцятне тердить сынсь.
Тедеде сон ютавтовсь уш кемголмовоцеде. Программантень совасть кенярксчинь столенть пурнамонь-анокстамонь коряс мастер-класс, творческой коллективтнень пельде пелькстамот ды мазый морот. Эсь шкинемасост инжетнень ды участниктнень кенярдовтызь «Вармава» фольклорной ансамблясь, Дмитрий Фадейкин, Екатерина Дигалёва, Павел Молчанов, Артём Мамаев ды лия морыцятне.

Мероприятиянь участниктненень лембе поздоровт ёвтасть покш инжетне, конатнень ютксо ульнесть Саранск ошонь Ветеранонь советэнь председателень полавтыцясь Н. И. Автаева, Саранск ошонь Администрациянь Социальной политикань коряс департаментэнь прявтонь полавтыцясь М. И. Спиридонова, ошонь Администрациянь Сыре ломантнень марто важодемань коряс управлениянь прявтось Т. И. Бородкина, республикань Ветеранонь советэнь культурань коряс комиссиянь ответственной секретаресь И. В. Горяева ды лиятне.

Кода уш тешкставсь икеле, выставкасонть ламо ульнесть истят ломанть, конатне эсь ёрокчист невтить эрьва иестэ. Ульнесть жо, кить примасть участия васенцеде. Истятнэнь ютксо – Лямбирень райононь Александровка велень Культурань кудонь Культурно-досуговой центрань важодицятне Любовь Александровна Милаева прявтост марто. Кадык выставкань участникекс ульнесть васенцеде, ансяк экспозицияст пурназель кода эряви – невтемс ульнесь мезе.

– Овсе аволь умок, сентябрянь 12-це чистэ, минь эсенек Культурань кудосо ютавтынек сёксень мазый кенярксчи – Норовавань чи, косо истя жо невтинек минек азораватнень изнявксост – эсь садпиретнестэ пурназь урожаенть. Те кенярксчинть невтинек социальной сеттнесэ эсь куротнесэ. Тосто мазый фотографиятнень неизь «Урожайная корзинка» выставкань анокстыцятне ды тердимизь невтемс эсь ёрокчинть, – ёвтни Любовь Милаева. – Эряви ёвтамс, «Норовавань чи» мероприятиянть минь ютавтнетяно эрьва иестэ ды сон теевсь уш паро коекс. Эйзэнзэ пурнатано аволь ансяк эмежтнень, фруктатнень ды лия касовкстнэнь выставка, истя жо арсетяно культурной покш программа. Ламо мезе тейтяно эйкакштнень марто. Сыненст невтевить эрзянь раськень койть, мартост ютавтовить раськень налксемат. Те весемесь тенст пек вечкевкшны. Тедеде мероприятиясь прядовсь эрзянь раськень ярсамопельде инжетнень каванямосонть.

Кода тешкстась Любовь Александровна, выставканть туртов экспозициянть пурнызе эсь пиресэ кастозь эмежтнестэ. Иесь тедеде удалась, урожаесь кассь ламо ды вадря.
Выставкань эштё веенст инжетне састь Луховкасто. Делегациянть прявтсо ульнесь Луховка посёлкасо Весероссиянь инвалидтнэнь обществань МР-нь вейсэндявксонь председателесь Наталья Викторовна Моисеева, мартонзо велень активисттнэ – Светлана Михайловна Садомская, Мария Владимировна Денисова, Тамара Ивановна Тюхтяева. Аватне тесэ невтизь эсь пиретнесэ кастозест.

– Аволь умок «Дары осени» выставка ульнесь минек посёлкань ДК-со, косо эсь маштоматнень невтизь Луховкань ёроков эрицятне. Тедеде пурназь сюпав урожаенть ней невттяно тесэ, – тешкстызе Наталья Моисеева. – Эряви меремс, аватне тевтеме а аштить. Минек ули эсенек куронок, козонь совить зярыя ломанть. Юткошкасто весе вейсэ топавттано мелень коряс куш кодамо тевть – кодатано, викшнетяно, статано. Ды кодамо выставка эли мероприятия аволь юта, минь свал тосо.

А вана Максутовтнень семиясь – Альмира Саниулловна ды Зыя Зякяиревич – кенярдовтынзе инжетнень аволь ансяк эсь пирестэ пурназь сюпав урожайсэнть ды мазый цецятнесэ, истя жо овсе вишкине яксяргинетнесэ, конатне лиссть неть читнестэ. А мезе, те эдь истя жо «Норовонь кептернентень» совавтови.
Ды, нама, эрьва пелькстамосо улить изницят. «Урожайная корзинка» выставкасонть истя жо ёвтавсть «Сехте вадря композиция» ды «Сехте вадря урожай» номинациятнесэ изницятне. Эрьва номинациясонть тешкстазь зярыя изницят. Кода мерсть мероприятиянь анокстыцятне, выставкань прявт тевесь – тешкстамс весе участниктнень а шожда трудост.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».