Чувашиянь Алатырень райононь Алтышева велень Советской Союзонь Героенть Я.Г. Сульдин лемсэ основной общеобразовательной школасо ютась «Эрзянь вайгель» регионъютконь творческой пелькстамось. Сон алтавсь Россиянь раськетнень вейсэндявомань иентень, Чувашиясо Раськень ялгаксчинь иентень ды Никул Эркаень чачома чистэнзэ саезь 120 иетненень.
Конкурсонь ютавтыцякс кармасть Чувашиянь Образованиянь министерствась, республикань Образованиянь институтось, Эрзянь ды мокшонь культурань центрась, Алатырской муниципальной округонь администрациянь образованиянь отделэсь. Сонензэ явсть мель 5–18 иесэ эйкакштне ды тонавтницятне.
Те пелькстамонтень пачколинек миньгак. Паро мельсэ вастымизь школань прявтось Ирина Викторовна Долгова. Сонзэ лемензэ Мордовиясо парсте содасызь. Авась эрьва ие ускси тонавтницят келень ды литературань олимпиадав. Алтышевань школась ней вейкине школа Чувашиясо, косо ветить эрзянь кель. Секскак пелькстамось эрьва иестэ ютакшны тесэ.
Мазый моросо ушодовсь «Эрзянь вайгель» конкурсонь панжомась. Лембе вал марто пурнавозтненень пшкадсть инжетне: Алатырень муниципальной округонь администрациянь прявтось Н.И. Шпилевая, «Эрзянь ды мокшонь культурань центра» Чувашиянь общественной вейсэндявксонь прявтось В.П. Седойкин, Эрзянь раськень койтнень-кирдатнень, келень ванстомань ды кастомань-кепетемань фондонь прявтось Т.И. Ларина, Мордовиянь Писателень союзонь правлениянь прявтось Т.П. Швецова, Алтышевань территориальной отделэнь прявтось В.И. Кедяров ды лиятне.
– Покш сюкпря весе сеть ломантненень, кить, Мордовиянь томбале эрязь, ванстыть минек койтнень-кирдатнень, культуранть, келенть, теить весементь, илязо ема раськенек. Сюкпря эйкакштненень ды тонавтыцятненень, конат явить мель пелькстамонтень. Минь ускинек тенст казнекс эрзянь книгат, газетат ды журналт, – кортась Татьяна Ларина.
– «Эрзянь вайгель» творческой конкурсонть васенцеде варчамонь кисэ ютавтынек 2014 иестэ. Васня сакшность эсенек районсто. А уш 2018 иентень тердинек лия районтнэньгак. Седе тов пелькстамонть кармась регионъютконь статусозо. Заочна важодемат тенек кучнесть Ульяновскоень, Оренбургонь енкстнэстэ, «Тавла» образованиянь центрань – Саранскоень 17№ школасто. Течи жо тесэ Чувашиянь 12 районсто ды Мордовиянь Орданьбуень Низовкань средней школань тонавтницятне. Тедеде пелькстамонтень кучозельть 500 яволявтомат! Мельспаро, зярдо ломантне конкурсонь ютавтомадо икеле гайневтить, кевкстнить, карми-арась пелькстамось, кодамо тема кочказь. Сонзэ учить, лисни, эряви ютавтомс. Эрьва участникесь казеви сертификатсо, изницятне ды призертнэ – дипломсо ды казнесэ, – евтнесь школань прявтось Ирина Долгова.
Тедеде эйкакштне пелькстасть кото номинациява: «Эркаень гайттне» (стихень ды прозань ловномат), «Эркаень театра» (сцена лангсо невтемат), «Россиянь мелодият» (раськень моронь морамот), «Кода течи ванстомс культурань ды кудораськень койтнень» (эссень пелькстамо), «Ялгаксчинь тюст» (артовксонь пелькстамо). Эйкакштнень лангсо ульнесть раськень мазыйдеяк мазый оршамопельть. Жюринтень пек а шождаль кочкамс сехте виевтнень, партнэнь.
– Монень пек вечкеви эссень сермадомань коряс номинациясь. Ловнат ды кецнят: эйкакшось арси, сермады мелензэ-арсеманзо, евтни эсензэ раськень сюпав койтнеде, сынст эрявиксчидест, – корты Ирина Викторовна.
Зяро кецямот ульнесть изницятнень каземасонть! Виев цяпамосо вастызь сетнень, кить алкукс невтизь пряст, анокстасть вадря номерт.
Школанть эрямозо течи
Алтышевань основной общеобразовательной школасо ней тонавтнить 50 эйкакшт, весе теке велень. 10-11-це класстнэ тонавтнить шабрасо аштиця Алтышева поселкасо. Эйдень кужов яксить кемень эйкакшт. Школась валдо, лембе, мазый. 2024 иестэ «Образование» национальной проектэнть коряс ютасть покш витнемат-петнемат. Полавтозельть коммуникациятне, ней ули од оборудования, мебель. Седе икеле иетнестэ витнезельть латось, спортзалось. Ирина Викторовнань ансяк ладякшнызь, зярдо ушодовсть витнематне. Нама, васня авантень стакаль чарькодемс строительстванть марто сюлмавозь тевтнень, эрявсь якавтомс ламо коневт, ансяк весементь цидярдызе те валдо прев марто эрзявась.
Школасонть нейгак важодить учительтне, конат эште тонавтсть Ирина Викторовнань, кода кортыть, советской шкань. Сынь весе ризныть школаст, эйкакштнень кис: илизь пекста, илизь ютавто тонавтнеме ковгак ошов. Тесэ максыть вадря, кеме содамочить. Ней башка тарка школасонть явозь боевой ды трудовой славань музеентень. Тесэ эйкакштненень ютавтовить экскурсият ды занятият. А уш кодат умонь экспонатт пурназь тей! Невтневить кезэрень ули-паротне, стендсэ пачтяви тесэ чачозь содавикс ломантнеде, Ине Отечественной войнань участниктнеде.
Башка мель явови спортонь енксонтень. Школанть вакссо теезь сокссо ардтнемань ки. Кортыть, истямо косояк районсонть арась. Истя жо ветяви боксонь секция, тренерэсь недлязонзо весть сакшны Алатырьстэ.
Сонсь И.В. Долгова 5–9-це класстнэсэ вети эрзянь кель ды литература. Тонавтницянзо свал пелькстыть эрзянь ды мокшонь келень Регионъютконь олимпиадасо, кельтнень Северо-восточной олимпиадасо. Теде башка, Ирина Викторовна аноксты эйкакштнень марто киштемань-морамонь номерт. Васенце образованиянь коряс сон – хореограф. Тонавтнесь Саранскоень культурань училищасо, седе тов заочна прядызе М.Е. Евсевьев лемсэ МГПИ-нть (ней – МГПУ).
2022 иестэ Ирина Викторовна сайсь васенце тарка «Тиринь келень сехте паро тонавтыця» Алатырень райононь пелькстамосонть. Седе тов ульнесь республикань этапось, косо пелькстасть ветькень, рузонь келень ламо тонавтыцят. Эрзянь келень тонавтыцясь юткстост ськамонзоль. Сон совась вете сехте паро тонавтыцятнень юткс. Педагогось теи весементь – эрзянь келенть, минек раськень койтнень-кирдатнень, культуранть ванстомга.
Татьяна Маторкина