Аволь умок минь ульнинек инжекс Отяжелень райононь Дюрькина эрзянь велесэнть. Велесь покш, мазый. Зярдо-бути тесэ ульнесь вадря колхоз, конась гайгсь республиканть келес. Сон каладсь. Ульнесь школа. Зярыя иеде икеле пекстызь. Ней кадовсть Культурань кудось, библиотекась, почтась, медпунктось ды ломантне, конат весе седейсэ мелявтыть эсь тиринь веленть кисэ. Течи содавттадызь Дюрькинань сеть аватнень марто, конатне велесэнть ванстыть культуранть ды казить весенень кеняркс.
Культурасо весе эрямонзо перть
Любовь Сергеевна Агафонова – Отяжелень райононь Дюрькина велень Культурань кудонь прявт.
– Чачинь-касынь шабра Паранеи велесэ. Тетям – Пумбрань, авам – Таразбуень. Эйкакштнеде семиясонок ульнесть ламо, эрявсть весень трямс-кастомс. Паранеисэ жо икеле ульнесь ПМК ды семиянок кармась эрямо тосо. Мон уш чачинь те велесэнть. Паранеись, Дюрькинась, Сабанцелесь, Таразбуесь, Аловась – неть велетне весе аштить вейке-вейкенень малацек. Ней хозяйстваськак вейке – «Сабанчеевское» ООО-сь. Эсенек велесэ средней школа арасель, якинь Сабанцелев, – ёвтни Любовь Агафонова.
Школанть прядомадо мейле Любовь Сергеевна тонавтнесь Орданьбуень культпросветучилищасо.
– Мекс кочкия творческой профессиянть? Школасо свал морылинь. Минек директорокс ульнесь Мария Ивановна Данилова. Авась пек пароль, весементь редиль. Школасо тонавтниця эйкакштнень содылинзе весе маштомачист ды содамочист. Парсте редиль, кинь мезес ёрокчинзэ улить, – ёвтни Любовь Агафонова. – Истя, школанть прядовома малав тердимим ды кевкстни: «Люба, ков арсят седе тов молемс тонавтнеме?» А мон тензэ: «А содан». Ды сон монень мерсь варчамс виень Орданьбуень культпросветучилищасо. Каршо эзинь моле, арсинь: мекс а варчамс?
Мария Ивановнань превс путоманзо ульнесть видеть. Тонавтнемась тейтерентень ульнесь седеень коряс. Тонавтнесь вадрясто, училищанть прядызе якстере диплом марто.
Распределениянь коряс Любовь Агафоновань кучизь Отяжелень райононь Автоклубонь заведующеекс. Тосто – Дюрькина велев клубонь прявтокс.
– Мон тей сынь 1986 иень февралень 1-це чистэ. Мекс сынь? Дюрькинань Культурань кудосонть арасель важодиця. А вана колхозонь председателекс сестэ ульнесь Михаил Васильевич Лушкин ды сон пшкадсь районов, кучомс тенст кадрат – Культурань кудов важодицят. Мон, те ёнкссонть чачозесь-касозесь, каршо эзинь моле ды сынь, – корты Любовь Сергеевна. – Сынь чаво зданияс, мезеяк арасель. Ды вана те шкас роботан тесэ. Эсь тевенть пек вечкса.
Теске, Дюрькинас, Любовь Сергеевна венчась, чачтсь кавтаськеть – кавто цёрат. Сынь эстест кочкизь алкуксонь цёрань профессиятнень – вейкесь роботы МЧС-сэ, омбоцесь – Росгвардиясо.
– Нама, пек мелявтан кисэст. Профессияст парт, сынь важодить лиятнень эрямост идемга. Ансяк вана авань седеесь свал ризны кисэст, – тешксты Любовь Сергеевна.
Весе неть мелявкстнэнь оймавтомасо авантень лезды важодемась. Эсь велесэ культурань тевтнень ветямодо башка, Любовь Агафонова морси Отяжелень райононь Культурань кудонь «Валскень зоря» ансамблясонть. Ансамблянь аватнень марто те иень тунда ардтнесь Ленинградской областев «Николань чить» фестивалев. Сон ютавтовсь Свято-Троицкой Александро-Невской Лаврань наместникенть, Кронштадтскоень епископонть Вениаминэнь баславамонзо коряс.
Велень аватнень марто вейсэ лездыть СВО-нтень – кодыть кекшемань алтымат, стыть-анокстыть оршамопельть ды эрявикс кедьёнкст. Весемесэнть снартнить лездамс масторонтень ды минек цёратненень.
– Покш сюкпря минек велень сеть эрицятненень, кить явить мель те покш ды эрявикс тевентень. Сынстемест мон мезеяк аволинь тее. Самай сынь монь лездыцян, важодемантень виень максыцян. Вейсэ минь тейтяно ламо, – кемекстызе Любовь Агафонова.
Школань тонавтыцясто – библиотекарекс
Любовь Агафоновань васенце лездыцязо – Дюрькина велень библиотекань важодицясь Татьяна Михайловна Гаврилова. Вейсэ сынь велень кенярксчитненьгак анокстыть, морамосояк кенярдовтыть велень эрицятнень ды инжетнень ды лия тевтненьгак ветить.
Татьяна Михайловна теке велень. Тесэ ютась мелявкстомо эйкакш поразо, тундонь цеця ладсо панжиця од шкась. Тесэ эри ды важоди течияк.
– М. Е. Евсевьев лемсэ Педагогической институтонть прядомадо мейле 28 иеть роботынь эсенек велень школасо тонавтыцякс. Ветинь историянть ды географиянть, – ёвтни Татьяна Гаврилова. – Зярыя иеде икеле школанок пекстызь, аламос аштинь кудосо. Малав колоньгемень иень перть важодемадо мейле кудосо аштемась тень марявсь пек стака ды зярдо чамсь тарка библиотекасо, карминь роботамо тесэ. Библиотекарекс важодян омбоце ие, тевесь тень пек вечкеви. Эдь библиотекась пек кеместэ сюлмавозь школанть марто: эйкакштнень марто роботамось, вишкинетнень ды покштнень мартояк вейсэнь мероприятиятне, свалшкане эрьва кодамо документтнэнь анокстамось.
Зярдо минь кевкстинек Татьяна Михайловнань: мекс сон кочкизе тонавтыцянь тевенть? Авась тешкстась, ульнесть пек вадря тонавтыцят, конатнень ёнов молицякс сон бажась улемс.
– Школасо тонавтнема шкасто келень тонавтыцянок ульнесть Мария Николаевна Трошкина, Анатолий Иванович Цветков. Сынь ульнесть алкуксонь тонавтыцят, конатне пек парсте содылизь эсь тевест. Ды самай сынь панжизьгак монь эйсэ тонавтыцянь профессиянтень вечкеманть, – ёвтни Татьяна Михайловна. – Ды минек классто сестэ сисемнек кочкинек пединститутонть. Ды весе карминек тонавтыцякс.
Библиотекасо важодемась Татьяна Михайловнанень вечкевсь васенце чистэ саезь. Нама, ловныцятнеде ней сакшныть аволь пек ламо, ансяк сон снартни топавтомс весе сынст бажамотнень.
– Минек ловныцятне ламолгадыть кизэнь шкасто, зярдо покштяст-бабаст туртов каникулас усксызь ошсто эйкакштнень. Те шкастонть мон снартнян сынст туртов ютавтомс седе ламо мельстуиця мероприятият, кортнемат. Течи минек фондсонок малав 13 тёжат экземплярт. Эрьва ие мезеяк рамави од. Ютазь иестэ 60 ламо книгат састь, седе покш пельксэсь – эсенек эрзянь кельсэ сёрмадыцятнень. Минек библиотеканть ули весе эрявикс техникаськак – компьютер, принтер ды лия мезе. Те техниканть икелень библиотекаресь рамизе грантонь ярмактнень лангс, – ёвтни Татьяна Гаврилова. – Минек улить истят ловныцянок, конатне библиотекав якить весе эрямост перть, сынст марто важодемась ветяви седе кеместэ. Свалшкань ловныцятнень ютксо школань тонавтыцятне Валентина Михайловна Нажалкина, Нина Петровна Орлова. Свалшкань ловныцянок – Валентин Иванович Тужин. Сонензэ 70 иеть, ловнынзе весе книгатнень, конатне улить библиотекасонок. Сынь лиясто яла пшкадить, ули мелест ловномс те эли тона книганть. Минек фондсо жо сон арась. Мон вешнян кить-янт, косто те книганть саемс-муемс. Эдь истят ловныцятнень мелест эрявить топавтомс.
Книгань ловномадонть башка, библиотекасонть ули ламо лия мезе мельстуиця. Истя, важоди «Рукодельница» кружокось, велень аватне сакшныть покш мельсэ. Свал пурнавить выставкат ды вастовомат. Тесэ жо важоди а покшке музей, косо невтевить сеть кедьёнкстнэ, конатне парсте невтить Дюрькина велень икелень шкань эрямонть.
– Велесэнть минек школа арась, ломантненень жо эряви ковгак пурнакшновомс. Велень клубось ды библиотекась тень туртов сехте пек ладить. Тесэ минек ютавтовить весе кенярксчитне, вастовоматне. Анокстатано яла концертт, каванятано весень чайде ды эсь паневкстнэде. Покш сюкпря, ёроков ават улить эрицятнень ютксояк, конатне морамояк маштыть, куш кодамо покш тевсэяк лездыть. Сынстемест ковгак, – тешкстызе Татьяна Михайловна.
Весемесэ ёроков, эрьва тевсэнть кол
Дюрькина велень ёроков аватнень ютксо Мария Михайловна Акимова. Сон лезды эрьва кодамо кенярксчитнень ды мероприятиятнень анокстамосо-ютавтомасо, вейсэ лиятнень марто коды кекшемань алтымат.
Мария Акимова школадо мейле прядызе Орданьбуень культпросветучилищань оркестровой отделениянть, баян классонь коряс.
– Касынь музыкальной семиясо. Авам мазыйстэ морыцяль ды минекак тонавтсь киштеме-морамо. Истя, вишкинестэ саезь лелям гармошкасо налкси, а мон – баянсо, – ёвтни Мария Михайловна. – Од шкасто аламос роботынь эсенек райононь Покш Манадыши велень клубсо, школасо музыка ветинь. А мейле 37 иеть эринь ды важодинь Московсо.
2008 иестэ Мария Михайловна велявтсь тиринь велев ды кадовсь теске. Ней баянсо налксемасонть авась кенярдовты аволь ансяк тиринь велень эрицятнень, весе сыця инжетненьгак.
– Лиясто пуромтано кекшемань алтыматнень кодамо, аватне мекс-бути нусманят. Арсян, истя а тев. Алтыманть кодамсто эряви паро мельёжо, штобу цёратненьгак СВО-нь таркатнесэ весемесь парсте молевель. Сайса баянонть, серьгедян кодамояк моро. Аламонь-аламонь сыньгак вельмить, кецязевить. Тевеськак лиякс сырги. Эряви вечкемс сень, мезе теят, эрямоськак эдь лиякс карми молеме, – тешксты Мария Акимова.
Эрзянь неть аватне эсь тиринь велень алкуксонь вечкицят. Сынь путыть весе виест ды оймест, штобу Дюрькина велесь эряволь. Эдь бути школанть мельга ёми культураськак, сестэ мезе учома?
Учить аватне Культурань кудонть одкстомтоманзояк, паряк, зярдояк понги «Культура» нацпроектэнтень. Те улевель бу пек паро!
Юлия Еремина